(ភ្នំពេញ)៖ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា នៅថ្ងៃទី៣ ខែកក្កដា ឆ្នាំ២០២៥នេះ បានឲ្យដឹងថា ក្រុមអ្នកសង្កេតការណ៍អនុព័ន្ធយោធាអាស៊ានអន្ដរកាល ដឹកនាំដោយអនុព័ន្ធយោធាម៉ាឡេស៉ី បានបន្ដបេសកកម្មជាលើកទី២ ចុះទៅពិនិត្យទីតាំងអនុវត្តបទឈប់បាញ់ នៅតំបន់ដែលធ្លាប់ប៉ះទង្កិចប្រដាប់អាវុធរវាងកងទ័ពកម្ពុជា-ថៃ ពិសេសក្នុងភូមិសាស្ដ្រខេត្តឧត្តរមានជ័យ និងខេត្តព្រះវិហារ។

តាមរយៈការសង្ខេបលទ្ធផល នៃការអនុវត្តបទឈប់បាញ់ លោកស្រីឧត្តមសេនីយ៍ឯក ម៉ាលី សុជាតា បានគូសបញ្ជាក់ថា ការចុះពិនិត្យជាលើកទី២ នឹងប្រើប្រាស់ពេល២សប្ដាហ៍ពេញ ដោយក្នុងនោះមានប្រទេសចំនួន៦ចូលរួម រួមមាន ប្រទេសឥណ្ឌូនេស៉ី, ឡាវ, មីយ៉ាន់ម៉ា, ហ្វីលីពីន, សិង្ហបុរី និងប្រទេសវៀតណាម។

អ្នកនាំពាក្យក្រសួងការពារជាតិកម្ពុជា បានថ្លែងយ៉ាងដូច្នេះថា «នៅថ្ងៃទី៣ ខែសីហា ឆ្នាំ២០២៥នេះ ជាលើកទី២ ដែលក្រុមអ្នកសង្កេតការណ៍អនុព័ន្ធយោធាអាស៊ានអន្តរកាល ដឹកនាំដោយអនុព័ន្ធយោធាម៉ាឡេស៊ី ដោយមានការចូលរួមពីប្រទេស៦ផ្សេងទៀត ដូចជា ប្រទេសឥណ្ឌូនេស៉ី, ឡាវ, មីយ៉ាន់ម៉ា, ហ្វីលីពីន, សិង្ហបុរី និងប្រទេសវៀតណាម នឹងអញ្ជើញទៅសង្កេតការណ៍ នៅតាមបណ្ដាទីតាំងមួយចំនួន ដើម្បីពិនិត្យអនុវត្តបទឈប់បាញ់ ក្នុងនោះរួមមានខេត្តឧត្តរមានជ័យ និងខេត្តព្រះវិហារ ដែលជាតំបន់រងផលប៉ះពាល់ នៃការប៉ះទង្កិចប្រដាប់អាវុធរវាងយោធាកម្ពុជា និងយោធាថៃ»។

បើតាមអ្នកនាំពាក្យក្រសួងការពារជាតិ, សកម្មភាពនេះ កើតចេញពីលទ្ធផលនៃការបន្ដពីកិច្ចប្រជុំពិសេសកាលពីថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៉ី ដែលនាំទៅដល់ការឯកភាពគ្នានៃបទឈប់បាញ់ ហើយមកទល់ពេលនេះធ្វើឲ្យស្ថានការណ៍នៅតាមព្រំដែនបានធូរស្រាលឡើងជាមុន។ ការអញ្ជើញចុះទៅលើកទី២នេះ ក្រុមអ្នកសង្កេតការណ៍អនុព័ន្ធយោធាអាស៊ានអន្ដរកាល ដែលដឹកនាំដោយអនុព័ន្ធយោធាប្រទេសម៉ាឡេស៉ី លើកនេះគឺមានរយៈពេល២សប្ដាហ៍ពេញ។

លោកស្រី ឧត្តមសេនីយ៍ឯក ម៉ាលី សុជាតា បានបន្ថែមទៀតថា ការចូលរួមរបស់ប្រទេសដៃគូទាំងអស់ ឆ្លុះបញ្ចាំងឲ្យឃើញពីបំណងប្រាថ្នារួម ធ្វើឲ្យបទឈប់បាញ់ទទួលបានជោគជ័យ យូរអង្វែង ជាមួយគោលដៅនាំមកនូវសន្ដិភាព ស្ថេរភាព កិច្ចសហប្រតិបត្តិការ ការអភិវឌ្ឍសម្រាប់ប្រជាជនប្រទេសទាំងពីរ។

សូមជម្រាបថា កម្ពុជា-ថៃ បានឯកភាពគ្នាលើបទឈប់បាញ់ ដែលអនុវត្តចាប់ពីម៉ោង១២រំលងអធ្រាត្រថ្ងៃទី២៨ ខែកក្កដា ឆ្នាំ២០២៥។ ការឯកភាពគ្នានេះ បានធ្វើឡើងក្នុងកិច្ចចរចាមួយនៅប្រទេសម៉ាឡេស៉ី កាលពីរសៀលថ្ងៃទី២៨ ខែកក្កដា ឆ្នាំ២០២៥ ដែលមានការផ្ដួចផ្ដើមគំនិតពីសហរដ្ឋអាមេរិក និងដឹកនាំសម្របសម្រួលដោយនាយករដ្ឋមន្ដ្រីម៉ាឡេស៉ី ក្នុងនាមជាប្រធានអាស៊ានប្ដូរវេន ព្រមទាំងមានការចូលរួមពីចិនផងដែរ៕