(ភ្នំពេញ)៖ អ្នកជំនាញគណនេយ្យ បានលើកទឹកចិត្តឱ្យគណនេយ្យ​ករទាំងអស់​ ជាពិសេសអ្នកបម្រើការងារក្នុងសហគ្រាសធុនតូច និងមធ្យម(SMEs) ស្វែងយល់អំពីបច្ចេកវិទ្យា​ ដើម្បីពង្រឹងសមត្ថភាព​របស់ខ្លូន និងពង្រឹងអាជីពមួយនេះឲ្យរីកចម្រើនទៅមុខ​ ដើម្បីជួយទៅដល់​សហគ្រាសធុនតូចឱ្យកាន់តែរីកចម្រើន។

លោក​ សោភាន់ ចែត្រា ប្រធានក្លឹបគណនេយ្យកម្ពុជា ​បានលើកឡើងថា ការស្វែងយល់អំពីបច្ចេកវិទ្យានឹងមានឥទ្ធិពលមកលើការបំពេញការងារបស់គណនេយ្យ​ករ និងចំណេញពេលវេលា។ ​គណនេយ្យករ អាចប្រើប្រាស់ AI ឱ្យជួយធ្វើការងារធម្មតា ការងារសាមញ្ញ ដូចជាការចុះបញ្ជី និងប្រមូលទិន្នន័យ ដែលចំណេញជាង៨.៥% ។​ ​ហើយងាកពង្រឹងសមត្ថភាព​ការវិភាគហិរញ្ញវត្ថុ ការទំនាក់ទំនងជាមួយស្ថាប័នហិរញ្ញវត្ថុ ដែល AI មិនអាចធ្វើបានវិញ។

លោកបន្ថែមថា ដើម្បីជួយដល់ការពង្រឹងសមត្ថភាព​គណនេយ្យ​ករ​បម្រើការងារក្នុងសហគ្រាសធុនតូច និងមធ្យម ​ក្លឹបគណនេយ្យកម្ពុជាបានចូលរួមជាមួយមូលនិធិអភិវឌ្ឍន៍ជំនាញ ដើម្បីជួយបណ្តុះបណ្តាល លើកកម្ពស់សមត្ថភាពរបស់​គណនេយ្យករទូទាំងប្រទេសផងដែរ ដើម្បីជួយដល់សហគ្រាសធុនតូច និងមធ្យម ដែលជាវិស័យមួយជួយបង្កើតការងារជូនពលរដ្ឋ និងជួយដល់សេដ្ឋកិច្ចកម្ពុជា​ និងជំរុញឱ្យជំនាញគណនេយ្យករកាន់តែរីកចម្រើន។​

ជាមួយគ្នានេះដើម្បីឆ្លើយតបទៅនិងយុគសម័យឌីជីថលនេះ ក្លឹបគណនេយ្យកម្ពុជាបានចំណាយពេលជាងមួយឆ្នាំ ដើម្បីបង្កើតនូវ APP ទូរសព្ទ័ដៃ ដែលគណនេយ្យករអាចdownload ចូលទៅមើលនូវវីដេអូចំណេះដឹង និងពត៌មានជាច្រើនដែលពាក់ព័ន្ធនិងអាជីពគណនេយ្យ។
​
លោក ទុយ ហុង ស្ថាបនិក និងនាយកគ្រប់គ្រង នៃ Localize Tech Solution បានលើកឡើងថា ស្របជាមួយនឹងការរីកចម្រើននៃអាជីវកម្ម ជាពិសេសSMEs ​​ គណនេយ្យករ កាន់តែដើរតួនាទីយ៉ាងសំខាន់ ក្នុងការផ្តល់ការគាំទ្រដល់ម្ចាស់អាជីវកម្ម និងជំរុញឱ្យអាជីវកម្មនោះកាន់តែរីកចម្រើន តាមរយៈការគ្រប់គ្រងឱ្យច្បាស់លាស់នូវលំហូរចំណូល និងចំណាយ។

លើសពីនេះលោកលើកទឹកចិត្តដល់គណនេយ្យករទាំងអស់ ស្វែងយល់បន្ថែមពីការប្រើប្រាស់ឧបករណ៍​បច្ចេកវិទ្យាផ្សេង ដើម្បីអភិវឌ្ឍន៍ខ្លួនលើសពីការគ្រប់គ្រងលំហូរចំណូល និងចំណាយរបស់ក្រុមហ៊ុន។

ការលើកឡើងរបស់អ្នកជំនាញគណនេយ្យ លោក​ សោភាន់ ចែត្រា និងលោក​ ទុយ ហុង ធ្វើឡើងក្នុងសិក្ខាសាលា​លើកទី៨ របស់ក្លឹបគណនេយ្យកម្ពុជា ក្រោមប្រធានបទ«គណនេយ្យករឆ្លាតវៃក្នុងសម័យ ឌី ជី ថល របស់កម្ពុជា» ដែលបានរៀបចំឡើងកាលពីថ្ងៃទី២៧ ខែកក្កដា ឆ្នាំ២០២៥ ដោយមានការចូលរួមពីគណនេយ្យ​ករជាច្រើននាក់៕