(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក នៅព្រឹកថ្ងៃទី២៣ ខែសីហា ឆ្នាំ២០២៥នេះ បានដឹកនាំក្រុមការងារចុះបើកការដ្ឋានសាងសង់ផ្លូវបេតុងអាមេប្រវែង ៨២០ម៉ែត្រ មាន២ភូមិ គឺភូមិខ្លុយកើតប្រវែង ៣២០ម៉ែត្រ ទទឹង៦ម៉ែត្រ កម្រាស់បេតុង ០,២ម៉ែត្រ និងភូមិតាំងគោក ប្រវែង ៥០០ម៉ែត្រ ទទឹង ៥ម៉ែត្រ កម្រាស់មេតុង ០,១៥ម៉ែត្រ ប្រើប្រាស់ថវិកាមូលនិធិឃុំ ឆ្នាំ២០២៥។

នាឱកាសនោះលោក ហាក់ ម៉ុងហួត បានពាំនាំការផ្តាំផ្ញើរសួរសុខទុក្ខពីថ្នាក់ដឹកនាំគ្រប់លំដាប់ថា្នក់ដែលតែងតែគិតគូរពីការលំបាករបស់ប្រជាពលរដ្ឋនៅមូលដ្ឋាន លោកក៏បានកោតសរសើរដល់អាជ្ញាធរភូមិ ឃុំ ដែលបានអភិវឌ្ឍន៍នូវសមិទ្ធិផលថ្មីៗ ដែលតបតាមតម្រូវការជាក់ស្តែងរបស់ប្រជាពលរដ្ឋ ខណៈដែលសមិទ្ធិផលជាច្រើនដែលកើតឡើងបេីប្រៀបធៀប ក្នុងរយៈពេលកន្លងនេះ ក្នុងរបបប្រជាធិបតេយ្យ សេរីពហុបក្ស ក្នុងមូលដ្ឋាន ។

លោក ហាក់ ម៉ុងហួត បានបន្ថែមថា ផ្លូវបេតុងមួយខ្សែនេះ ដែលបានប្រើប្រាស់ថវិកាមូលនិធិឃុំឆ្នាំ២០២៥ តាមរយ:ការផ្តល់ជូនរបស់រាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមសំណូមពររបស់ប្រជាពលរដ្ឋ ហើយសមិទ្ធផលនេះមានគុណប្រយោជន៍ដល់ជីវភាពប្រចាំថ្ងៃរបស់ប្រជាពលរដ្ឋ ក្នុងការធ្វើដំណើរចេញចូល ឆ្លងកាត់ ដឹកទំនិញផលិតផល កសិផលផ្សេងៗទៅកាន់ទីផ្សារបានយ៉ាងងាយស្រួល។

លោក ហាក់ ម៉ុងហួត ក៏បានបានជំរុញ និងលើកទឹកចិត្តដល់ប្រជាពលរដ្ឋតាមបណ្តោយផ្លូវ បន្ទាប់ពីការសាងសង់ហើយត្រូវធ្វើរបង ទោះបីជាថ្ម ឬរបងធ្វើពីឈេីក្តីត្រូវមានគម្លាតពីសាច់បេតុង ដែលប្រធានការិយាល័យរៀបចំដែនដី នគររូបនីយកម្ម សំណង់ ភូមិបាល និងប្រធានការិយាល័យសេដ្ឋកិច្ច និងអភិវឌ្ឍន៍សហគមន៍ ជាមួយលោកមេឃុំ សហការគ្នាកំណត់គម្លាតពីផ្លូវបេតុងមក។

លោកបានបន្ថែមថា ការធ្វើដូចនេះក្នុងគោលបំណងដេីម្បឱ្យប្រជាពលរដ្ឋធ្វើរបងមានសោភ័ណភាព និងស្រស់ស្អាតមានដូចជា (១) ធ្វើឱ្យរត់ត្រង់ជួរគម្លាត ដេីម្បីមានសោភណភាពល្អ (២) ទុកសម្រាប់អភិវឌ្ឍធ្វេីលូរំដោះទឹកនៅពេលក្រោយ (៣) ដេីម្បីសម្រួលសុវត្ថិភាពក្នុងការធ្វេីចរាចរណ៍ (៤) ក្រោយធ្វើហេីយមានការដាំដេីមឈេីលម្អដេីមផ្កានៅតាមមុខផ្ទះឱ្យបានព្រមៗគ្នា ដេីម្បីការលេីកមុខមាត់ និងប្រែក្លាយជាភូមិស្អាតបៃតង៕