(ភ្នំពេញ)៖ រដ្ឋបាលរាជធានីភ្នំពេញ នៅតែបន្តទទួលអំណោយពីសប្បុរសជន គិតត្រឹមម៉ោង១៦៖០០នាទី ថ្ងៃទី២ ខែសីហា ឆ្នាំ២០២៥នេះ ទទួលនូវការបរិច្ចាគសរុបជាប្រាក់រៀលជាង១ពាន់លានរៀល និងប្រាក់ដុល្លារជាង៣៧ម៉ឺនដុល្លារអាមេរិក។

ដោយរយៈពេលប៉ុន្មានថ្ងៃកន្លងមកនេះ ពិនិត្យឃើញថា មានប្រជាពលរដ្ឋ សប្បុរសជននានា មន្ត្រីរាជការជាច្រើន ក្នុងរាជធានីភ្នំពេញ បានបរិច្ចាកធនធានដែលមានផ្ទាល់ខ្លួនយកមកជួយឧបត្ថម្ភដល់វីរកងទ័ពយើងនៅជួរមុខ និងជនភៀសសឹក ដែលនេះបង្ហាញទឹកចិត្តដ៏មុតស្រួច និងប្តូរផ្តាច់ជាមួយកងទព័ជួរមុខរបស់យើង។

លោកស្រី ដោ សម្ផស្ស នាយិការរងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា គិតត្រឹមម៉ោង ១៦៖០០នាទី ថ្ងៃទី២ ខែសីហា ឆ្នាំ២០២៥នេះ រដ្ឋបាលរាជធានីភ្នំពេញ ទទួលបានប្រាក់រៀលចំនួន១,២១៧,៩៩១,៦៨៩រៀល និងប្រាក់ដុល្លារ ៣៧៤,៦១៥.០០ដុល្លារអាមេរិក ក្នុងនោះ មានទាំងគ្រឿង ឧបភោគ បរិភោគ ថ្នាំពេទ្យ សម្ភារ ផ្សេងៗ ជាច្រេីនមុខទៀតនេះ ជាខឿនការពារជាតិប្រជាជន។ លោកស្រីនៅបានសូមគោរព ថ្លែងអំណរគុណយ៉ាងជ្រាលជ្រៅ នូវទឹកចិត្តសប្បុរសធម៌របស់បងប្អូនប្រជាពលរដ្ឋ ក្នុងស្មារតី ខ្មែរជួយជាតិខ្មែរ។

អ្នកនាំពាក្យរដ្ឋបាលរាជធានីភ្នំពេញ បានបញ្ជាក់ថា សប្បុរសជននានា និងប្រជាពលរដ្ឋ មន្ត្រីរាជការ ក្នុងរាជធានីអាចបន្តចូលរួមបរិច្ចាគជាបន្តបន្ទាប់ទៀត បានដោយរដ្ឋបាលរាជធានីភ្នំពេញ បានចាត់តាំងក្រុមការងារចាំទទួលសំភារៈ និងថវិកាតាមរយៈ QR Code។

ការទទួលអំណោយ នាថ្ងៃទី២ ខែសីហា ឆ្នាំ២០២៥នេះ លោក ឃួង ស្រេង អភិបាលរាជធានីភ្នំពេញ ទទួលដោយផ្ទាល់ជាមួយប្រជាពលរដ្ឋ និងលោក លោកស្រី ជាអភិបាលរងរាជធានីភ្នំពេញ ព្រមទាំងលោកនាយក លោកនាយករង លោកស្រីនាយិការង រដ្ឋបាលរាជធានីភ្នំពេញ នៅសាលារាជធានីភ្នំពេញ។

ឆ្លៀតក្នុងឱកាសនេះ លោក ឃួង ស្រេង បានថ្លែងអំណរគុណយ៉ាងជ្រាលជ្រៅ ដល់ទឹកចិត្តដ៏ថ្លៃថ្លារបស់ប្រជាពលរដ្ឋ សប្បុរសជននានា មន្ត្រីរាជការជាច្រើន ក្នុងស្មារតីខ្មែរជួយខ្មែរ ក្នុងពេលប្រទេសកើតមានការឈ្លានពានទឹកដីពីកងទ័ពថៃ ខ្មែរគ្រប់ស្រទាប់វណ្ណៈបានសាមគ្គីគ្នាជាធ្លុងមួយ ក្លាយជាខឿនការពារជាតិប្រជាជន គឺសមរភូមិក្រោយ ជួយដល់សមរភូមិមុខ។ លោកបន្តថា ចំពោះអំណោយ ដែលសប្បុរសជនផ្តល់ជូនសាលារាជធានីភ្នំពេញ នឹងត្រូវបានបែងចែកដឹកជញ្ជូនទៅជូនកងទព័ជួរមុខភ្លាមៗតាមដែលអាចធ្វើបាន។

សូមជម្រាបថា អ្វីដែលប្រជាពលរដ្ឋសប្បុរសជននានា មន្ត្រីរាជការ ជាច្រើននៅក្នុងរាជធានីភ្នំពេញ បានបរិច្ចាគធនធានដែលមានផ្ទាល់ខ្លួន យកមកជួយឧបត្ថម្ភជាបន្តបន្ទាប់នេះ ដោយការជឿទុក្ខចិត្ត និងគាំទ្ររាជរដ្ឋាភិបាល ពិសេសគាំទ្រការដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ជាអគ្គមេបញ្ជាការជាន់ខ្ពស់ ក្នុងការដឹកនាំគ្រប់សមរភូមិទាំងផ្លូវច្បាប់, ការទូត និងយោធា ដើម្បីការពារទឹកដីពីកងទ័ពថៃឈ្លានពាន ប្រកបដោយជោគជ័យ៕