(ពោធិ៍សាត់)៖ លោក ខូយ រីដា អភិបាលខេត្តពោធិ៍សាត់ នៅព្រឹកថ្ងៃទី២៣ ខែសីហា ឆ្នាំ២០២៥នេះ បានអញ្ជើញជាអធិបតីក្នុងពិធីបិទបវេសនកាល ប្រគល់រង្វាន់ជ័យលាភី និងចែកលិខិតសរសើរ ដល់សិស្សានុសិស្សដែលជាប់ចំណាត់ថ្នាក់លេខ១ ដល់លេខ៣ ប្រចាំឆ្នាំសិក្សា២០២៤-២០២៥ ដែលប្រារព្ធធ្វើឡើងនៅបរិវេណវិទ្យាល័យពោធិ៍សាត់ ដោយមានការចូលរួមពីអភិបាលរងខេត្ត អភិបាលស្រុកក្រុង តំណាងមន្ទីរអង្គភាពនានាក្នុងខេត្ត មាតាបិតា អាណាព្យាបាលសិស្សយ៉ាងច្រើន។

លោក ជា ឡេងឃួន នាយកវិទ្យាល័យពោធិ៍សាត់ បានលើកឡើងថា ឆ្នាំសិក្សា២០២៤-២០២៥ របស់សិស្សវិទ្យាល័យពោធិ៍សាត់ ជាប់ចំនួន១,៣៨០នាក់ ក្នុងនោះសិស្សឡើងថ្នាក់ទី១០ ជាប់ចំនួន៤៤៣នាក់ ថ្នាក់ទី១១ ផ្នែកវិទ្យាសាស្ត្រ ជាប់ចំនួន២៤៤នាក់ និងវិទ្យាសាស្ត្រសង្គម ចំនួន២៤៦នាក់ ថ្នាក់ទី១២ ផ្នែកវិទ្យាសាស្ត្រជាប់ជាបេក្ខជន ត្រូវប្រឡង ចំនួន២១០នាក់ និងផ្នែកវិទ្យាសាស្ត្រសង្គម ចំនួន២៤៧នាក់។ នៅចំពោះមុខនេះ សិស្សត្រូវបំប៉នបន្ថែមមុខវិជ្ជា គណិតវិទ្យា និងភាសារខ្មែរ ចំនួន២៧៨នាក់ ក្នុងនោះថ្នាក់ទី១០ មាន៣ថ្នាក់ សិស្ស១៦៦នាក់ និងថ្នាក់ទី១១ មាន២ថ្នាក់ សិស្ស ចំនួន១១២នាក់។

លោកនាយកបានបន្ដថា សិស្សវិទ្យាល័យ ទទួលបានពាន់រង្វាន់ស្តង់ដា សាលាគម្រូក្នុងឆ្នាំ២០២៣-២០២៤ ហើយសម្រាប់ឆ្នាំ២០២៥នេះ សិស្សវិទ្យាល័យពោធិ៍សាត់ ទទួលបានពាន់រង្វាន់មេដាយមាស លេខ១ ក្នុងកម្មវិធីយុវជន ជជែកដេញដោលថ្នាក់ជាតិ ដែលរៀបចំឡើង ដោយក្រសួងអប់រំ យុវជន និងកីឡា។

ក្នុងឱកាសនោះ លោក ខូយ រីដា បានសម្ដែងការកោតសរសើរចំពោះសាស្ត្រាចារ្យ បុគ្គលិកអប់រំ ក្មួយៗសិស្សានុសិស្ស មាតាបិតា និងអាណាព្យាបាលសិស្ស ដែលជានិច្ចជាកាលបានយកចិត្តទុកដាក់ខ្ពស់ ក្នុងការសិក្សារៀនសូត្រ និងចូលរួមឧបត្ថម្ភគាំទ្រ ទាំងសម្ភារៈ ថវិកា សំដៅលើកកម្ពស់វិស័យអប់រំជាតិ ឲ្យកាន់តែមានគុណភាព និងប្រសិទ្ធភាព ដើម្បីឆ្លើយតបទៅនឹងតម្រូវការ ក្នុងការកសាងមូលធនមនុស្ស ប្រកបដោយសមត្ថភាពពេញលេញ ទាំងវិជ្ជាសម្បទា បំណិនសម្បទា ចរិយាសម្បទា កាយសម្បទា និងគុណសម្បទា តាមរយៈកំណែទម្រង់សាលារៀនឆ្ពោះទៅឧត្តមភាព។

តាមរយៈរបាយការណ៍លទ្ធផលការងារអប់រំ របស់នាយកវិទ្យាល័យ នាពេលនេះ បង្ហាញឲ្យឃើញថា ពិតជាបានអនុវត្តកំណែទម្រង់ ការគ្រប់គ្រងសាលារៀន ស្របតាមការសម្រួចអាទិភាព នៃយុទ្ធសាស្ត្រកំណែទម្រង់វិស័យអប់រំ ឆ្នាំ២០២៤-២០២៨ ធានាឲ្យមានគុណភាព សមធម៌ និងបរិយាបន្ន ពោរពេញដោយចំណេះដឹង បំណិនវិន័យ សីលធម៌ និងឥរិយាបថល្អ ព្រមទាំងសុខភាពល្អ កាយសម្បទាមាំមួន និងការសិក្សាពេញមួយជីវិត។

លោកបន្ដថា ក្នុងអាណត្តិទី៧នេះ រាជរដ្ឋាភិបាលបានចាត់ទុកការអភិវឌ្ឍមូលធមមនុស្ស ជាអាទិភាពទី១ នៅក្នុងយុទ្ធសាស្ត្របញ្ចកោណ ដំណាក់កាលទី១ ដោយផ្ដោតលើការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា។ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្ដល់អនុសាសន៍គន្លឹះចំនួន៤គឺ៖

*ទី១៖ ការពង្រឹងអភិបាលកិច្ចសាលារៀន
*ទី២៖ ការពិនិត្យកែសម្រួល រៀបចំកម្មវិធីសិក្សា និងសកម្មភាពក្រៅម៉ោងសិក្សា ឲ្យស្របតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស
*ទី៣៖ ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភ និងការត្រួតពិនិត្យគុណភាពចំណីអាហារនៅតាមសាលារៀន
*ទី៤៖ ការជំរុញ និងលើកទឹកចិត្ត ការចូលរួមរបស់មាតាបិតា អ្នកអាណាព្យាបាលសិស្ស និងសហគមន៍ ក្នុងការអប់រំស្របតាមពាក្យស្លោក (ភាពជាដៃគូររដ្ឋ និងសហគមន៍ ដើម្បីការអប់រំ)។ អ្វីដែលសំខាន់ និងកិត្តិយសបំផុតនោះ គឺក្មួយៗជាយុវជនឆ្នើម ក្នុងការចូលរួមប្រកួតប្រជែង ជជែកដេញដោល ទទួលបានជ័យលាភី លេខ១ ទូទាំងប្រទេស គឺជាការយកចិត្តទុកដាក់ តស៊ូ និងសិក្សារៀនសូត្រ។

ជាមួយគ្នានោះ លោកបានអញ្ជើញប្រគល់លិខិត សរសើរដល់សិស្សជាប់ចំណាត់ថ្នាក់ ពីលេខ១ ដល់លេខ៣ ថ្នាក់ទី១០ ថ្នាក់ទី១១ និងថ្នាក់ទី១២ ចំនួន១៣៨នាក់ និងបានថវិកាចំនួន៤លានរៀលដល់វិទ្យាល័យនោះផងដែរ៕