(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីរុស្ស៉ី លោក​ វ្ល៉ាឌីមៀ ពូទីន គ្រោងនឹងជួបគ្នាក្នុងរដ្ឋ Alaska នៅថ្ងៃទី១៥ ខែសីហា ខណៈពិភពលោកកំពុងទន្ទឹងរង់ចាំមើលថា តើអ្វីទៅជាលទ្ធផលនៃកិច្ចប្រជុំកំពូលនេះ? ក្នុងនាមជាដៃគូយុទ្ធសាស្ត្ររបស់រុស្ស៉ី ចិនពិតណាស់កំពុងតាមដានយ៉ាងយកចិត្តទុកដាក់លើលទ្ធផលនៃកិច្ចប្រជុំកំពូលត្រាំ-ពូទីន និងថ្លឹងថ្លែងពីសក្តានុពលនៃ ផលប៉ះពាល់ណាមួយដល់ភាពដៃគូយុទ្ធសាស្ត្ររបស់ខ្លួនជាមួយរុស្ស៉ី ក៏ដូចជាភាពតានតឹងរវាងអាមេរិក និងចិន។

លោក ត្រាំ ចង់បញ្ចប់សង្រ្គាមនៅអ៊ុយក្រែនដើម្បីបន្សល់ទុកជាស្នាដៃឱ្យពិភពលោកចងចាំ និងដើម្បីឈ្នះពានរង្វាន់ណូបែលសន្តិភាព។ ក៏ប៉ុន្តែ សកម្មភាពរបស់លោក ត្រាំ ក៏មិនមែនបម្រើប្រយោជន៍ផ្ទាល់ខ្លួន ទាំងស្រុងឡើយ។ លោក ត្រាំ ដឹងថាការបន្តឥតឈប់ឈរនៃសង្រ្គាមរវាងរុស្ស៉ី និងអ៊ុយក្រែន ចង់ ឬមិនចង់ នឹងបង្ខំឱ្យសហរដ្ឋអាមេរិកលូកដៃពាក់ព័ន្ធដែលនេះនឹងកាត់បន្ថយសមត្ថភាពរបស់វ៉ាស៊ីនតោន ក្នុងការប្រមូលផ្ដុំធនធាន និងការផ្តោតទៅលើការប្រជែងជាមួយចិនដែលលោកចាត់ទុកថាជាសត្រូវភូមិសាស្ត្រនយោបាយទី១របស់សហរដ្ឋអាមេរិក។ អ្នកវិភាគខ្លះយល់ថាលោក ត្រាំ អាចលះបង់ ផលប្រយោជន៍របស់អ៊ុយក្រែន និងអឺរ៉ុប ដើម្បីនាំសហរដ្ឋអាមេរិកចាកចេញពីសង្រ្គាមរុស្ស៉ី-អ៊ុយក្រែន។

កាលពីថ្ងៃទី៩ ខែសីហា សារព័ត៌មានអង់គ្លេស The Telegraph បានចេញផ្សាយបទអត្ថាធិប្បាយមួយដែលនិយាយថាកិច្ចប្រជុំកំពូលរវាងលោក ត្រាំ និងលោក ពូទីន នៅរដ្ឋ Alaska គឺជាបរាជ័យមួយសម្រាប់ លោកខាងលិច។ ពីព្រោះកិច្ចប្រជុំនេះអាចនឹងបើកផ្លូវឱ្យរុស្ស៉ីបន្តគ្រប់គ្រងទឹកដីអ៊ុយក្រែនមួយភាគធំ រីឯទណ្ឌកម្មនឹងត្រូវបានដកចេញ ហើយសហរដ្ឋអាមេរិកនឹងបញ្ឈប់ការផ្ដល់ជំនួយយោធាទៅឱ្យអ៊ុយក្រែន។ លោក ពូទីន ប្រហែលបានទាយទុកជាមុនទៅហើយពីចេតនារបស់លោក ត្រាំ និងបន្ទាប់ពីសង្រ្គាមជាង ៣ឆ្នាំមកនេះ រុស្ស៉ីក៏បានបង្ហាញពីសញ្ញាហត់នឿយនឹងសង្រ្គាមផងដែរ។ ប្រសិនបើកិច្ចប្រជុំកំពូលត្រាំ-ពូទីន អាចសម្រេចបានលទ្ធផលដូចលោក ពូទីនចង់បាន ក្នុងនោះដូចជាការទទួលស្គាល់អធិបតេយ្យរបស់រុស្ស៉ីលើតំបន់ភាគខាងកើតអ៊ុយក្រែន និងតំបន់គ្រីមៀ ឬត្រួសត្រាយផ្លូវឆ្ពោះទៅរកការស្ដារទំនាក់ទំនងឡើងវិញ ជាមួយសហរដ្ឋអាមេរិក ស្របពេលទណ្ឌកម្មត្រូវបានបន្ធូរបន្ថយ នោះលោក ពូទីន នឹងមានហេតុផលប្រាប់ប្រជាជនរុស្ស៉ីពីជ័យជម្នះ។ នេះហើយអាចជាហេតុផលមួយជំរុញឱ្យលោក ពូទីន យល់ព្រមធ្វើដំណើរទៅ ជួបលោក ត្រាំ នៅរដ្ឋ Alaska។

តែទោះជាបែបនេះក្ដី លោក ពូទីន ដឹងយ៉ាងច្បាស់ថាចិនគឺជាដៃគូដ៏សំខាន់របស់រុស្ស៉ីទាំងនៅក្នុងសង្រ្គាមអ៊ុយក្រែន និងការចរចាជាមួយសហរដ្ឋអាមេរិក។ ដើម្បីបំបាត់ក្ដីកង្វល់របស់ចិនពីកិច្ចប្រជុំកំពូលត្រាំ-ពូទីន លោក ពូទីន បានហៅទូរស័ព្ទជាមួយប្រធានាធិបតីចិន លោក ស៊ី ជីនពីង កាលពីថ្ងៃទី៨ ខែសីហា ដើម្បីជូនដំណឹងត្រួសៗពីការទំនាក់ទំនងថ្មីៗនេះរវាងសហរដ្ឋអាមេរិក និងរុស្ស៉ី ហើយសង្កត់ធ្ងន់ថាភាពជាដៃគូ យុទ្ធសាស្ត្រគ្រប់ជ្រុងជ្រោយរវាងរុស្ស៉ី និងចិននឹងមិនប្រែប្រួលនោះទេ។ លោក ស៊ី ជីនពីងវិញបាននិយាយថាចិនស្វាគមន៍កិច្ចសន្ទនារវាងរុស្ស៉ី និងសហរដ្ឋអាមេរិក ហើយគាំទ្រដល់កិច្ចប្រឹងប្រែងស្ដារទំនាក់ទំនង ទ្វេភាគី ជាមធ្យោបាយមួយដើម្បីលើកកម្ពស់ដំណោះស្រាយនយោបាយមួយសម្រាប់ការដោះស្រាយវិបត្តិអ៊ុយក្រែន។

ចិនទទួលស្គាល់ថាទំនាក់ទំនងល្អក់កកររវាងរុស្ស៉ី និងលោកខាងលិចមិនអាចមានភាពល្អប្រសើរភ្លាមៗនោះទេ។ ម្យ៉ាងទោះជាកិច្ចប្រជុំកំពូលរវាងលោក ត្រាំ និងលោក ពូទីន អាចសម្រេចបានកិច្ចព្រមព្រៀង ក្នុងទម្រង់មួយចំនួនស្ដីពីបទឈប់បាញ់រុស្ស៉ី និងអ៊ុយក្រែនក៏ដោយ ក៏សង្រ្គាមមិនអាចបិទបញ្ចប់ក្នុងពេលដ៏ខ្លីបាននោះដែរ។ សម្រាប់ចិន បទឈប់បាញ់មួយផ្នែក ឬពេញលេញ យ៉ាងហោចណាស់មានន័យថា សហរដ្ឋអាមេរិកនឹងមិនទំនងជាបង្កើនការដាក់សម្ពាធលើទំនាក់ទំនងពាណិជ្ជកម្មចិន និងរុស្ស៉ី ឬក៏ដាក់ទណ្ឌកម្មបន្ទាប់បន្សំលើចិនទេ។ ក្នុងន័យនេះចិនទំនងជាអាចនឹងទទួលយកលទ្ធផលណាមួយកើតចេញ ពីកិច្ចប្រជុំកំពូលត្រាំ-ពូទីន ដោយចាត់ទុកថាជាផលចំណេញមួយប្រសើរជាងមិនបានអ្វីសោះ។

គួរបញ្ជាក់ថា ជាយូរណាស់មកហើយ ក្រុមអ្នកជំនាញចិនមួយចំនួនជឿថានៅពេលសហរដ្ឋអាមេរិកអាចដោះស្រាយបិទបញ្ចប់សង្រ្គាមនៅអ៊ុយក្រែន ឬអាចឈានដល់ការស្ដារទំនាក់ទំនងឡើងវិញជាមួយរុស្ស៉ី នោះទីក្រុងវ៉ាស៊ីនតោនអាចនឹងពេលវេលាគ្រប់គ្រាន់ដើម្បីផ្តោតលើការប្រជែងជាមួយចិន៕