(ឧត្តរមានជ័យ)៖ លោក សេង ប៊ុនឃាង អគ្គព្រះរាជអាជ្ញារង នៃមហាអយ្យការអមតុលាការកំពូល និងសមាជិកឧត្តមក្រុមប្រឹក្សានៃអង្គចៅក្រម នៅថ្ងៃទី១ ខែសីហា ឆ្នាំ២០២៥ បានអញ្ជើញចុះសួរសុខទុក្ខវីរកងទ័ព ដែលកំពុងសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ ស្ថិតនៅសង្កាត់សំរោង ក្រុងសំរោង។

លោក សេង ប៊ុនឃាង បានថ្លែងកោតសរសើរចំពោះវីរភាពអង់អាចក្លាហាន ការលះបង់សាច់ស្រស់ ឈាមស្រស់ និងការខិតខំតស៊ូយ៉ាងស្វិតស្វាញ ដើម្បីការពារបូរភាពទឹកដីកម្ពុជា ពីការឈ្លានពានខុសច្បាប់ពីកងទ័ពថៃ ដែលឆ្លុះបញ្ចាំងឲ្យឃើញច្បាស់ពីគំរូវីរភាពដ៏អស្ចារ្យ មិនអាចប្រៀបផ្ទឹមបានរបស់វីរកងទ័ពកម្ពុជាទាំងអស់ ធ្វើឲ្យប្រជាពលរដ្ឋកាន់តែគោរពស្រឡាញ់។

លោក និងប្រតិភូ បានផ្តល់កម្លាំងចិត្តដល់វីរកងទ័ព ដែលកំពុងសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ ដោយលើកទឹកចិត្តឲ្យរក្សាកម្លាំងចិត្តរឹងមាំ និងខិតខំសម្រាកព្យាបាលឲ្យបានឆាប់ជាសះស្បើយ។

លោក សេង ប៊ុនឃាង ក៏បានគូសបញ្ជាក់ពីការយកចិត្តទុកដាក់របស់រាជរដ្ឋាភិបាលចំពោះវីរកងទ័ព ដោយរៀបចំនូវកញ្ចប់គោលនយោបាយសម្រាប់គ្រួសារ និងបានអំពាវនាវដល់សមាគមធនាគារ និងមីក្រូហិរញ្ញវត្ថុ សម្រាប់គ្រួសារយោធិនពលី របួស និងពិការ ព្រមទាំងការផ្តល់ជាគ្រឿងឥស្សរិយយស។ ជាមួយគ្នានេះ លោកបាននាំថវិកាចែកជូនដល់វីរកងទ័ពទាំងអស់ដែលកំពុងសម្រាកព្យាបាលនៅមន្ទីរពេទ្យបង្អែកផងដែរ៕