(ភ្នំពេញ)៖ លោក ហួត ហាក់ រដ្ឋមន្រ្តីក្រសួងទេសចរណ៍ បានអនុញ្ញាតជូន លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងលោក សោម វិសាល ឯកអគ្គរាជទូតកម្ពុជាប្រចាំនៅសាធារណរដ្ឋអារ៉ាប់អេហ្ស៊ីប ប្រទេសអារ៉ាប៊ីសាអូឌីត ព្រះរាជាណាចក្រម៉ារ៉ុក សាធារណរដ្ឋប្រជាធិបតេយ្យប្រជាមានិតអាល់ហ្សេរី សាធារណរដ្ឋប្រជាធិបតេយ្យសហព័ន្ធអេត្យូពី សហភាពអាហ្វ្រិក និងប្រទេសអូម៉ង់ ដែលមាននិវេសនដ្ឋាននៅរដ្ឋធានីគែរ នៃសាធារណរដ្ឋអារ៉ាប់អេហ្ស៊ីប ចូលជួបសម្តែងការគួរសម និងស្នើសុំអនុសាសន៍ដ៏ខ្ពង់ខ្ពស់លើ ការជំរុញផ្សព្វផ្សាយសក្តានុពលទេសចរណ៍ និងកាលានុវត្តភាពវិនិយោគក្នុងវិស័យទេសចរណ៍របស់ប្រទេសកម្ពុជា ព្រមទាំងទទួលបាននូវព័ត៌មានសំខាន់ៗ ទាក់ទងនឹងផែនការជាតិទេសចរណ៍ និងស្ថិតិទេសចរណ៍ នៅថ្ងៃទី២២ ខែសីហា ឆ្នាំ២០២៥ នាទីស្តីការក្រសួង។

ក្នុងឱកាសជំនួបដ៏មានសារៈសំខាន់ និងប្រកបដោយផ្លែផ្កា រដ្ឋមន្រ្តី ហួត ហាក់ បានថ្លែងអំណរគុណដ៏ជ្រាលជ្រៅជូនចំពោះ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលតែងតែផ្តល់ការគាំទ្រ និងកិច្ចសហការដ៏ជិតស្និទ្ធិ ដល់ក្រសួងទេសចរណ៍ ដើម្បីអាចផ្សព្វផ្សាយសក្តានុពលទេសចរណ៍បានគ្រប់ទិសទី តាមរយៈស្ថានឯកអគ្គរាជទូត, តំណាងស្ថានបេសកកម្មអចិន្រ្តៃយ៍ និងស្ថានកុងស៊ុលកម្ពុជានៅបរទេស។

ទន្ទឹមនេះ រដ្ឋមន្រ្តី ហួត ហាក់ បានស្នើលោកឯកអគ្គរាជទូតដែលអញ្ជើញទៅបំពេញបេសកកម្មការទូតខាងមុខ ជួយបន្តផ្សព្វផ្សាយសក្តានុពល និងកាលានុវត្តភាពវិនិយោគក្នុងវិស័យទេសចរណ៍ដែលកំពុងដែលកើនឡើងជាបន្តបន្ទាប់ ជាពិសេសគឺកត្តាសុខសន្តិភាព ការធានាសុវត្ថិភាពដល់ភ្ញៀវទេសចរ ព្រមទាំងសូមចូលរួមប្រឆាំងជាមួយនឹងព័ត៌មានក្លែងក្លាយដែលជះផលអវិជ្ជមានដល់កិត្តិសព្ទ និងទេសចរណ៍កម្ពុជា។

ឆ្លៀតក្នុងឱកាសនេះ លោករដ្ឋមន្រ្តី បានជូនពរដល់ លោកឯកអគ្គរាជទូតទាំងពីររូប មានសុខភាពល្អ អាយុយឺនយូរ ជោគជ័យក្នុងបេសកកម្មការទូតដ៏ឧត្តុង្គឧត្តម ព្រមទាំងធ្វើដំណើរប្រកបដោយសុខសុវត្ថិភាព៕