(ឧត្តរមានជ័យ)៖ អ្នកឧកញ៉ា ឡាវ កាង សមាជិកក្រុមប្រឹក្សាភិបាល នៃសមាគមឧកញ៉ាកម្ពុជា និងជាតំណាងលោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា
នាព្រឹកថ្ងៃសៅរ៍ ទី២៣ ខែសីហា ឆ្នាំ២០២៥នេះ បានដឹកនាំគណៈប្រតិភូសមាគមឧកញ៉ាកម្ពុជា ដែលរួមមានវត្តមាន អ្នកឧកញ៉ា និងឧកញ៉ា ជាច្រើនរូបចុះសួរសុខទុក្ខ ក៏ដូចជានាំយកនូវអំណោយជាម៉ូតូចំនួន ៥គ្រឿង និងកង្ហារដើម្បីប្រគល់ជូនមន្ទីរពេទ្យកងពលថ្មើជើងលេខ៤២ ក្នុងខេត្តឧត្តរមានជ័យ សម្រាប់ប្រើប្រាស់តាមតម្រូវការព្រមទាំងបានប្រគល់ ជូនថវិកាមួយចំនួនដល់បុគ្គលិកសុខាភិបាល ដែលកំពុងបម្រើការនៅទីនោះផងដែរ។

ក្នុងឱកាសនេះដែរ អ្នកឧកញ៉ា ឡាវ កាង រួមទាំងគណៈប្រតិភូសមាគមឧកញ៉ាកម្ពុជា បានសម្តែងនូវអំណរគុណចំពោះថ្នាក់ដឹកនាំមន្ទីរពេទ្យទាំងអស់ ក៏ដូចជាក្រុមគ្រូពេទ្យ និងបុគ្គលិកសុខាភិបាលគ្រប់ផ្នែក ដែលបានកំពុងបំពេញនាទីជាកងទ័ពអាវស ជួរក្រោយដោយឈរលើសាមគ្គីភាពជាធ្លុងមួយ យកចិត្តទុកដាក់មិនរាថយបម្រើការថែទាំព្យាបាលអ្នកជំងឺ ជាពិសេសវីរកងទ័ពដែលបានរងរបួស ក្នុងសមរភូមិប្រយុទ្ធតទល់ និងបរទេសឈ្លានពានប្រកបដោយវិជ្ជាជីវៈខ្ពស់។

សូមបញ្ជាក់ថា នាសប្តាហ៍កន្លងមក ថ្នាក់ដឹកនាំ ក៏ដូចជាសមាជិក នៃសមាគមឧកញ៉ាកម្ពុជា ក៏បានចុះសួរសុខទុក្ខព្រមទាំងនាំយកនូវអំណោយជាថវិកា ជូនដល់វីរយុទ្ធជនដែលបានរងរបួស និងកំពុងសម្រាកព្យាបាលនៅមន្ទីរពេទ្យកងពលថ្មើជើងលេខ៤២ ក្នុងខេត្តឧត្តរមានជ័យនេះផងដែរ ហើយដោយបានមើលឃើញនូវការលំបាក និងកង្វះខាតសម្ភារៈ ទើបសមាគមបានសម្រេចផ្តល់ជូនបន្ថែមទៀតនូវម៉ូតូ និងកង្ហារនាពេលនេះតែម្តង៕