(បែរឡាំង)៖ ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីរុស្ស៉ី លោក វ្ល៉ាឌីមៀ ពូទីន បានយល់ព្រមជួបមុខគ្នាដោយផ្ទាល់នៅក្នុងរដ្ឋ Alaska នៅថ្ងៃទី១៥ ខែសីហា ដើម្បីពិភាក្សាគ្នា ពីសង្រ្គាមនៅអ៊ុយក្រែន។ នេះគឺជាជំនួបដំបូងបំផុតរវាងមេដឹកនាំទាំង២ ចាប់តាំងពីលោក ត្រាំត្រឡប់មកកាន់អំណាចសាជាថ្មី។ កិច្ចប្រជុំកំពូលត្រាំ-ពូទីន នឹងត្រូវធ្វើឡើងនៅឯមូលដ្ឋានទ័ពអាកាស Elmendorf ក្នុងទីក្រុង Anchorage ដែលជាទីក្រុងធំជាងគេបំផុតនៃរដ្ឋ Alaska។ ក្រុមអ្នកជំនាញមួយចំនួនយល់ថាកិច្ចប្រជុំនេះទំនងជានឹងមិនអាចសម្រេចបានលទ្ធផលផ្លែផ្កាដ៏ធំណាមួយនោះទេ តែមានកត្តាខ្លះអាចនឹងបង្ខំឱ្យលោក ពូទីនយល់ព្រមទទួលយកបទឈប់បាញ់មួយ។ ដូច្នេះតើគេអាចរំពឹងអ្វីខ្លះពីកិច្ចប្រជុំកំពូលត្រាំ-ពូទីន?

* ហេតុអ្វីលោក ពូទីន បើកចំហចំពោះកិច្ចចរចា?
រឿងហេតុបានកើតឡើងតាំងពីខែកក្កដា នៅពេលលោក ត្រាំ បង្ហាញការខកចិត្តម្ដងហើយម្ដងទៀតចំពោះលោក ពូទីនដែលមិនមានឆន្ទៈដើម្បីបិទបញ្ចប់សង្រ្គាមអ៊ុយក្រែន។ លោក ត្រាំ បានប្រកាសថា រូបលោកលែងមានចំណាប់អារម្មណ៍ចង់ចរចាជាមួយលោក ពូទីនទៀតនោះទេ និងបានដាក់ឱសានវាទ៥០ថ្ងៃ ក្រោយមកចុះមកនៅត្រឹម១០ថ្ងៃ ទុកពេលឱ្យលោក ពូទីន ទទួលយកបទឈប់បាញ់មួយ ជាមួយអ៊ុយក្រែន។ តាមក្រុមអ្នកជំនាញ ការអស់ភាពអត់ធ្មត់របស់លោក ត្រាំ ប្រហែលជាហេតុផលមួយជំរុញឱ្យលោក ពូទីនយល់ព្រមជួបលោក ត្រាំ នៅ Alaska។ លោក Kirill Rogov ជាអ្នកវិភាគ នយោបាយម្នាក់ បាននិយាយថាមានកត្តាមួយចំនួនប្រហែលជាអាចបង្ខំឱ្យលោក ពូទីន ខ្នះខ្នែងបិទបញ្ចប់សង្រ្គាមអ៊ុយក្រែន។ តាមអ្នកជំនាញរូបនេះ កត្តាទាំងនោះរួមមានបញ្ហាសេដ្ឋកិច្ចរុស្ស៉ីទន់ខ្សោយ ភាពរីកចម្រើនយឺតយ៉ាវរបស់កងទ័ពរុស្ស៉ីនៅលើសមរភូមិ និងការគំរាមដាក់ទណ្ឌកម្មបន្ទាប់បន្សំរបស់សហរដ្ឋអាមេរិកដែលអាចធ្វើឱ្យរុស្ស៉ីកាន់តែខាតបង់។ «លោក ពូទីនក៏សង្ឃឹមផងដែរថាអាចនឹងទាញ យកប្រយោជន៍ពីអត្រាគាំទ្ររបស់លោកក្នុងពេលបច្ចុប្បន្ន។ ពីព្រោះថានៅដំណាច់ឆ្នាំនេះ លោក ពូទីនអាចនឹងស្ថិតក្នុងគោលជំហរដ៏ពិបាក ប្រសិនបើការវាយលុករបស់រុស្ស៉ីសម្រេចបានលទ្ធផលតិចតួច ហើយនៅសមរភូមិមិនមានការប្រែប្រួលគួរឱ្យកត់សម្គាល់ទេនោះ»។ នេះជាការលើកឡើងរបស់លោក Rogov។

* តើនរណានឹងទទួលផលពីបទឈប់បាញ់តាមផ្លូវអាកាស?
កាលពីសប្ដាហ៍មុន សារព័ត៌មានអាមេរិក Bloomberg ដោយផ្អែកលើប្រភពមិនបញ្ចេញអត្តសញ្ញាណ បានរាយការណ៍ថាវិមានក្រឹមឡាំងហាក់ទទួលស្គាល់ថាដំណើរទស្សនកិច្ចនៅរុស្ស៉ីរបស់ បេសកជនពិសេសអាមេរិក លោក Steve Witkoff ប្រហែលជាឱកាសចុងក្រោយដើម្បីឈានដល់កិច្ចព្រមព្រៀងមួយជាមួយលោក ត្រាំ។ តាម Bloomberg ក្រឹមឡាំងប្រហែលជាអាចនឹងយល់ព្រម ទទួលយកបទឈប់បាញ់តាមផ្លូវអាកាសជាមួយអ៊ុយក្រែន ក្រោមរូបភាពជាសម្បទានមួយសម្រាប់លោក ត្រាំ។ ក៏ប៉ុន្តែក្រុមអ្នកជំនាញមួយចំនួនជឿថាបទឈប់បាញ់បែបនេះនឹងផ្ដល់ផលចំណេញឱ្យរុស្ស៉ី ច្រើនជាងអ៊ុយក្រែន។ ដ្បិតមួយរយៈមកនេះអ៊ុយក្រែនបានដឹកនាំការវាយប្រហារដោយប្រើដ្រូនយ៉ាងមានប្រសិទ្ធភាពប្រឆាំងនឹងរុស្ស៉ី រហូតបង្ខំឱ្យអាកាសយានដ្ឋានរុស្ស៉ីត្រូវបង្ខំចិត្តបិទទ្វារជាច្រើនលើក។ ជាមួយការប្រើដ្រូន អ៊ុយក្រែនក៏បានវាយប្រហារបំផ្លាញឃ្លាំងអាវុធ បរិក្ខារយោធា និងរោងចក្រប្រេងនៅក្នុងទឹកដីរុស្ស៉ីផងដែរ។ ក្នុងន័យនេះប្រសិនបើអ៊ុយក្រែនបញ្ឈប់ការវាយប្រហារតាមផ្លូវអាកាស នោះកងទ័ពរុស្ស៉ីនឹងបន្តភាពរីកចម្រើនក្នុងការវាយប្រហារថ្មើរជើងដែលខ្លួនកំពុងមានប្រៀបស្រាប់លើអ៊ុយក្រែន។

លោក Kirill Rogov យល់ថាលោក ពូទីន ប្រហែលជានឹងមិនប្រឈមនឹងផលវិបាកធ្ងន់ធ្ងរណាមួយនោះទេ បើទោះជាកិច្ចប្រជុំកំពូលនៅ Alaska មិនអាចសម្រេចបានលទ្ធផលផ្លែផ្កាធំណាមួយក៏ដោយ។ អ្នកជំនាញរូបនេះបន្ថែមថា លោក ពូទីន អាចជឿបានថាលោក ត្រាំនឹងមានការអត់ធ្មត់ចំពោះរូបលោក ពីព្រោះជំហររបស់លោក ត្រាំ ចំពោះលោក ពូទីនតែងតែមានទម្រង់ពិសេសជានិច្ច។ លោក ត្រាំ តែងតែ បញ្ចៀសស្ថានការណ៍ដាក់សម្ពាធដោយផ្ទាល់លើលោក ពូទីន ហើយគ្រប់ពេលសម្ពាធតែងតែថមថយចុះ ដោយលោក ត្រាំ និយាយថាមានឱកាសថ្មីដើម្បីឈានដល់កិច្ចព្រមព្រៀងមួយដែលមិនចំាបាច់ត្រូវ បង្កើនការដាក់សម្ពាធនោះទេ។ លោក Rogov យល់ឃើញដូច្នេះដោយសំអាងលើការឯកភាពគ្នារៀបចំកិច្ចចរចារវាងលោក ត្រាំ និងលោក ពូទីន Alaska បើទោះជាការដាក់ឱសាន១០ថ្ងៃរបស់លោក ត្រាំ ផុតកំណត់ទៅដោយមិនមានបទឈប់បាញ់ក៏ដោយ។

* តើមានកត្តាអ្វីអាចបង្ខំឱ្យលោក ពូទីនបញ្ចប់សង្គ្រាម?
លោក Dmitry Gudkov ជាអ្នកនយោបាយរុស្ស៉ីប្រឆាំងម្នាក់នៅក្រៅស្រុក បាននិយាយថាមិនមានមធ្យោបាយសេសល់ពិតប្រាកដដើម្បីដាក់សម្ពាធលើរុស្ស៉ីនោះទេ។ ជាឧទាហរណ៍៖ បើទោះជាមានការដាក់ ទណ្ឌកម្ម ក៏កប៉ាល់ដឹកប្រេងរុស្ស៉ីរាប់រយគ្រឿងនៅតែអាចបន្តដឹកប្រេងទៅលក់ឱ្យបណ្ដាប្រទេសនៅជុំវិញពិភពលោក។ លោក Gudkov យល់ថាបទឈប់បាញ់ភ្លាមៗមួយទំនងជាអាចនឹងទៅរួចដោយសារតែ កត្តានៅក្នុងស្រុកដែលដាក់សម្ពាធលើវិមានក្រឹមឡាំង មិនមែនកត្តាខាងក្រៅឡើយ។ លោកសង្កត់ធ្ងន់ទៀតថាដរាបណាសង្រ្គាមនៅតែអូសបន្លាយ លោក ពូទីននឹងកាន់តែពិបាកក្នុងការអះអាងពីជ័យជម្នះ នៅអ៊ុយក្រែន ប្រាប់ប្រជាជនរុស្ស៉ី។ តាមលោក Gudkov នៅពេលអនាគត ប្រជាជនរុស្ស៉ីនឹងមិនខ្វល់ថាតើអ៊ុយក្រែនចូល ឬមិនចូល NATO ឬក៏សង្រ្គាមបិទបញ្ចប់ដោយរបៀបនោះទេ តែរឿងដែលពួកគេខ្វល់ គឺចង់ឱ្យសង្រ្គាមបិទបញ្ចប់៕