(តាកែវ)៖ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ នាព្រឹកថ្ងៃទី២៣ ខែសីហា ឆ្នាំ២០២៥ បានអញ្ជើញជួបសំណេះសំណាលជាមួយពលករ ដែលវិលត្រឡប់មកពីប្រទេសថៃ ក្នុងភូមិសាស្រ្តស្រុកបូរីជលសារ ខេត្តតាកែវ សរុបប្រមាណ ៩៣៣នាក់។

ពិធីនេះមានការអញ្ជើញចូលរួមពី សមាជិក សមាជិកា ព្រឹទ្ធសភា រដ្ឋសភា អភិបាលនៃគណៈអភិបាលខេត្ត ប្រធាន អនុប្រធាន និងសមាសជិកក្រុមការងាររាជរដ្ឋាភិបាលចុះមូលដ្ឋានខេត្តតាកែវ ប្រធានអង្គភាពជុំវិញខេត្ត ព្រមទាំងអាជ្ញាធរពាក់ព័ន្ធគ្រប់លំដាប់ថ្នាក់ នៅសាលាស្រុកបូរីជលសារ ខេត្តតាកែវ។

ថ្លែងក្នុងពិធីសំណេះសំណាលនេះ រដ្ឋមន្ដ្រី ជា វ៉ាន់ដេត បានជម្រាបជូនបងប្អូនពលករ អំពីបច្ចុប្បន្នភាពពាក់ព័ន្ធនឹងការឈ្លានពានរបស់ថៃមកលើប្រទេសកម្ពុជា ព្រមទាំងបានពាំនាំនូវទឹកចិត្តស្រលាញ់ដ៏ស្មោះស្ម័គ្រ របស់សម្តេចតេជោនិងសម្តេចធិបតី ចំពោះបងប្អូនពលករយើងដែលធ្វើការនៅប្រទេសថៃ ហេតុដូច្នេះទើបសម្តេចទាំងទ្វេរអំពាវនាវឱ្យបងប្អូនយើងត្រឡប់មកកម្ពុជាយើងវិញ ក្នុងគោលដៅការពារសុវត្ថិភាពពីក្រុមជ្រុលនិយមនៅក្នុងប្រទេសថៃ។

ជាមួយគ្នានេះ រដ្ឋមន្រ្តី បានអំពាវនាវដល់បងប្អូនពលករយើង ស្វែងរកការងារនៅក្នុងប្រទេសយើងវិញ និងខិតខំរួមសាមគ្គីជាធ្លុងមួយ ជាមួយរាជរដ្ឋាភិបាល ដើម្បីកសាងសង្គមកម្ពុជាឱ្យបានរីកចម្រើនបន្តទៀត ហើយលោករដ្ឋមន្ត្រី បានណែនាំដល់ក្រុមការងារទាំងអស់ ស្រង់ឈ្មោះបងប្អូនពលករដែលមានជំនាញផ្សេងៗគ្នា ដើម្បីស្វែងរកការងារជូនពួកគាត់ផងដែរ៕