(កំពត)៖ លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត បានលើកឡើងថា ថវិការបស់មូលនិធិឃុំ សង្កាត់ គឺជាយុទ្ធសាស្ត្រស្នូលសំខាន់ សម្រាប់អភិវឌ្ឍមូលដ្ឋានក្រុង ស្រុក និងខេត្ត ឲ្យប្រសើរ ហើយបើអាជ្ញាធរចេះកៀរគរក្រុមហ៊ុនវិនិយោគ អង្គការដៃគូរបន្ថែម និងប្រើប្រាស់ថវិកាឲ្យចំគោលដៅប្រកបដោយប្រសិទ្ធភាពតាមការចាំបាច់នោះ គ្រប់មូលដ្ឋានទូទាំងខេត្តនឹងរីកចម្រើន។

លោកថ្លែងបែបនេះ នៅក្នុងពិធីបូកសរុបការងារប្រចាំឆមាសទី១ ឆ្នាំ២០២៥ និងលើកទិសដៅអនុវត្តបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តកំពត ដែលបានប្រព្រឹត្តធ្វើឡើងនៅសាលាខេត្តកំពត នាថ្ងៃទី២២ ខែសីហា ឆ្នាំ២០២៥។

លោកឧបនាយករដ្ឋមន្ត្រី សាយ សំអាល់ បានបន្តទៀតថា ដើម្បីសម្រេចបានតាមចក្ខុវិស័យអភិវឌ្ឍន៍ប្រទេសរបស់រាជរដ្ឋាភិបាល ពិសេសដើម្បីសម្រេចតាមផែនការ នៃយុទ្ធសាស្ត្របញ្ចកោណ ដំណាក់កាលទី១ ទាមទាឲ្យមានការចូលរួមសហការ សាមគ្គីគ្នាបំពេញការងារឲ្យបានល្អ ចាប់ពីរដ្ឋបាលមូលដ្ឋាន ដល់ថ្នាក់ខេត្ត។ ហតាមទស្សនៈ និងការដឹកនាំរបស់អស់លោក លោកស្រីថ្នាក់ យល់ឃើញថា គ្មានអ្វីក្រៅអំពីមូលនិធិឃុំ សង្កាត់ទេ ដែលអាចជួយអភិវឌ្ឍមូលដ្ឋានឲ្យបានប្រសើរនោះ។

លោកក៏បានស្នើសុំឲ្យអាជ្ញាធរឃុំ សង្កាត់នីមួយៗ ត្រូវមានផែនការឲ្យច្បាស់លាស់ ក្នុងការអភិវឌ្ឍន៍មូលដ្ឋានរបស់ខ្លួន ជាពិសេសត្រូវកៀរគរក្រុមហ៊ុនវិនិយោគ អង្គការដៃគូរផ្សេងៗបន្ថែម ដើម្បីធ្វើឲ្យហេដ្ឋានរចនាសម្ព័ន្ធផ្សេងៗ តាមមូលដ្ឋានមានភាពល្អប្រសើរ ។

លោកឧបនាយករដ្ឋមន្ត្រី ក៏បានបញ្ជាក់ប្រាប់អំពីគម្រោងជាច្រើនទៀត ដែលក្រុមការងាររាជរដ្ឋាភិបាល នឹងជួយដល់អាជ្ញាធរមូលដ្ឋាន លើវិស័យផ្សេងៗ ដើម្បីធ្វើឲ្យប្រសើរដល់ជីវភាពរបស់បងប្អូនប្រជាពលរដ្ឋ។ លោកក៏បានថ្លែងអំណរគុណ និងកោតសរសើរដល់ក្រុមការងាររាជរដ្ឋាភិបាល និងអាជ្ញាធរមូលដ្ឋានគ្រប់លំដាប់ថ្នាក់ នៅក្នុងខេត្តកំពត ដែលបានសហការ សាមគ្គីគ្នាបំពេញការងារសម្រេចបានលទ្ធផលល្អប្រសើរ គួរឲ្យកត់សម្គាល់ ហើយសូមបន្តខិតខំបន្ថែមទៀត។

សូមបញ្ជាក់ថា មូលនិធិឃុំ សង្កាត់ គឺជាកញ្ចប់ថវិកាមួយ ដែលរាជរដ្ឋាភិបាលកម្ពុជា ត្រូវផ្ទេរទៅឲ្យឃុំ សង្កាត់។ មូលនិធិនេះរួមមានចំណូល ពីចំណែកដ៏ជាក់លាក់ របស់ចំណូលចរន្តនៃថវិការដ្ឋប្រចាំឆ្នាំ និងពីការចូលរួមរបស់ដៃគូអភិវឌ្ឍន៍នានា៕