(សៀមរាប)៖ លោក ជីវ ចាន់តារា ព្រះរាជអាជ្ញាអមសាលាដំបូងខេត្តកំពត អមដោយព្រះរាជអាជ្ញាររង និងលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការ​នគរបាលខេត្ត អមដោយស្នងការរង និងក្រុមការងារទាំងអស់ នៅថ្ងៃទី២៣ ខែសីហា ឆ្នាំ២០២៥ បានអញ្ជើញចុះសួរសុខទុក្ខ និងផ្តល់ជាអំណោយ ព្រមទាំងថវិកាមួយចំនួនជូនវីរកងទ័ព ដែលកំពុងសម្រាកព្យាបាលក្នុងមន្ទីរពេទ្យបង្អែកខេត្តសៀមរាប ក្រោមការយកចិត្តទុកដាក់ជាពិសេសពីសាស្ត្រាចារ្យ វេជ្ជបណ្ឌិតឯកទេសគ្រប់ជំនាញ និងថ្នាក់ដឹកនាំមន្ទីរពេទ្យ។

ទាំងលោកព្រះរាជអាជ្ញា និងលោកឧត្តមសេនីយ៍ស្នងការខេត្តកំពត បានសម្តែងនូវការកោតសរសើរ និងគោរពដឹងគុណដ៏ខ្ពង់ខ្ពស់ជ្រាលជ្រៅចំពោះវីរភាពកងទ័ព ដែលបានខិតខំការពារបូរណភាពទឹកដីនៅជួរមុខ ដោយភាពអង់អាច ក្លាហានជាទីបំផុត។

ពិសេសលោកបានគូសរម្លឹកថា «ការលះបង់ និងភាពក្លាហានរបស់បងប្អូនកងទ័ព គឺជានិមិត្តរូបនៃកម្លាំង និងឯកភាពជាតិកម្ពុជា ហើយប្រជាជាតិយើងទាំងមូលនៅជាមួយកងទ័ពយើងផងដែរ»។

ទន្ទឹមនឹងនោះលោកទាំង២ក៏បានផ្តាំផ្ញើការសួរសុខទុក្ខ ការនឹករលឹកដល់បងប្អូនកងទ័ពទាំងអស់ និងសូមជូនពរបានឆាប់ជាសះស្បើយ។

នៅក្នុងឱកាសនោះលោក ជីវ ចាន់តារា បានផ្តាំផ្ញើការសួរសុខទុក្ខពីលោកឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌ចំពោះវីរកងទ័ពយើងទាំងអស់ ដែលកំពុងសម្រាកព្យាបាលរបួសនៅតាមមន្ទីរពេទ្យ។

ដោយឡែក លោកឧត្តមសេនីយ៍ស្នងការខេត្តកំពត បានផ្តាំផ្ញើការសួរសុខទុក្ខពីលោកអភិសន្តិបណ្ឌិត ស សុខា ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ និងនាយឧត្តមសេនីយ៍ ស ថេត អគ្គស្នងការនគរបាលជាតិ ដែលបានគិតគូរជាប្រចាំ និងបានចាត់ឲ្យថ្នាក់ដឹកនាំអគ្គស្នងការដ្ឋានគរបាលជាតិ និងបណ្តាស្នងការនគរបាលរាជធានី-ខេត្ត ចុះសួរសុខទុក្ខវីរកងទ័ពដែលកំពុងព្យាបាលរបួសនៅតាមមន្ទីរពេទ្យ។

នៅក្នុងឱកាសនោះ លោកទាំង២ បានគូសបញ្ជាក់ថា ប្រជាជាតិខ្មែរគ្រប់មជ្ឈដ្ឋានទាំងក្នុង និងក្រៅស្រុកបានរួបរួមសាមគ្គីគ្នាយ៉ាងរឹងមាំក្នុងការគាំទ្រដល់យុទ្ធជនជរមុខ និងបង្ហាញរឿងដែលកំពុងកើតឡើងទៅកាន់ពិភពលោក ដើម្បីទាមទាររកសន្តិភាពដល់ប្រជាជនកម្ពុជាវិញ។

លោកសូមជូនពរវីរកងទ័ពទាំងអស់ដែលកំពុងសម្រាកព្យាបាល ឆាប់ជាសះស្បើយ។

ជាការគោរព និងស្ងប់ស្ងែងនោះ បងប្អូនវីរកងទ័ពទាំងអស់ សុទ្ធតែអះអាងថា ពេលជាពីរបួសភ្លាម ពួកគាត់នឹងវិលចូលសមរភូមិវិញភ្លាម ដោយប្តេជ្ញាការពារទឹកដី និងទប់ទល់ជាមួយទាហានថៃ ដោយមិនខ្លាចញញើតនោះឡើយ៕