(សៀមរាប)៖ សម្ដេចព្រះព្រហ្មរតនមុនី ពិន សែម សិរីសុវណ្ណា គណៈមហានិកាយនៃព្រះរាជាណាចក្រកម្ពុជា និងព្រះមន្រ្តីសង្ឃខេត្តសៀមរាប, អាជ្ញាធរខេត្តសៀមរាប បាននិមន្ត អញ្ជើញនាំយកគ្រឿងឧបភោគបរិភោគ និងសម្ភារៈប្រើប្រាស់ ដែលជាអំណោយសប្បុរសជន ចែកជូនដល់ជនភៀសសឹកមកពីតំបន់មានជម្លោះកម្ពុជា.ថៃ ប្រមាណជាង ១,០០០គ្រួសារ នៅស្រុកស្វាយលើ ខេត្តសៀមរាប នារសៀលថ្ងៃទី០១ ខែសីហា ឆ្នាំ២០២៥នេះ។

ថ្លែងក្នុងឱកាសនោះ លោក អ៊ឹង គឹមលាង អភិបាលរងខេត្តសៀមរាប បានសម្តែងនូវសេចក្តីរំភើប និងការកោតសរសើរដល់ទឹកចិត្តរបស់ប្រជាពលរដ្ឋក្នុងស្មារតីខ្មែរជួយខ្មែរ ប្រកបដោយទឹកចិត្តស្មោះសររបស់សប្បុរសជន ទាំងក្នុងខេត្ត និងក្រៅខេត្ត ក៏ដូចជានៅក្រៅប្រទេស ដែលបានចែករំលែកនូវក្ដីស្រឡាញ់ សាមគ្គីភាព មិត្តភាព និងការបរិច្ចាគស្បៀងអាហារជូនដល់សមរភូមិជួរមុខ គ្រួសារទ័ព និងប្រជាជនដែលបានជម្លៀសពីតំបន់ សមរភូមិចូលមកភូមិសាស្ត្រខេត្តសៀមរាប ដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាកតាមរយៈសម្ដេចព្រះព្រហ្មរតនមុនី ពិន សែម និងរដ្ឋបាលខេត្តសៀមរាប។

លោក អ៊ឹង គឹមលាង ក៏បានសំណូមពរដល់បងប្អូនប្រជាពលរដ្ឋទាំងអស់ ឱ្យស្រឡាញ់សុខសន្តិភាព និងអរគុណសន្តិភាព ព្រោះសន្តិភាពនេះ ជាសេចក្តីសុខរបស់យើងទាំងអស់គ្នា សូមកុំឱ្យមានសង្រ្គាម បើមានសន្តិភាពទើបមានការអភិវឌ្ឍន៍គ្រប់វិស័យ។

លោកបន្តថា ជាក់ស្តែងនេះ ប្រទេសរបស់យើងត្រូវប្រទេសថៃ ឈ្លានពាន រំលោភបំពាន ប្រមាទមើលងាយថា ប្រទេសយើង ក្រឬ អន់ក៏ដោយ ក៏មេដឹងនាំយើងនៅតែអត់ធ្មត់ ទប់កាយ ទប់ចិត្ត ប្រុងកងទ័ពយ៉ាងរឹងមាំ ប្រើបញ្ញា ស្មារតី ចរចាការទូតដ៏ឈ្លាសវៃ ដើម្បីដោះស្រាយបញ្ហាដោយសន្តិវិធី។

សម្ដេចព្រះព្រហ្មរតនមុនី ពិន សែម មានថេរដីកាថា «សង្គ្រាម» មិនដែលបានផ្តល់សុភមង្គល ភាពរីកចម្រើន ការជួបជុំគ្រួសារដូចសម័យមានសន្តិភាពនេះទេ។ «សង្គ្រាម» មានតែធ្វើឱ្យមានការឈឺចាប់ ខ្លោចផ្សាមិនអាចគណនាបាន និងវាធ្វើឱ្យបែកបាក់គ្រួសារ បាត់បង់បងប្អូន ញាតិសន្តាន ហើយវិស័យគ្រប់យ៉ាងគឺត្រូវបាត់បង់ទាំងអស់ ដូច្នេះហើយបើសង្គមជាតិមានសុខសន្តិភាព ទើបសាសនារស់នៅសុខស្ងប់បានផងដែរ។

សម្ដេចព្រះព្រហ្មរតនមុនី ពិន សែម មានថេរដីកាសំណូមពរឲ្យបងប្អូនប្រជាពលរដ្ឋខ្មែរទាំងអស់ ត្រូវរួបរួមគ្នា សាមគ្គីជួយគ្នាក្នុងគ្រាលំបាក មានទុក្ខរួមទុក្ខ មានសុខរួមសុខ គ្មានអ្វីដែលល្អប្រសើរជាងពេលបានឃើញប្រទេសជាតិមានសន្តិភាពនោះទេ ឃើញបងប្អូនបានរស់នៅជួបជុំគ្រួសារ ពោរពេញទៅដោយស្នាមញញឹមគ្រប់ៗគ្នា។

សម្ដេចព្រះព្រហ្មរតនមុនី ក៏បួងសួងសូមអោយប្រទេសកម្ពុជាយើងមានសុខសន្តិភាពដូចមុន និងសូមអោយកងទ័ពជួរមុខទាំងអស់ មានសុវត្ថិភាព និងបានជួបជុំគ្រួសារ សូមអោយប្រជាពលរដ្ឋបានសុខសប្បាយបានត្រឡប់ទៅភូមិឋានរបស់ខ្លួនវិញ និងសូមឱ្យបដិសន្ធិវិញ្ញាណរបស់ វីរៈកងទ័ព ដែលបានពលីជីវិតក្នុងសមរភូមិ ទទួលបានសេចក្តីសុខក្នុងសុគតិភពកុំបីឃ្លៀងឃ្លាតឡើយ៕