(ភ្នំពេញ)៖ សម្ដេចព្រះមហាសង្ឃរាជ បួរ គ្រី ព្រះប្រធានប៉ុស្តិ៍សុខភាពសម្ដេចព្រះរាជគ្រូ បួរ គ្រី ព្រះករុណព្រះមហាក្សត្រសីហមុនី បានមានព្រះបន្ទួលថា ប៉ុស្តិ៍សុខភាពនេះ បានផ្ដល់សេវាសុខាភិបាល មានការជួយពិនិត្យ និងព្យាបាលជំងឺដល់ប្រជាពលរដ្ឋ ដោយឥតគិតថ្លៃ ក្នុងមួយថ្ងៃៗរាប់សិបនាក់ ។

មានព្រះបន្ទួលសម្ដេចព្រះមហាសង្ឃរាជ គឺក្នុងពិធីបុណ្យផ្កាប្រាក់មហាសាមគ្គី ឆ្លងជណ្ដើរ និងឆ្លងរថយន្តសង្គ្រោះ របស់ប៉ុស្តិ៍សុខភាពសម្ដេចព្រះរាជគ្រូ បួរ គ្រី ព្រះករុណព្រះមហាក្សត្រសីហមុនី នៅថ្ងៃទី២៣ ខែសីហា ឆ្នាំ២០២៥ ដែលមានការអញ្ជើញចូលរួមពីរដ្ឋលេលខាធិការប្រចាំការក្រសួងសុខាភិបាល ក្រសួងការពារជាតិ និងក្រសួងធម្មការ និងសាសនា រួមទាំងមន្ត្រីក្រសួងស្ថាប័នជាច្រើនទៀត និងមានការចូលរួមពីពុទ្ធបរិស័ទ មានព្រះសង្ឃ ដូនជី តាជី ឧបាសក ឧបាសិកា យុវជន និងសិស្សិនិស្សិតផងដែរ ។

ក្នុងឱកាសនោះ សម្ដេចព្រះមហាសង្ឃរាជ បួរ គ្រី មានព្រះបន្ទួលថា វិស័យសុខាភិបាល ជាវិស័យមានអទិភាពមួយ របស់រាជរដ្ឋាភិបាលកម្ពុជា ក្នុងការលើកកម្ពស់សុខុមាលភាព របស់ប្រជាពលរដ្ឋ ឲ្យមានសុខភាពល្អ ។

សម្ដេចព្រះមហាសង្ឃរាជ មានព្រះបន្ទួលបន្តថា ការបង្កើតឲ្យមានប៉ុស្តិ៍ភាពនេះ គឺជាចំណែកមួយបន្ថែមទៀត ដើម្បីចូលរួមជាមួយរាជរដ្ឋាភិបាល បន្ទាប់ពីវិស័យអប់រំ ក្នុងនោះគឺពុទ្ធិកៈសាកលវិទ្យាល័យព្រះសីហមុនីរាជា ដែលបាននិងកំពុងបង្រៀនសមណនិស្សិត និងនិស្សិតរាប់ពាន់អង្គ/នាក់ ។

សម្ដេចព្រះប្រធាន មានព្រះបន្ទួលបន្ថែមថា ប៉ុស្តិ៍សុខភាពសម្ដេចព្រះរាជគ្រូ បួរ គ្រី ព្រះករុណព្រះមហាក្សត្រសីហមុនី ក្នុងមួយថ្ងៃៗមានប្រជាពលរដ្ឋ បានទៅទទួលសេវាសុខាភិបាល ប្រមាណជាង៥០នាក់ ជាមួយនឹងមានរថយន្តសង្គ្រោះបន្ទាន់ សម្រាប់ដឹកអ្នកជំងឺដោយឥតគិតថ្លៃផងដែរ ។ មិនត្រឹមប៉ុណ្ណោះ ប៉ុស្តិ៍សុខភាពនេះ ក៏បានជួយព្យាបាលជំងឺដល់សមណ និងនិស្សិតដែលមានជីវភាពខ្វះខាត ដើម្បីជួយកាត់បន្ថយការចំណាយ ហើយសម្រាប់ការពិនិត្យ និងព្យាបាលជំងឺនេះ គឺជួយគ្រប់ជាតិសាសន៍ មិនរើសអើងសាសនា និងនិន្នាការអ្វីឡើយ ។

ជាមួយនេះ សម្ដេចព្រះមហាសង្ឃរាជ បួរ គ្រី បានបន្ទួលថ្លែងនូវអំណរព្រះគុណ ចំពោះសម្ដេច ឯកឧត្តម លោកជំទាវ ឧកញ៉ា និងពុទ្ធបរិស័ទទាំងអស់ ដែលបានបរិច្ចាកថវិកា ដើម្បីទ្រទ្រង់ ប៉ុស្តិ៍សុខភាពសម្ដេចព្រះរាជគ្រូ បួរ គ្រី ព្រះករុណព្រះមហាក្សត្រសីហមុនី ឲ្យដំណើរការរលូនទៅ ដើម្បីជួយសង្គ្រោះអាយុជីវិតប្រជាពលរដ្ឋ ។

គួរបញ្ជាក់ថា រថយន្តសង្គ្រោះបន្ទាន់ នៅក្នុងប៉ុស្តិ៍សុខភាពសម្ដេចព្រះរាជគ្រូ បួរ គ្រី ព្រះករុណព្រះមហាក្សត្រសីហមុនី គឺមួយគ្រឿងជាអំណោយរបស់ឯកឧត្តម យឹម លាង អគ្គស្នងការរងនគរបាលជាតិ និងមួយគ្រឿងទៀត អំណោយរបស់លោកជំទាវឧកញ៉ា ទាវ ប៊ុនចិន្ដា និងស្វាមី ព្រមទាំងញាតិ្តព្រះធម៌សម្រាប់សម្រួលដឹកជញ្ជូនអ្នកជំងឺ ឬដឹកជញ្ជូនសាកសព ដែលគ្មានលទ្ធភាព ឬមានជីវភាពខ្វះខាត ។ ពលរដ្ឋទាំងអស់ ដែលរស់នៅក្នុងភូមិសាស្រ្តសង្កាត់ទន្លេបាសាក់ ខណ្ឌចំការមន និងមកពីទីជិតឆ្ងាយនានា អាចទាក់ទងតាមលេខទូរស័ព្ទ 016434325 /070 406 668 ដើម្បីទទួលបានសេវានេះ ។

គួរំលឹកជូនថា៖ប៉ុស្តិ៍សុខភាពសម្តេចព្រះរាជគ្រូ បួរ គ្រី ព្រះករុណា ព្រះមហាក្សត្រសីហមុនី ទទួលបានការប្រោសប្រទានព្រះរាជនាមដ៏ថ្លៃថ្លាបំផុតពីព្រះករុណា ព្រះមហាក្សត្ស នៃព្រះរាជាណាចក្រកម្ពុជា និងក្រោមព្រះរាជកិច្ច ដឹកនាំស្ថាបនិកដោយផ្ទាល់សម្តេចព្រះមហាសង្ឃរាជ បួរ គ្រី ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា និងជាព្រះប្រធានប៉ុស្តិ៍សុខភាព ដោយទឹកព្រះទ័យមេត្តា សតិបញ្ញា និងគុណធម៌ដ៏ថ្លៃថ្លាជាទីបំផុត ប្រកបដោយចក្ខុវិស័យវែងឆ្ងាយផែនការយុទ្ធសាស្ត្រគ្រប់ជ្រុងជ្រោយ បេសកកម្មដ៏ស្វាហាប់ ក្នុងការលើកកម្ពស់វិស័យអប់រំ និងសុខភាពសាធារណៈ ដើម្បីលើកតម្កើងនូវឧត្តមភាពជាតិ សាសនា ព្រះមហាក្សត្រ ក្នុងម្លប់តេជោសន្តិភាព វឌ្ឍនភាព ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា៕