(ភ្នំពេញ)៖ លោក ង្វៀន មីញ ម៉ូ ឯកអគ្គរដ្ឋទូតវៀតណាមប្រចាំកម្ពុជា បានថ្លែងថា កម្ពុជា និងវៀតណាម ជាប្រទេសជិតខាងដែលមានភូមិផងរបងជាមួយគ្នា មានទន្លេមេគង្គរួមគ្នា មានទំនាក់ទំនងយ៉ាងជិតស្និទ្ធ តាំងពីយូរលង់ណាស់មកហើយ ដែលតែងតែចែករំលែកគ្នា ទាំងភាពផ្អែមល្ហែម ទាំងជូរចត់ តែងតែឈរប្រកៀកស្មាគ្នា និងជួយគ្នាទៅវិញទៅមក ក្នុងការតស៊ូទាមទារឯករាជ្យរបស់ប្រទេសនីមួយៗនាពេលកន្លងមក ក៏ដូចជាក្នុងដំណើរការកសាង និងអភិវឌ្ឍន៍ប្រទេសរហូតមកទល់សព្វថ្ងៃនេះ។ ការងថ្លែងបែបនេះរបស់លោក ឯកអគ្គរដ្ឋទូត បានធ្វើឡើងនៅក្នុងពិធីអបអរសាទរខួបអនុស្សាវរីយ៍ លើកទី៨០នៃទិវាបុណ្យឯករាជ្យជាតិវៀតណាម នាថ្ងៃទី២១ ខែសីហា ឆ្នាំ២០២៥កន្លងទៅ។

លោក ង្វៀន មីញ ម៉ូ បានថ្លែងបន្តថា៖ «ដោយមានការពូនជ្រំយ៉ាងយកចិត្តទុកដាក់ពីគ្រប់ជំនាន់ថ្នាក់ដឹកនាំ និងប្រជាជននៃប្រទេសទាំងពីរ ទំនាក់ទំនងរវាងវៀតណាម និងកម្ពុជាត្រូវបានលើកកម្ពស់ និងអភិវឌ្ឍន៍យ៉ាងខ្ជាប់ខ្ជួន ក្រោមបាវចនា «ភាពអ្នកជិតខាងល្អ មិត្តភាពប្រពៃណី កិច្ចសហប្រតិបត្តិការ លើគ្រប់ជ្រុងជ្រោយ និងស្ថិរភាពយូរអង្វែង» ដែលនាំមកនូវផលប្រយោជន៍ជាក់ស្តែង ជូនប្រជាជននៃប្រទេសទាំងពីរ។ នេះអាចបញ្ជាក់បានថា ទំនាក់ទំនងរវាងប្រទេស យើងទាំងពីរនាពេលនេះ មានភាពរីកចម្រើនលើគ្រប់វិស័យ ទាំងនយោបាយ សន្តិសុខការពារជាតិ សេដ្ឋកិច្ច ពាណិជ្ជកម្ម និងការវិនិយោគ សុខាភិបាល វប្បធម៌ អប់រំ វិទ្យាសាស្ត្រ និងបច្ចេកវិទ្យា និងការផ្លាស់ប្តូររវាងប្រជាជន និងប្រជាជន»។

បន្ថែមពីនេះឯកអគ្គរដ្ឋទូតវៀតណាមប្រចាំកម្ពុជា ក៏បានថ្លែងអំណរគុណយ៉ាងស្មោះស្ម័គ្រចំពោះ សម្តេចតេជោ ហ៊ុន សែន និងថ្នាក់ដឹកនាំកម្ពុជាផ្សេងទៀត ដែលបានខិតខំប្រឹងប្រែង និងយកចិត្តទុកដាក់ក្នុងការពង្រឹង និងលើកកម្ពស់ទំនាក់ទំនងរវាងវៀតណាម និងកម្ពុជា។ ដោយគិតត្រឹម ប៉ុន្មានខែដើមឆ្នាំនេះ សម្តេចតេជោ ហ៊ុន សែន បានទៅបំពេញទស្សនកិច្ច នៅប្រទេសវៀតណាមចំនួនពីរលើក ដើម្បីចូលរួមកិច្ចប្រជុំកំពូលវៀតណាម-កម្ពុជា (ខែកុម្ភៈ ២០២៥) និងខួបលើកទី៥០ នៃការរំដោះវៀតណាមខាងត្បូង (ថ្ងៃទី៣០ ខែមេសា ឆ្នាំ២០២៥) ហើយប៉ុន្មានថ្ងៃខាងមុខនេះ សម្តេចតេជោ នឹងអញ្ជើញទៅចូលរួមអបអរសាទរខួបលើកទី៨០ នៃទិវាបុណ្យឯករាជ្យជាតិ នៃសាធារណរដ្ឋសង្គមនិយមវៀតណាម នៅរដ្ឋធានីហាណូយ។ ហើយទើបតែកាលពីសប្តាហ៍មុនសម្តេចតេជោ ក៏បានធ្វើការសន្ទនាតាមទូរស័ព្ទជាមួយអគ្គលេខាធិការបក្សកុំម្មុយនីស្តវៀតណាម តូ ឡាំ ដើម្បីពិភាក្សាអំពីយន្តការនៃការលើកកម្ពស់ទំនាក់ទំនងទ្វេភាគីរវាងប្រទេសទាំងពីរផងដែរ។

លោក ង្វៀន មីញ ម៉ូ ឯកអគ្គរដ្ឋទូតវៀតណាមប្រចាំកម្ពុជា បានបង្ហាញការជឿជាក់ថា ជាមួយនឹងការប្តេជ្ញាចិត្តរបស់ភាគីទាំងពីរ ទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យ រវាងប្រទេសយើងទាំងពីរនឹងកាន់តែត្រូវបាន លើកកម្ពស់ដល់កម្រិតកំពូលថ្មីមួយទៀត ដើម្បីបំពេញសេចក្តីប្រាថ្នារបស់ប្រជាជននៃប្រទេសទាំងពីរ៕