(ភ្នំពេញ)៖ លោកសាស្ត្រាចារ្យ ឈាង រ៉ា រដ្ឋមន្ត្រីសុខាភិបាល បានណែនាំដល់ថ្នាក់ដឹកនាំ និងបុគ្គលិក ក្រុមគ្រូពេទ្យ ត្រូវ
តម្កល់ខ្ពស់លើមតិចូលរួមស្ថាបនារបស់ប្រជាពលរដ្ឋ ដែលមកទទួលសេវា តាមរយៈប្រអប់សំបុត្រមតិយោបល់ និងQR code ដើម្បីខិតខំស្វែងយល់អំពីចំណុចដែលមិនទាន់ល្អប្រសើរ និងធ្វើការកែលម្អឱ្យបានទាន់ពេលវេលា ក្នុងការបង្កើនទំនុកចិត្តជូនដល់ប្រជាពលរដ្ឋកាន់តែខ្លាំងឡើង។

ការថ្លែងយ៉ាងដូច្នេះរបស់លោកសាស្ត្រាចារ្យរដ្ឋមន្ត្រីក្នុងឳកាសចុះពិនិត្យ និងផ្តល់ជូនដល់ថ្នាក់ដឹកនាំ មន្ត្រីរាជការ និងបុគ្គលិកសុខាភិបាលនៃមន្ទីរពេទ្យតេជោ កោះធំ អំពីវិធីសាស្រ្តនានាក្នុងការរៀបចំសេវាផ្សេងៗឱ្យបានកាន់តែរលូន ពិសេសសេវាសង្គ្រោះបន្ទាន់ សេវាសង្គ្រោះកម្រិតធ្ងន់ សេវាសម្រាល និងរូបភាពវេជ្ជសាស្ត្រជាដើម នាថ្ងៃទី២៣ ខែសីហា ឆ្នាំ២០២៥។

ទន្ទឹមនឹងនោះលោកសាស្រ្តាចារ្យ បានគូសរំលឹកបន្ថែម ដល់មន្ទីរពេទ្យត្រូវបង្កើនការយកចិត្តទុកដាក់ខ្ពស់ លើការ គោរពវិន័យការងារ ការបន្តពង្រឹងសមត្ថភាពទាំងភាពជាអ្នកដឹកនាំ ទាំងជំនាញបច្ចេកទេស ដោយចែករំលែកចំណេះដឹងនិងបទពិសោធន៍គ្នា ជាពិសេសប្រកាន់ខ្ជាប់នូវក្រមសីលធម៌វិជ្ជាជីវៈបម្រើសុខភាពជូនប្រជាពលរដ្ឋតាមតម្រូវការ។

បន្ទាប់ពីពិនិត្យ និងផ្តល់អនុសាសន៍ដល់មន្ត្រីក្រោមឳវាទលោកសាស្ត្រាចារ្យរដ្ឋមន្ត្រី បានបន្តសួរសុខទុក្ខប្រជាពលរដ្ឋដែលកំពុងសម្រាកព្យាបាលនៅមន្ទីរពេទ្យតេជោសែន កោះធំ និងសួរពីចំណាប់អារម្មណ៍បងប្អូនប្រជាពលរដ្ឋអំពីការបម្រើសេវារបស់មន្ទីរពេទ្យ ដែលប្រជាពលរដ្ឋបានបង្ហាញពីការរីករាយ ចំពោះការយកចិត្តទុកដាក់ ការរួសរាយរាក់ទាក់របស់គ្រូពេទ្យ រួមសំដីសំដៅនិងឥរិយាបថល្អ។ បន្ថែមលើនេះដែរ ប្រជាពលរដ្ឋមានការសប្បាយចិត្ត ដែលមានមន្ទីរពេទ្យធំស្អាតនៅជិតផ្ទះ ស្តង់ដាទំនើប ជាមួយគ្រូពេទ្យប្រកបដោយវិជ្ជាជីវៈ នៅទឹកដីស្រុកកោះធំ ខេត្តកណ្តាលនេះ។

ទោះបីជាមានការពេញចិត្តពេញថ្លើមពីប្រជាពលរដ្ឋក៏ដោយ ក៏លោកសាស្ត្រាចារ្យរដ្ឋមន្ត្រី បានលើកទឹកចិត្តដល់គ្រប់បុគ្គលិក និងថ្នាក់ដឹកនាំមន្ទីរពេទ្យ ត្រូវបង្កើនការប្រុងប្រយ័ត្នខ្ពស់លើបញ្ហាសុខភាពសាធារណៈ ដល់ប្រជាពលរដ្ឋក្នុងតំបន់ ដោយត្រូវរៀបចំសារអប់រំសុខភាព ពីជំងឺឆ្លង ជាពិសេសជំងឺគ្រុនឈាមក្នុងរដូវវស្សា ដើម្បីជួយឱ្យប្រជាពលរដ្ឋយល់ដឹងបានគ្រប់ជ្រុងជ្រោយពីវិធីការពារខ្លួន និងត្រូវបាញ់ថ្នាំសម្លាប់មូសឱ្យដល់កន្លែង ឬខ្នងផ្ទះប្រជាជន នៅតំបន់ណាមានជំងឺគ្រុនឈាមខ្ពស់។

សូមជម្រាបថា ក្នុងឳកាសចុះពិនិត្យវឌ្ឍនភាព និងការបម្រើសេវាជូនប្រជាពលរដ្ឋ នៅមន្ទីរពេទ្យតេជោសែនកោះធំខាងលើនេះ ក៏មានការចូលរួមពីថ្នាក់ដឹកនាំក្រសួងសុខាភិបាល មន្ទីរពេទ្យកាល់ម៉ែត មន្ទីរសុខាភិបាលខេត្តកណ្តាល និងក្រុមគ្រូពេទ្យជំនាញ អាជ្ញាធរមូលដ្ឋានស្រុកកោះធំផងដែរ៕