(ព្រៃវែង)៖ ក្រោមគំនិតផ្ដួចផ្ដើមរបស់លោក សួន សុម៉ាលីន អភិបាលខេត្តព្រៃវែង និងក្រុមការងាររដ្ឋបាលខេត្តព្រៃវែង បានដឹកនាំប្រជាពលរដ្ឋក្នុងមូលដ្ឋាន ចូលរួមធ្វើអំបុកលីងជូនដល់វីរជនកងទ័ពជួរមុខកម្ពុជា និងបងប្អូនប្រជាពលរដ្ឋភៀសសឹក។

ប្រជាពលរដ្ឋម្នាក់ បានលើកឡើងថា ការលីងអំបុកនៅពេលនេះ គឺជាទឹកចិត្តស្មារតីសាមគ្គីភាព ខ្មែរស្រឡាញ់ខ្មែរ ក្នុងការលើកទឹកចិត្តដល់កងទ័ពនៅជួរមុខដែលបានការពារទឹកដីយ៉ាងរឹងមាំ និងសូមជូនពរឲ្យបងប្អូន កងទ័ពនៅជួរមុខ និងពលរដ្ឋដែលជាជនភៀសសឹកទាំងអស់ មានសុខសុវត្ថិភាព សុខភាពល្អ និងឈ្នះអស់មារសត្រូវគ្រប់ទិសទី។

ជាមួយគ្នានេះ លោកអភិបាលខេត្តព្រៃវែង បានថ្លែងអំណរគុណយ៉ាងជ្រាលជ្រៅចំពោះទឹកចិត្ត​ ថ្នាក់ដឹកនាំ មន្ត្រីរាជការ​​ ក្រុមហ៊ុន​ ព្រមទាំងបងប្អូន​ប្រជាពលរដ្ឋ​ និងសប្បុរសជនគ្រប់មជ្ឈដ្ឋាន ដែលបានចូលរួមចែករំលែកធនធាន ទៅតាមលទ្ធភាពរៀងៗខ្លួន តាមរយៈរដ្ឋបាលខេត្ត ដើម្បីឧបត្ថម្ភដល់វីរកងទ័ពជួរមុខ និងក្រុមគ្រួសារប្រជាពលរដ្ឋដែលកំពុងជម្លៀសចេញពីផ្ទះសម្បែង មករកទីកន្លែងសុវត្ថិភាព ដែលនេះពិតជាបានបង្ហាញពីសាមគ្គីភាព ជាធ្លុងមួយក្នុងនាមខ្មែររួមឈាមតែមួយ៕