(សៀមរាប)៖ នារសៀលថ្ងៃសៅរ៍ ៨ កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២ ខែសីហា ឆ្នាំ២០២៥ លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានដឹកនាំថ្នាក់ដឹកនាំ និងមន្ត្រីនៃអគ្គនាយកដ្ឋានពន្ធដារ នាំយកនូវ គ្រឿងឧបភោគ-បរិភោគ ថ្នាំពេទ្យគ្រប់ប្រភេទ និងសម្ភារៈប្រើប្រាស់មួយចំនួន ដែលជាការចូលរួមចំណែកបរិច្ចាគរបស់ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យា នៃអគ្គនាយកដ្ឋានពន្ធដារ ជូនដល់ប្រជាពលរដ្ឋភៀសសឹក និងបានចូលរួមនូវបច្ច័យបុណ្យ ជូនដល់ក្រុមគ្រួសាររបស់វីរកងទ័ព ដែលបានពលីក្នុងសមរភូមិពីការឈ្លានពានរបស់កងទ័ពថៃ តាមរយៈ ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ដើម្បីចាត់ចែងជូនដល់ប្រជាពលរដ្ឋភៀសសឹក និងក្រុមគ្រួសារវីរកងដែលបានពលី។

ក្នុងឱកាសនេះផងដែរ លោករដ្ឋមន្ត្រីប្រតិភូក៏បានអញ្ជើញចុះសួរសុខទុក្ខ និងពាំនាំនូវថវិកាជូនដល់វីរកងទ័ព ដែលសម្រាកព្យាបាលរបួស អំឡុងពេលប្រយុទ្ធការពារបូរណភាពទឹកដីកម្ពុជា និងជនភៀសសឹកដែលរងរបួសសម្រាកព្យាបាល នៅមន្ទីរពេទ្យយោធភូមិភាគទី៤ និងមន្ទីរពេទ្យបង្អែកខេត្តសៀមរាប៕