(ភ្នំពេញ)៖ លោក ហេង រតនា ប្រតិភូរាជរដ្ឋាភិបាលទទួលបន្ទុកជា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC-ស៉ីម៉ាក់) បានពោលពាក្យខ្លីមួយថា «ពិភពលោកជឿជាក់លើការពិត» បន្ទាប់ពីរូបលោកចូលរួមក្នុងដំណើរទស្សនកិច្ច ស្វែងយល់សភាពការណ៍ពិតជាក់ស្តែង នៅខេត្តជាប់ព្រំដែនថៃ ដែលដឹកនាំដោយឧបនាយករដ្ឋមន្ត្រី​ ប្រាក់​ សុខុន​ រដ្ឋមន្ត្រីការបរទេស និងកិច្ចសហប្រតិបត្តិការអន្តរជាតិ ដោយមានការចូលរួមពីតំណាងឱ្យមន្ត្រីទូត៤២ប្រទេស និងអង្គការអន្តរជាតិចំនួន២២។

បើតាមការបញ្ជាក់របស់លោក ហេង រតនា នៅថ្ងៃសុក្រ​ ទី២២​ ខែសីហា​ ឆ្នាំ២០២៥ម្សិលមិញនេះ​ លោកបានចូលរួមអមដំណើរទស្សនកិច្ចជាក់ស្តែងនៅកន្លែង៖​ មាន​ការដាក់ខ្សែលួស​បន្លានៅភូមិជោគជ័យ​ ភូមិព្រៃចន្ទ​ ស្ថិតក្នុងខេត្តបន្ទាយមានជ័យ​ បន្តទៅវត្តតាមន្តសែន​ជ័យ​ និងទីតាំងគ្រាប់បែក MK-84​ ស្ថិតក្នុងខេត្តឧត្តរមានជ័យ។

សូមជម្រាបថា ក្រសួងការបរទេស និងសហប្រតិបត្តិការអន្តរជាតិ បានរៀបចំដំណើរទស្សនកិច្ចបែបនេះ ចំនួន៤លើកហើយ ជូនសមាជិកអង្គទូតបរទេស និងតំណាងទីភ្នាក់ងារអង្គការសហប្រជាជាតិ និងអង្គការមិនមែនរដ្ឋាភិបាលអន្តរជាតិ ក្នុងគោលបំណងស្វែងយល់ពីសភាពការណ៍ពិតប្រាកដ នៅតាមបណ្តោយព្រំដែនកម្ពុជា-ថៃ៕