(ភ្នំពេញ)៖ លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា នាថ្ងៃទី២៣ ខែសីហា ឆ្នាំ២០២៥នេះ បានលើកឡើងថា កិច្ចសហការនាំចេញដំឡូងមីស្ងួតចំនួន ៥០​ម៉ឺនតោនពីកម្ពុជាទៅចិន បាន​ឆ្លុះបញ្ចាំងពីកិច្ចសហប្រតិបត្តិការពាណិជ្ជកម្មទ្វេភាគីកាន់តែជិតស្និទ្ធរវាងប្រទេសទាំងពីរ ខណៈ៧ខែឆ្នាំនេះ ភាគីទាំង២ សម្រេចបានទំហំពាណិជ្ជកម្មជា ង១១ពាន់លានដុល្លារ កើនឡើង២៦.១%។

​កាលលើកឡើងរបស់ លោក វ៉ាង វិនពីន ស្របពេលថ្មីៗនេះ ក្រសួងពាណិជ្ជកម្ម ជាមួយនិងក្រុមហ៊ុន COFCO Biotechnology Co., Ltd. ដែលជាក្រុមហ៊ុនរដ្ឋរបស់ចិន បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីនាំចេញដំឡូងមីស្ងួតចំនួន ៥០០ ០០០ តោនទៅកាន់ប្រទេសចិនសម្រាប់ឆ្នាំ២០២៥-២០២៦។​

លោក វ៉ាង វិនពីន មានប្រសាសន៍ថា​​ អនុស្សរណៈយោគយល់​ប្រកបដោយអត្ថន័យប្រវត្តិសាស្រ្តនេះ បង្កើតឡើងដោយឈរលើអនុស្សរណៈយោគយល់ដែលបានចុះហត្ថលេខាកាលពីខែមីនា ឆ្នាំ២០២៥ ក្នុងការនាំចេញចំនួន ២០ ម៉ឺនតោន។ នេះបានឆ្លុះបញ្ចាំងពីកិច្ចសហប្រតិបត្តិការពាណិជ្ជកម្មទ្វេភាគីកាន់តែជិតស្និទ្ធរវាងប្រទេសទាំងពីរ​។​

បើតាមលោក វ៉ាង វិនពីន​ មកទល់បច្ចុប្បន្ននេះ កសិផលកម្ពុជាចំនួន ១៦ មុខ ត្រូវបានអនុញ្ញាតឱ្យនាំចេញទៅកាន់ទីផ្សារប្រទេសចិន ក្នុងនោះរួមមាន អង្ករ ដំឡូងមីស្ងួត ពោត ចេក ស្វាយ មៀន ដូង ម្រេច គ្រាប់ស្វាយចន្ទី ល្ង គ្រាប់ជី កៅស៊ូ ជលផលធម្មជាតិ ជលផលចិញ្ចឹម មច្ឆា និងទុរេន ដែលបង្ហាញពីសន្ទុះដ៏រឹងមាំ និងសមិទ្ធផលផ្លែផ្កាគួរកត់សម្គាល់នៃកិច្ចសហប្រតិបត្តិការរវាងប្រទេសទាំងពីរ។
​
យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ការធ្វើពាណិជ្ជកម្មរវាងកម្ពុជានិងចិន ក្នុងរយៈពេល៧ខែ ឆ្នាំ២០២៧នេះ មានតម្លៃជាង ១១ពាន់លានដុល្លារ កើនឡើង២៦.១% បើធៀបនឹងរយៈពេលដូចគ្នា កាលពីឆ្នាំ២០២៤ ដែលមានតម្លៃ​ជាង៨,៧ពាន់លានដុល្លារ៕