(វ៉ាស៊ីនតោន)៖ រដ្ឋាភិបាលអ៉ីស្រាអែល បានចេញបញ្ជាឱ្យយោធារបស់ខ្លួនបើកប្រតិបត្តិការវាយកាន់កាប់ទីក្រុង Gaza ដែលនាយករដ្ឋមន្ត្រី លោក Benjamin Netanyahu បានពិពណ៌នាថាជា កិច្ចការចុងក្រោយដើម្បីផ្ដួលរំលំក្រុមហាម៉ាស ក្រោយសង្រ្គាមស៊ីពេលជិត២ឆ្នាំមកនេះ។ ការសម្រេចចិត្តរបស់រដ្ឋាភិបាលអ៉ីស្រាអែល ធ្វើឡើងជាមួយការប្រកាសកាលពីថ្ងៃទី២០ ខែសីហា ពីការកែនកងទ័ពបម្រុងជាង ៦០ ០០០នាក់។ ផែនការកាប់កាន់នេះមានភាពចម្រូងចម្រាសយ៉ាងខ្លាំងទំាងនៅក្នុងចំណោមសម្ព័ន្ធមិត្តសំខាន់ៗរបស់អ៉ីស្រាអែលនៅអឺរ៉ុបដែលបារម្ភពីការបង្ក បង្កវិនាសកម្មបន្ថែមដល់ជនស៊ីវិលប៉ាឡេស្ទីន និងក្នុងចំណោមប្រជាជនអ៉ីស្រាអែលដែលខ្លាចថាប្រតិបត្តិការយោធាបែបនេះអាចនឹងបង្កគ្រោះថ្នាក់ដល់អាយុជីវិតចំណាប់ខ្មាំងក្នុងតំបន់ហ្កាហ្សា។

ក្រុមអ្នករិះគន់ផែនការរបស់អ៉ីស្រាអែលក៏បានអំពាវនាវផងដែរឱ្យមានបទឈប់បាញ់មួយជាបន្ទាន់។ ក្រុមហាម៉ាសកាលពីថ្ងៃទី១៨ ខែសីហា បាននិយាយថាខ្លួនយល់ព្រមទទួលយកសំណើ បទឈប់បាញ់ពីអេហ្ស៉ីប និងកាតា។ តែអ៉ីស្រាអែលមិនទាន់ឆ្លើយតបទេ ដោយលោក Netanyahu ព្រលយថាការទទួលយកសំណើបទឈប់បាញ់ បានបង្ហាញថាហាម៉ាសកំពុងស្ថិតនៅក្រោម សម្ពាធយ៉ាងសម្បើម និងភ័យខ្លាចចំពោះផែនការការវាយលុកចូលទីក្រុងហ្កាហ្សារបស់អ៉ីស្រាអែល។ ការលើកឡើងបែបនេះរបស់លោក Netanyahu បានធ្វើឱ្យគេមើលឃើញពីលទ្ធភាពខ្លះៗ ដែលអ៉ីស្រាអែលអាចនឹងប្រើប្រាស់ការសម្លុតគំរាមយោធាដើម្បីជំរុញឱ្យមានដំណោះស្រាយការទូតមួយស្របតាមលក្ខខណ្ឌរបស់ខ្លួន។

* អ្វីទៅជាផែនការកាន់កាប់ទីក្រុងហ្កាហ្សារបស់អ៉ីស្រាអែល?
ក្រុមមន្ត្រីអ៉ីស្រាអែលបានបិទមាត់មិននិយាយពីយុទ្ធសាស្ត្ររបស់ពួកគេនោះទេ។ នេះអាចដោយសារតែកិច្ចប្រឹងប្រែងប្រមូលព័ត៌មានស៊ើបការណ៍សម្ងាត់អំពីទីតាំងស្ថិតនៅរបស់ចំណាប់ខ្មាំង ៥០នាក់ដែលកំពុងជាប់ឃុំក្នុងតំបន់ហ្កាហ្សា ហើយក្នុងចំណោមពួកគេ មាន២០នាក់ត្រូវបានជឿជាក់ថានៅរស់រានមានជីវិត។ បើតាមលោក Eli Cohen ជាសមាជិកមួយរូប នៃគណៈរដ្ឋមន្ត្រីសន្តិសុខរបស់លោក Netanyahu ការផ្ដោតនៃប្រតិបត្តិការរបស់យោធាអ៉ីស្រាអែល គឺជាទីតាំងស្នូលមួយនៃទីក្រុងហ្កាហ្សាដែលមានផ្ទៃក្រឡា ២០គីឡូម៉ែត្រក្រឡា។ ក្នុងបទសម្ភាសន៍ជាមួយទូរទស្សន៍អ៉ីស្រាអែល Channel 14 TV លោក Cohen បាននិយាយថា កងកម្លាំងការពារជាតិអ៉ីស្រាអែល IDF មានពេលវេលាពី៦ ទៅ៨សប្ដាហ៍ដើម្បីបញ្ចុះបញ្ចូល ឬបង្ខំឱ្យជនស៊ីវិលប៉ាឡេស្ទីនចាកចេញពីទីក្រុងហ្កាហ្សា មុននឹងបើកប្រតិបត្តិការវាយលុក។ នេះមានន័យថា IDF អាចនឹងបើកការវាយលុកចូលទីក្រុងហ្កាហ្សានៅដើមខែតុលា ពោលគឺចំខួប ២ឆ្នាំនៃសង្រ្គាមហ្កាហ្សា។ «ដំណាក់កាលវាយលុកនៃប្រតិបត្តិការនឹងត្រូវចំណាយពេលច្រើនខែ មិនមែនច្រើនឆ្នាំនោះទេ»។ នេះបើតាមលោកស្រី Gila Gamliel ជាសមាជិកមួយរូបផ្សេងទៀត នៃគណៈរដ្ឋមន្ត្រីសន្តិសុខអ៉ីស្រាអែល ប្រាប់វិទ្យុ Tel Aviv ប៉ុស្តិ៍ 103 FM។​

បើតាមវិទ្យុកងទ័ពអ៉ីស្រាអែល អ៉ីស្រាអែលត្រូវការកងពល IDF ចំនួន៥ ដើម្បីវាយកាន់កាប់ទីក្រុងហ្កាហ្សា ដែលនេះនឹងតម្រូវឱ្យមានការកែនកងទ័ពបម្រុងច្រើនម៉ឺននាក់ ហើយការកែនទ័ព អាចនឹងត្រូវចំណាយពេលពី១ ទៅ២សប្ដាហ៍។

* អ្វីទៅជាគោលដៅនៃផែនការកាន់កាប់ទីក្រុងហ្កាហ្សា?
គោលដៅនៃផែនការវាយកាន់កាប់ទីក្រុងហ្កាហ្សាត្រូវបានលោក Netanyahu បញ្ជាក់ថាគឺដើម្បីវាយបំបាក់ហាម៉ាស រំសាយអាវុធក្នុងតំបន់ហ្កាហ្សា និងរំដោះចំណាប់ខ្មាំងទាំងនៅរស់ និងស្លាប់។ ដើម្បីសម្រេចតាមគោលដៅនេះ ក្រុមអ្នកជំនាញជឿថាក្រោយបញ្ចប់ប្រតិបត្តិការក្នុងទីក្រុងហ្កាហ្សា អ៉ីស្រាអែលត្រូវបើកប្រតិបត្តិការវាយលុកចូលទីក្រុងផ្សេងទៀតដែលអ៉ីស្រាអែលមិនទាន់បើក ការវាយលុកទ្រង់ទ្រាយធំនាពេលកន្លងមក រហូតទាល់តែក្រុមហាម៉ាសសុំចុះចាញ់មុន ឬរហូតដល់មានកិច្ចព្រមព្រៀងបញ្ចប់សង្រ្គាម។

*​ តើអ្វីទៅជាបញ្ហាប្រឈមដើម្បីសម្រេចគោលដៅទាំងនោះ?
ក្រុមហាម៉ាសនៅក្នុងទីក្រុងហ្កាហ្សា ស្ថិតនៅក្រោមបញ្ជារបស់លោក Izz al-Din al-Haddad ជាមេដឹកនាំជាន់ខ្ពស់ហាម៉ាសចុងក្រោយម្នាក់ដែលរួចផុតពីការតាមសម្លាប់របស់អ៉ីស្រាអែល។ លោក Al-Haddad ត្រូវបានកងកម្លាំងអ៉ីស្រាអែលរំពឹងថានឹងតស៊ូប្រយុទ្ធការពារទីក្រុងហ្កាហ្សា។ ក្រុមមន្ត្រីអ៉ីស្រាអែលបានវាយតម្លៃថាបច្ចុប្បន្ន ហាម៉ាសនៅសល់អ្នកប្រយុទ្ធ ២០០០០នាក់ ធៀបទៅនឹងជិត ៣៥០០០នាក់មុនសង្រ្គាមផ្ទុះឡើង។ ខណៈមួយចំនួននៃក្រុមអ្នកប្រយុទ្ធហាម៉ាសទាំងនេះមិនមានបទពិសោធន៍ និងជាអ្នកប្រយុទ្ធថ្មីថ្មោង ហាម៉ាសនៅតែមានបណ្ដាញ ផ្លូវរូងក្រោមដី និងលេណដ្ឋានដែលអាចឱ្យពួកគេធ្វើសង្រ្គាមឆ្លបប្រឆាំងកងទ័ពអ៉ីស្រាអែល។ ម្យ៉ាងវិញទៀត ផ្ទុយពីតំបន់ផ្សេងទៀតក្នុងតំបន់ហ្កាហ្សា ក្រុមហាម៉ាសនៅតែបន្តកាន់កាប់អាវុធ កម្រិតយោធាដូចជាកាំភ្លើងវែង ប្រព័ន្ធបាញ់គ្រាប់រ៉ុក្កែតលើស្មា និងគ្រាប់មីននៅក្នុងទីក្រុងហ្កាហ្សា។ ក្រុមហាម៉ាសក៏ត្រូវបានគេរំពឹងដែរថានឹងព្យាយាមចាប់ទាហានអ៉ីស្រាអែលជាចំណាប់ខ្មាំង ដើម្បីបង្កើនចំនួនចំណាប់ខ្មាំង ក្នុងដៃរបស់ខ្លួន។

គួរបញ្ជាក់ថា បណ្ដាប្រទេសជាមហាអំណាចពិភពលោកមួយចំនួន រួមទាំងប្រទេសក្នុងតំបន់មជ្ឈិមបូព៌ា បានថ្កោលទោសផែនការវាយកាន់កាប់ទីក្រុងហ្កាហ្សារបស់អ៉ីស្រាអែល ថាជាការអូសបន្លាយសង្រ្គាមដែលមានតែបង្កការឈឺចាប់ដល់ជនស៊ីវិលតែប៉ុណ្ណោះ និងធ្វើឱ្យវិបត្តិមនុស្សធម៌ ជាពិសេសគ្រោះអត់ឃ្លានកាន់តែយ៉ាប់យ៉ឺន។ សហរដ្ឋអាមេរិកវិញបាននិយាយថា ខ្លួនគាំទ្រផែនការយោធារបស់អ៉ីស្រាអែល តែបានទទួលស្គាល់ពីគ្រោះថ្នាក់នៃប្រតិបត្តិការវាយលុក ដោយក្នុងនោះឯកអគ្គរដ្ឋទូតអាមេរិកប្រចាំអ៉ីស្រាអែល លោក Mike Huckabee បានលើកឡើងថា «ផែនការរបស់អ៉ីស្រាអែលអាចនឹងមិនដំណើរការតាមការរំពឹងទុក។ ខ្ញុំគិតថាទាំងអស់គ្នាដឹងហើយថាវាមិនមានការធានាថាផែនការវាយលុកនេះនឹងដំណើរការ ដោយរលូននោះទេ»៕