(ឧត្ដរមានជ័យ)៖ លោក អាត់ស៊ូស៊ី អ៊ូអិណុ ឯកអគ្គរដ្ឋទូតជប៉ុនប្រចាំកម្ពុជា បានបង្ហាញនូវក្តីអាណិតអាសូរ ចំពោះប្រជាជនដែលបានបាត់បង់ជីវិត ឬរងការខូចខាតដោយសារការប្រយុទ្ធគ្នារវាងកម្ពុជា និងថៃ នាពេលកន្លងទៅ។ ការបង្ហាញក្ដីអាណិតអាសូរនេះ បានធ្វើឡើងនៅក្នុងឱកាសដែរលោក បានចូលរួមទស្សនាតំបន់ ដែលរងការបំផ្លិចបំផ្លាញយ៉ាងដំណំដោយសារការប្រយុទ្ធគ្នា នៅខេត្តឧត្ដរមានជ័យ និងខេត្តសៀមរាប នាថ្ងៃទី០១ ខែសីហា ឆ្នាំ២០២៥។

លោក អាត់ស៊ូស៊ី អ៊ូអិណុ បានលើកឡើងយ៉ាងដូច្នេះថា៖ «កាលពីម្សិលមិញ និងថ្ងៃនេះ យើងបានទៅទស្សនាតំបន់ ដែលរងការបំផ្លិចបំផ្លាញយ៉ាងដំណំនៅខេត្តឧត្ដរមានជ័យ ហើយក៏បានទៅទស្សនាកន្លែងស្នាក់នៅជាច្រើនសម្រាប់ប្រជាជនដែលត្រូវបានជម្លៀស ទាំងនៅខេត្តឧត្ដរមានជ័យ និងនៅទីនេះក្នុងខេត្តសៀមរាប។ ខ្ញុំយល់ថាស្ថានភាពរបស់ប្រជាជនគឺលំបាកខ្លាំងណាស់ ហើយក្នុងឱកាសនេះ ខ្ញុំសូមសម្តែងនូវការចូលរួមរំលែកទុក្ខយ៉ាងស្មោះស្ម័គ្រ និងសេចក្តីអាណិតអាសូរចំពោះប្រជាជន ដែលបានបាត់បង់ជីវិត ឬរងការខូចខាតដោយសារការប្រយុទ្ធគ្នា។ ចំពោះស្ថានភាពនេះ វាលំបាកណាស់ ខ្ញុំសង្ឃឹមថាជីវិតប្រកបដោយសន្តិភាព នឹងត្រូវបានបន្តឡើងវិញឱ្យបានឆាប់តាមដែលអាចធ្វើទៅបាន»។

ក្រោយការសង្កេតឃើញពីទុក្ខលំបាករបស់ជនភៀសសឹកកម្ពុជា ផ្ទាល់ភ្នែកបែបនេះ នាំឱ្យលោកឯកអគ្គរដ្ឋទូតជប៉ុនប្រចាំកម្ពុជា បង្ហាញជំហរថា បទឈប់បាញ់ត្រូវបានរក្សាទុកឱ្យបានយូរតាមដែលអាចធ្វើទៅបាន នៅក្នុងប្រទេសកម្ពុជា។

លោក អាត់ស៊ូស៊ី អ៊ូអិណុ បានថ្លែងថា៖ «តាមអ្វីដែលយើងបានសង្កេត ការឈប់បាញ់ត្រូវបានរក្សាទុកនៅទីនេះក្នុងប្រទេសកម្ពុជា ដូច្នេះខ្ញុំសង្ឃឹមថាស្ថានភាពនេះនឹងត្រូវបានរក្សាទុកឱ្យបានយូរតាមដែលអាចធ្វើទៅបាន។ ហើយសម្រាប់ពេលបច្ចុប្បន្ននេះ យើងសង្ឃឹមថាភាគីកម្ពុជា និងភាគីថៃអាចអង្គុយលើតុតែមួយសម្រាប់ការសន្ទនា ខ្ញុំសង្ឃឹមថាការសន្ទនានេះនឹងនាំទៅរកសន្តិភាពយូរអង្វែងលើបញ្ហានេះ»។

រដ្ឋាភិបាលជប៉ុនសូមផ្តល់ការគាំទ្រណាមួយ ដែលយើងអាចធ្វើបានសម្រាប់ការរក្សាការឈប់បាញ់ និងដើម្បីស្តារការខូចខាតដែលបណ្តាលមកពីការប្រយុទ្ធគ្នានេះ ជាការពិតទាំងនៅកម្ពុជា និងនៅប្រទេសថៃ។ នេះជាការសង្កត់ធ្ងន់បន្ថែមទៀតពីលោក អាត់ស៊ូស៊ី អ៊ូអិណុ ឯកអគ្គរដ្ឋទូតជប៉ុនប្រចាំកម្ពុជា។

យ៉ាងណាមិញ ជំហានបន្ទាប់ដែលសំខាន់សម្រាប់ការរក្សាការឈប់បាញ់ និងស្តារសន្តិភាពឡើងវិញ គឺកិច្ចប្រជុំ GBC ដែលនឹងមកដល់ឆាប់ៗនេះ។ លោកឯកអគ្គរដ្ឋទូតជប៉ុនប្រចាំកម្ពុជា បានអះអាងថា៖ «វាពិតជានឹងកើតឡើងឆាប់ៗនេះ ដូច្នេះខ្ញុំសង្ឃឹមថាការសន្ទនារវាងភាគីកម្ពុជា និងភាគីថៃនឹងត្រូវបានធ្វើឡើងប្រកបដោយស្ថាបនា នៅក្នុងកិច្ចប្រជុំ GBC ហើយកិច្ចប្រជុំ GBC នឹងនាំទៅរកសន្តិភាពយូរអង្វែងនៅក្នុងប្រទេសទាំងនេះ»។

ឆ្លៀតក្នុងឱកាសនោះលោកឯកអគ្គរដ្ឋទូតជប៉ុនប្រចាំកម្ពុជា ក៏បានថ្លែងអំណរគុណចំពោះក្រសួងការបរទេសកម្ពុជា ដែលបានរៀបចំដំណើរទស្សនកិច្ចនេះ សម្រាប់បណ្ដាទូតបរទេសបានទៅចូលរួមទស្សនាតំបន់ ដែលរងការបំផ្លិចបំផ្លាញយ៉ាងដំណំដោយសារការប្រយុទ្ធគ្នានេះ។

សូមជម្រាបថា យោងតាមរបាយការពីក្រសួងការពារជាតិ គិតត្រឹមថ្ងៃទី៣០ ខែកក្កដា ឆ្នាំ២០២៥ នៅម៉ោង១៧៖៤៥នាទី បានបង្ហាញថា ចំនួនជនភៀសសឹកកម្ពុជាសរុបរួមមានចំនួន ១៧២,០៩៤នាក់ ក្នុងចំណោមជនភៀសសឹកទាំងអស់នោះរួមមាន៖ ខេត្តឧត្តរមានជ័យ មានចំនួន ៣៩,៥៤៦នាក់, ខេត្តព្រះវិហារ មានចំនួន ៣២,៥៥៨នាក់, ខេត្តបន្ទាយមានជ័យ មានចំនួន ៣៥,០៥៧នាក់, ខេត្តពោធិ៍សាត់ មានចំនួន ៣,០២៦នាក់ និងខេត្តសៀមរាប មានចំនួន ៦,១៩០៧នាក់៕