(ភ្នំពេញ)៖ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានអះអាងថា គិតមកដល់ព្រឹកថ្ងៃទី១១ ខែសីហា ឆ្នាំ២០២៥នេះ មានរយៈពេល ១៣ថ្ងៃហើយ ដែលទាហានកម្ពុជា ១៨រូប ត្រូវបានភាគីថៃចាប់ខ្លួន ក្រោយបទឈប់បាញ់ចូលជាធរមាន ហើយមិនទាន់ត្រូវបានដោះលែងត្រឡប់មកប្រទេសកម្ពុជាវិញឡើយ។

តាមរយៈការសង្ខេបព័ត៌មានប្រចាំថ្ងៃ បង្ហាញអំពីបច្ចុប្បន្នភាពនៃការអនុវត្តបទឈប់បាញ់ នាព្រឹកថ្ងៃទី១១ ខែសីហា ឆ្នាំ២០២៥នេះ លោកស្រីឧត្តមសេនីយ៍ឯក ម៉ាលី សុជាតា បានថ្លែងយ៉ាងដូច្នេះថា «គិតចាប់តាំងពីថ្ងៃទី២៩ ខែកក្កដា ឆ្នាំ២០២៥ វេលាម៉ោង៧៖៥០នាទីព្រឹក ក្រោយបទឈប់បាញ់ភ្លាមៗ ដែលកងកម្លាំងរបស់យើងត្រូវបានទាហានថៃចាប់ខ្លួនដោយខុសច្បាប់ មកទល់ពេលនេះមានរយៈពេល ១៣ថ្ងៃ គិតត្រឹមថ្ងៃទី១១ ខែសីហា ឆ្នាំ២០២៥នេះ។ កម្ពុជាស្នើភាគីថៃ ឆាប់បញ្ជូនកងកម្លាំងរបស់យើងទាំង ១៨រូប ត្រឡប់មកវិញជាបន្ទាន់ស្របតាមច្បាប់មនុស្សធម៌អន្ដរជាតិ និងស្របតាមការអំពាវនាវដ៏ទទូចរបស់បណ្ដាប្រទេសជាដៃគូ និងស្ថាប័នអន្ដរជាតិជាច្រើន»។

លោកស្រីឧត្តមសេនីយ៍ឯក ម៉ាលី សុជាតា នៅតែសង្កត់ធ្ងន់ថា ក្រសួងការពារជាតិ និងកងយោធពលខេមរភូមិន្ទ ព្រមទាំងសហគមន៍អន្ដរជាតិ នឹងបន្ដទាមទាររហូតទាល់តែភាគីថៃបំពេញកាតព្វកិច្ចរបស់ខ្លួនក្រោមច្បាប់អន្ដរជាតិ ហើយយើងនឹងមិនទុកសមាជិកគ្រួសារយើងណាម្នាក់ចោល និងឯកោជាដាច់ខាត។

បើតាមអ្នកនាំពាក្យក្រសួងការពារជាតិ, កម្ពុជាសូមគូសបញ្ជាក់យ៉ាងម៉ឺងម៉ាត់ និងច្បាស់លាស់បំផុត នូវការប្ដេជ្ញាចិត្ត និងឥតងាករេរបស់ខ្លួនក្នុងការគោរព និងអនុវត្តយ៉ាងខ្ជាប់ខ្ជួននូវរាល់លក្ខខណ្ឌនៃកិច្ចព្រមព្រៀងបទឈប់បាញ់ ព្រមទាំងស្មារតី និងការឯកភាពគ្នានៅក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកាលពីថ្ងៃទី៧ ខែសីហា ឆ្នាំ២០២៥។

ការប្ដេជ្ញាចិត្តរបស់កម្ពុជា ក្នុងបំពេញការងារប្រកបដោយស្មារតីស្ថាបនាដោយស្មោះត្រង់ និងសហការយ៉ាងជិតស្និតជាមួយប្រទេសថៃ ម៉ាឡេស៉ី បណ្ដាប្រទេសសមាជិកអាស៊ានដទៃទៀត និងដៃគូពាក់ព័ន្ធទាំងអស់ដើម្បីអនុវត្តបទឈប់បាញ់ប្រកបដោយប្រសិទ្ធភាព និងពេញលេញ និងដោះស្រាយរាល់វិវាទដោយសន្ដិវិធីស្របតាមច្បាប់អន្ដរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន៕