(ព្រះវិហារ)៖ លោកឧកញ៉ា ហាក់​ លាងហ៊​ ប្រធានសមាគមភស្តុភារកម្មកម្ពុជា​ (Cambodia Logistics Association) ដោយមានការចូលរួមពីលោក អ៊ុក គឹមសាន អភិបាលរងខេត្តព្រះវិហារ នៅថ្ងៃទី២ ខែសីហា ឆ្នាំ២០២៥នេះ បានដឹកនាំក្រុមការងារចុះសួរសុខទុក្ខ និងនាំអំណោយចែជូនប្រជាពលរដ្ឋភៀសសឹកចំនួន៤០០គ្រួសារ ដែលកំពុងស្នាក់នៅបណ្តោះអាសន្នមណ្ឌលសុវត្ថិភាព វត្តត្រាវគៀត ក្នុងភូមិត្រាវគៀរ ឃុំថ្មី ស្រុកគូលែន ខេត្តព្រះវិហារ។

ក្នុងនាមប្រជាពលរដ្ឋខ្មែរទាំងក្នុង និងក្រៅប្រទេស ក៏ដូចជាប្រជាពលរដ្ឋភៀសសឹកដែលកំពុងស្នាក់នៅមណ្ឌលសុវត្ថិភាពផ្សេងៗ លោកឧកញ៉ា ហាក់ លាងហ៊ បានចូលរួមរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសពវីរកងទ័ពដ៏អង់អាចក្លាហាន ដែលបានពលីជីវិតក្នុងសមូរភូមិ ដើម្បីបុព្វហេតុការពារទឹកដីនៅតាមបន្ទាត់ព្រំដែនកម្ពុជា-ថៃ មិនឲ្យបាត់បង់ឡើយ។

លោកថ្លែងបញ្ជាក់ទៀតថា ព្រឹត្តិការណ៍ផ្ទុះអាវុធនៅតាមព្រំដែនកាលពីថ្ងៃទី២៤ ខែកក្កដា ឆ្នាំ២០២៥ ដែលបង្កឡើងដោយកងទ័ពសៀម បានធ្វើឲ្យប្រជាពលរដ្ឋខ្មែរស្លួតត្រង់នៅតាមព្រំដែន ត្រូវបង្ខំចិត្តចាកចេញពីផ្ទះ មកស្នាក់នៅតាមទីតាំងសុវត្ថិភាពផ្សេងៗ។ ក្នុងស្មារតីខ្មែរស្រឡាញ់ខ្មែរ ខ្មែរជួយខ្មែរ ក្រោមការដឹកនាំរបស់រាជរដ្ឋាភិបាល លោកក៏បានដឹកនាំក្រុមការងារចូលរួមចំណែកជួយជនភៀសសឹកនៅទីនេះ ជាគ្រឿងឧបភោគ បរិភោគ និងថវិកាផងដែរ។

លោកឧកញ៉ា ហាក់ លាងហ៊ បានថ្លែងប្រាប់ប្រជាពលរដ្ឋពីការខិតខំប្រឹងប្រែងរបស់សម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការដោះស្រាយបញ្ចប់សង្គ្រាមរវាងកម្ពុជា-ថៃ ឲ្យបានឆាប់ តាមរយៈវិស័យការទូត ដើម្បីឲ្យប្រជាពលរដ្ឋឆាប់បានវិលត្រឡប់ទៅលំនៅដ្ឋាន ប្រកបរបរចិញ្ចឹមជីវិតផ្សេងៗ។ លោកបានអរគុណដល់អាជ្ញាធរខេត្តព្រះវិហារ ក៏ដូចជាអ្នកពាក់ព័ន្ធទាំងអស់ ដែលបានយកចិត្តទុកដាក់ជួយប្រជាពលរដ្ឋក្នុងគ្រាដ៏លំបាកនេះ។

អំណោយដែលនាំយកមកចែកជូននៅពេលនេះរួមមាន៖ ភួយ ចំនួន៤០០ភួយ, អង្ករ ១៨បេ, កាហ្វេ ២៩កញ្ចប់, សារ៉ុង ៤៦៩ក្រម៉ា, ធូបមូសដើមវែង៥កេស ៧៨ប្រអប់ Raid range ដើមមូល៤កេស ស្មើនឹង (២៤០ប្រអប់), សាប៊ូកក់សក់ ៥៤០កញ្ចប់, សាប៊ូដុសខ្លួន៤៧១ដុំ, សាប៊ូបោកខោអាវLix ៤៧០កញ្ចប់, Viso២០៥កញ្ចប់, ថ្នាំដុសធ្មេញColgate២៨០ទីប, vigor៥០៤ទីប, ច្រាសដុសធ្មេញ៥៥២ដើម, សំឡីអនាម័យ ២៨៦ដុំ, ថ្នាំពេទ្យសេរ៉ូកូនក្មេង៨៧ដប, ប្រេងកូឡា៨៦៤ប្រអប់, ឆៃប៉ូវ ៤ការ៉ុង, សាច់ផាត់២ការ៉ុង និងថវិកាក្នុងម្នាក់ទទួលបាន១០,០០០រៀល។ ជាមួយគ្នានេះ បានជួយឧបត្ថម្ភដល់ស្រ្តីមានផ្ទៃពោះ១១នាក់ ក្នុងម្នាក់ៗថវិកា១០០,០០០រៀល ជូនថវិកាប្រជាការពារ ប្រជាជនស្ម័គ្រចិត្ត និងបច្ច័យ២០០ដុល្លារដល់វត្តត្រាគៀតផងដែរ៕