(ភ្នំពេញ)៖ នៅផ្លូវថ្មើរជើងចតុមុខ (Walk Street) នាសប្តាហ៍នេះពិតជាខុសប្លែកពីសប្តាហ៍មុនៗ នោះល្ងាចថ្ងៃទី២ ខែសីហា ឆ្នាំ២០២៥នេះ មានព្រះសង្ឃជាច្រើនអង្គ និងក្រុមយុវជនមួយក្រុមមានគ្នាប្រមាណ១,០០០នាក់ បានដង្ហែរក្បួនដើម្បីអបអរសាទរ និងដឹងគុណយ៉ាងជ្រាលជ្រៅបំផុត ចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចំពោះការស្វែងរកបទឈប់បាញ់ជូនជាតិ មាតុភូមិ។

ការដង្ហែរចេញពីមុខវត្តឧណ្ណាលាមឆ្ពោះទៅមុខវាំង ជាមួយការស្រែកបំពងសម្លេង «កម្ពុជាចង់បានសន្តិភាព និងអរគុណ ចំពោះសម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលបានខិតខំស្វែងរកបទឈប់បាញ់ជូនជាតិ» ។

បើតាមលោក ចាន់ សំមុនី ប្រធានប្រតិបត្តិនៃក្រុមសម្ព័ន្ធយុវជនស្ម័គ្រចិត្ត ប្រចាំនៅប្រទេសកូរ៉េខាងត្បូង ដែលបានដឹកនាំយុវជន ដង្ហែរក្បួននេះ បានឲ្យដឹងថា ការដង្ហែរក្បួននេះ ធ្វើឡើង ដើម្បីអបអរសាទរ សម្តេចតេជោ-ធិបតី ចំពោះបូជនកិច្ច និងកិច្ចខិតខំប្រឹងប្រែងរបស់សម្តេចតេជោ-ធិបតី ដែលបាននាំយកនូវបទឈប់បាញ់ និងនាំមកនូវសុខសន្តិភាពជូនជាតិ និងប្រជាពលដ្ឋគ្រប់មជ្ឈដ្ឋាន។

ជាមួយគ្នានេះ លោកនាំយកថវិកាផ្ទាល់ខ្លួន ដែលជាប្រាក់សន្សំទិញផ្ទះ ចំនួន១០០លានរៀល ឧបត្ថម្ភជូនដល់វីរកងទ័ពជួរមុខ និងទិញគ្រឿងឧបភោគបរិភោគ ជូនជនភៀសសឹក ដែលកំពុងជួបការលំបាក និងត្រូវការជំនួយ។ ចំពោះការដង្ហែរក្បួននេះ ធ្វើឡើងដើម្បីរំលឹក នឹកគុណដល់វីរភាពរបស់សម្តេចតេជោ-ធិបតី ក៏ដូចជាការរំលឹកនឹកគុណូការៈ របស់វីរកងទ័ពកម្ពុជា ក្នុងការការពារបូរណភាពទឹកដីជូនជាតិ ដោយមិនឱ្យមានការបាត់បង់សូម្បីតែមួយមីល្លីម៉ែត្រណាឡើយ។

លោក ចាន់ សំមុនី អតីតពលករខ្មែរនៅកូរ៉េខាងត្បូងរូបនេះបានបញ្ជាក់ថា ថវិកា១០០លានរៀលនេះ មួយផ្នែកប្រគល់ជូនកងទ័ព តាមរយៈបញ្ជាការដ្ឋានអង្គរក្ស និងមួយផ្នែកចាត់ចែងទិញគ្រឿងឧបភោគ និងបរិភោគ ប្រគល់ជូនជនភៀសសឹក ដើម្បីតបស្នងនូវការលះបង់សាច់ស្រស់ ឈាមស្រស់របស់វីរកងទ័ពជួរមុខ ក្នុងការការពារបូរណភាព និងអធិបតេយ្យភាពកម្ពុជា ជាមួយភាពក្លាហាន និងស្វាហាប់ រឹងមាំ លើសមរភូមិជួរមុខ។

លោក ចាន់ សំមុនី បានបញ្ជាក់បន្ថែមថា នៅថ្ងៃទី៣ ខែសីហា ឆ្នាំ២០២៥ស្អែកនេះ ពួកគេនឹថជួបជុំគ្នា នៅម៉ោង និងទីតាំងដដែល ដើម្បីដង្ហែរក្បួននេះ ជាលើកទី២ទៀត៕