(ព្រះវិហារ)៖ ម៉ូតូចំនួន១០គ្រឿង ដែលជាអំណោយរបស់លោក អ៊ុន ចាន់ដា អភិបាលខេត្តកំពង់ចាម និងម៉ូតូចំនួន៣គ្រឿងទៀត ព្រមទាំងសម្ភារៈ បរិក្ខា ម្ហូបអាហារ ជាច្រើនមុខ ត្រូវបានលោក រស់ វីរ៉េត មេឃុំអារក្សត្នោត ស្រុកស្ទឹងត្រង់ ខេត្តកំពង់ចាម ដឹកនាំក្រុមការងារ និងប្រជាពលរដ្ឋ ក៏ដូចជាបងប្អូនអាជីវករផ្សារបែកអន្លូង នាំមកប្រគល់ជូនវីរកងទ័ពជួរមុខ ក្នុងអង្គភាពកងពលតូចអន្តរាគមន៍លេខ៧ ចំណុះកងពលធំអន្តរាគមន៍លេខ៣ នារសៀលថ្ងៃទី២៣ ខែសីហា ឆ្នាំ២០២៥។

នៅក្នុងឱកាសនេះដែរលោក រស់ វីរ៉េត មេឃុំអារក្សត្នោត បានថ្លែងនាំនូវការផ្តាំផ្ញើសាកសួរសុខទុក្ខពីលោក អ៊ុន ចាន់ដា អភិបាលខេត្តកំពង់ចាម និងលោកអភិបាលស្រុកស្ទឹងត្រង់ ជូនចំពោះនាយទាហាន នាយទាហានរង និងពលទាហាន អង្គភាពកងពលតូចអន្តរាគមន៍លេខ៧ ជាមួយនឹងការថ្លែងនូវការកោតសរសើរចំពោះវីរភាពដ៍អង់អាចក្លាហានរបស់រវីរកងទ័ពយើង ក្នុងការលះបង់សព្វបែបយ៉ាងក្នុងបុព្វហេតុការពារទឹកដីតាមបន្ទាត់ព្រំដែន។

លោក រស់ វីរ៉េត បានថ្លែងប្រាប់នាយទាហាន នាយទាហានរង និងពលទាហាន កងពលតូចអន្តរាគមន៍លេខ៧ ពីការគិតគូរយកចិត្តទុកដាក់ជាប់ជានិច្ចពីលោក អ៊ុន ចាន់ដា អភិបាលខេត្តកំពង់ចាម ចំពោះសុខទុក្ខនិងការរស់នៅរបស់កងទ័ពយើង ជាក់ស្តែងថ្មីៗនេះលោកអភិបាលខេត្តកំពង់ចាម បានផ្តល់ម៉ូតូចំនួន១០០គ្រឿង ជូនអង្គភាពកងពលធំអន្តរាគមន៍លេខ៣ សម្រាប់បែងចែកជូនកងទ័ពដើម្បីជាប្រយោជន៍សម្រាប់ការប្រើប្រាស់ជាមធ្យោបាយដឹកជញ្ជូនផ្សេងៗ។

លោក រស់ វីរ៉េត ក៏បានថ្លែងអំណរគុណផងដែរ ដល់បងប្អូនប្រជាពលរដ្ឋឃុំអារក្សត្នោត និងបងប្អូនអាជីវករលក់ដូរក្នុងផ្សារបែកអន្លូងទាំងអស់ ដែលបានចូលរួមចំណែកជាមួយរដ្ឋបាលឃុំ ក្នុងឧបត្ថម្ភ ជាសម្ភារៈ ថវិកា ជូនដល់កងទ័ពជួរមុខ។លោកបញ្ជាក់ទៀតថា បើគ្មានការចូលរួមពីបងប្អូនប្រជាពលរដ្ឋ ពីបងប្អូនអាជីវករ នៅក្នុងឃុំអារក្សត្នោតទេ លោកក៏មិនអាចមានលទ្ធភាព ក្នុងការនាំអំណោយសម្ភារ ថវិកា ម្ហូបអាហារ ឧបតម្ភកងទ័ពជួរមុខ និងប្រជាពលរដ្ឋភៀសសឹកនៅខេត្តព្រះវិហារ រហូត៤លើកនោះទេ៕