(កែប)៖ ដោយអនុវត្តតាមអនុសាសន៍ពីនាយឧត្តមសេនីយ៍អគ្គស្នងការនគរបាលជាតិ រយៈពេល២ថ្ងៃ នៅថ្ងៃទី១-២ ខែសីហា ឆ្នាំ២០២៥ លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប បានដឹកនាំប្រតិភូ នៃស្នងការដ្ឋាននគរបាលខេត្ត និងតំណាងសប្បុរសជន នាំយកគ្រឿងឧបភោគ បរិភោគ ព្រមទាំងសម្ភារៈប្រើប្រាស់ទៅឧបត្ថម្ភជូនដល់ប្រជាពលរដ្ឋជនភៀសសឹក ចំនួន៣គោលដៅ ស្មើ ៤៥៦គ្រួសារ, កងទ័ពកំពុងសម្រាកព្យាបាលនៅមន្ទីរពេទ្យ និងកងកម្លាំងជួរមុខដែលកំពុងឈរជើងការពារបូរណភាពទឹកដី និងអធិបតេយ្យភាពជាតិ ពីអំពើឈ្លានពានរបស់កងទ័ពថៃ ក្នុងខេត្តព្រះវិហារ។

សូមបញ្ជាក់ថា អំណោយ ដែលយកទៅប្រគល់ជូនកងកម្លាំង ជនភៀសសឹក និងកងទ័ពកំពុងសម្រាកព្យាបាលនៅមន្ទីរពេទ្យ នាឱកាសនេះ ជាអំណោយទទួលបានពីសប្បុរសជននានា និងអំណោយពីកងកម្លាំងនៃស្នងការដ្ឋាននគរបាលខេត្តកែប ឧបត្ថម្ភជូនទៅដល់កងកម្លាំង ជនភៀសសឹក និងកងទ័ពកំពុងសម្រាកព្យាបាលនៅមន្ទីរពេទ្យ ក្នុងខេត្តព្រះវិហារ។ ទាំងអស់នេះ គឺក្នុងស្មារតីខ្មែរជួយខ្មែរ ជាខឿនការពារជាតិដ៏រឹងមាំ ការណ៍នេះសបញ្ជាក់ឱ្យឃេីញថា ប្រជាជនខ្មែរ បានរួបរួមសាមគ្គី ទាំងកងកម្លាំងជួរមុខ និងអ្នកនៅជួរក្រោយ។

ឆ្លៀតឱកាសនេះ លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប បានលើកឡើងថា ក្នុងនាមថ្នាក់ដឹកនាំនៃស្នងការដ្ឋាននគរបាលខេត្តកែប សូមថ្លែងអំណរគុណយ៉ាងជ្រាលជ្រៅ ជូនចំពោះមន្ត្រីកងកម្លាំងនគរបាលខេត្ត អាជីវករ ប្រធានក្រុមហ៊ុន សិស្សានុសិស្ស និងបងប្អូនប្រជាពលរដ្ឋទាំងក្នុងនិងក្រៅប្រទេសទាំងអស់ ដែលបានជួយជ្រោមជ្រែងឧបត្ថម្ភគាំទ្រការងារមនុស្សធម៌ក្នុងការចែករំលែកថវិកា សម្ភារៈ និងស្បៀងអាហារ ជួយគ្នាក្នុងគ្រាជួបទុក្ខលំបាក៕