(ស្វាយរៀង)៖ លោក ប៉េង​ ពោធិ៍សា​ អភិបាលខេត្តស្វាយរៀង​ នៅថ្ងៃទី២៣ ខែសីហា ឆ្នាំ២០២៥ បានអញ្ជេីញចុះសួរសុខទុក្ខ លោកវរសេនីយ៍ឯក ហ៊ុល វុទ្ធី កងវិស្វកម្មកងទ័ពជើងគោក វីរកងទ័ពជួរមុខប្រចាំនៅទិសប្រាសាទតាក្របី ដែលត្រូវផ្សែងពុលកាលពីថ្ងៃទី១៣ ខែសីហា ឆ្នាំ២០២៥ និងបានចូលសម្រាកព្យាបាលនៅមន្ទីរពេទ្យបង្អែកខេត្តសៀមរាប ដែលបច្ចុប្បន្នកំពុងសម្រាកនៅគេហដ្ឋាន ស្ថិតនៅក្នុងភូមិចុងព្រែក សង្កាត់ស្វាយរៀង ក្រុងស្វាយរៀង។

ការចុះសួរសុខទុក្ខនេះ មានការរួមមាន​ លោកអភិបាលរងខេត្ត​ លោក​ លោកស្រី​ ប្រធានមន្ទីរ​/អង្គភាពនានាក្នុងខេត្ត​ លោកអភិបាលក្រុងស្វាយរៀង​ លោកស្រីចៅសង្កាត់​ ព្រមទាំងអាជ្ញាធរជាច្រេីនរូបទៀត។

លោកអភិបាលខេត្ត បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះវីរកងទ័ពជួរមុខដ៏អង់អាចក្លាហាន ដែលបានខិតខំយកចិត្តទុកដាក់បំពេញតួនាទីភារកិច្ច ប្រកបដោយការទទួលខុសត្រូវ ក្នុងកិច្ចការរក្សាការពារបូរណភាពទឹកដី អធិបតេយ្យភាព និងធ្វើឲ្យសណ្តាប់ធ្នាប់នៅតាមព្រំដែន មានភាពល្អប្រសើរ ធានាបាននូវសន្តិសុខសុវត្ថិភាព ជូនប្រជាពលរដ្ឋ។

ក្នុងឱកាសនោះ លោកអភិបាលខេត្ត និងសហការី បាននាំមកនូវសម្ភារជាគ្រឿងឧបភោគ​ បរិភោគ​ និងថវិការបស់សម្តេចកិត្តិសង្គហបណ្ឌិត​ ម៉ែន​ សំអន​ ចំនួន១លានរៀល, ថវិការបស់រដ្ឋបាលខេត្តចំនួន១លានរៀល និងថវិការបស់មន្ទីរ/អង្គភាព ដែលបានចូលរួមដោយផ្ទាល់មួយចំនួនទៀតផងដែរ៕