(អូស្ត្រាលី)៖ តបតាមការអញ្ជើញរបស់លោក Francis Wong ប្រធានរៀបចំវេទិកាធុរកិច្ចអូស្ត្រាលី-អាស៊ាន លោកបណ្ឌិត កៅ គឹមហួន អគ្គលេខាធិការអាស៊ាន នឹងអញ្ជើញដឹកនាំគណៈប្រតិភូលេខាធិការដ្ឋានអាស៊ាន ទៅចូលរួម វេទិកាធុរកិច្ចអូស្ត្រាលី-អាស៊ានឆ្នាំ២០២៥ ដែលនឹងប្រព្រឹត្តទៅពីថ្ងៃទី ២៤ ដល់ ២៨ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី ដែលគាត់នឹងថ្លែងសន្ទរកថាគន្លឹះក្នុងពិធីបើកជាផ្លូវការនៃវេទិកានេះ។

នៅក្នុងអំឡុងពេលនៃទស្សនកិច្ចនេះ លោកបណ្ឌិត កៅ គឹមហួន គ្រោងជួបជាមួយតួអង្គពាក់ព័ន្ធសំខាន់ៗ រួមមាន លោក Peter Malinauskas នាយករដ្ឋមន្ត្រីអូស្ត្រាលីខាងត្បូង លោកស្រី Jane Lomax-Smith អភិបាលក្រុង Adelaide លោក Joe Szakacs រដ្ឋមន្ត្រីពាណិជ្ជកម្ម និងវិនិយោគអូស្ត្រាលីខាងត្បូង ព្រមទាំងជួបជាមួយ គណៈកម្មាធិការអាស៊ានប្រចាំទីក្រុងកង់បេរ៉ាផងដែរ។

បន្ថែមលើនេះ លោកអគ្គលេខាធិការអាស៊ាន ក៏នឹងជួបជាមួយតំណាងមកពីក្រុមប្រឹក្សាធុរកិច្ចអូស្ត្រាលី សភាពាណិជ្ជកម្ម និងឧស្សាហកម្មអូស្ត្រាលី ព្រមទាំងមជ្ឈមណ្ឌលអាស៊ាន-អូស្ត្រាលី។ ដើម្បីប្រាប់ពីសាច់រឿងរបស់អាស៊ាន ឯកឧត្តមអគ្គលេខាធិការអាស៊ាន នឹងធ្វើបាឋកថា ស្តីពី ការពង្រឹងទំនាក់ទំនងក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ៖ អាស៊ាន និងអូស្ត្រាលី នៅសាកលវិទ្យាល័យ Adelaide ផងដែរ។

ទស្សនកិច្ចរបស់លោកបណ្ឌិត កៅ គឹមហួន លើកនេះ សំដៅពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ រវាងអាស៊ាន និងអូស្ត្រាលី ដោយផ្តល់វេទិកាដើម្បីពង្រឹងពាណិជ្ជកម្ម និងការវិនិយោគ ព្រមទាំងរិះរកមធ្យោបាយថ្មីៗសម្រាប់កិច្ចសហប្រតិបត្តិការ និងសហការ ក្នុងគោលដៅជំរុញកំណើនប្រកបដោយចីរភាព និងបរិយាប័ន្ន នៅក្នុងតំបន់៕