(ភ្នំពេញ)៖ នាថ្ងៃទី២៣ ខែសីហា ឆ្នាំ២០២៥ ឧកញ៉ា ទាវ ប៊ុនចិន្តា ព្រមទាំងមិត្តព្រះធម៌មានសទ្ធាជ្រះថ្លាថ្វាយរថយន្តសង្រ្គោះដល់សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាក្រកម្ពុជា ជាព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា និង ជាព្រះប្រធានប៉ុស្តិ៍សុខភាពសម្តេចព្រះរាជគ្រូ បួរ គ្រី ព្រះករុណាព្រះមហាក្សត្រ សីហមុនី ដើម្បីទុកប្រើប្រាស់បម្រើសេវាដឹកអ្នកជំងឺ២៥ខេត្ត/ក្រុង(ដោយឥតគិតថវិកា)ប្រចាំនៅប៉ុស្តិ៍សុខភាពសម្តេចព្រះរាជគ្រូ បួរ គ្រី ព្រះករុណាព្រះមហាក្សត្រ សីហមុនី។

សូមជម្រាបជូនថា ឧកញ៉ា ទាវ ប៊ុនចិន្តា តែងតែដង្ហែររាល់សកម្មភាពនាតាមព្រះរាជសកម្មភាពផ្សេងៗ ហើយថ្មីៗនេះលោកស្រីឧកញ៉ា ទាវ ប៊ុនចិន្តាបានអមព្រះរាជដំណើរសម្តេចព្រះមហាសង្ឃរាជ បួរ គ្រី យាងសួរសុខទុក្ខ និងប្រទានថវិកា ថ្នាំពេទ្យ គ្រឿងបរិភោគដល់កងទ័ព និងជនភៀសសឹក នៅភូមិសាស្រ្តនា ខេត្តឧត្តរមានជ័យផងដែរ។

ប៉ុស្តិ៍សុខភាពសម្តេចព្រះរាជគ្រូ បួរ គ្រី ព្រះករុណា ព្រះមហាក្សត្រសីហមុនី ទទួលបានការប្រោសប្រទានព្រះរាជនាមដ៏ថ្លៃថ្លាបំផុតពីព្រះករុណា ព្រះមហាក្សត្ស នៃព្រះរាជាណាចក្រកម្ពុជា និងក្រោមព្រះរាជកិច្ច ដឹកនាំស្ថាបនិកដោយផ្ទាល់សម្តេចព្រះមហាសង្ឃរាជ បួរ គ្រី ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា និងជាព្រះប្រធានប៉ុស្តិ៍សុខភាព ដោយទឹកព្រះទ័យមេត្តា សតិបញ្ញា និងគុណធម៌ដ៏ថ្លៃថ្លាជាទីបំផុត ប្រកបដោយចក្ខុវិស័យវែងឆ្ងាយផែនការយុទ្ធសាស្ត្រគ្រប់ជ្រុងជ្រោយ បេសកកម្មដ៏ស្វាហាប់ ក្នុងការលើកកម្ពស់វិស័យអប់រំ និងសុខភាពសាធារណៈ ដើម្បីលើកតម្កើងនូវឧត្តមភាពជាតិ សាសនា ព្រះមហាក្សត្រ ក្នុងម្លប់តេជោសន្តិភាព វឌ្ឍនភាព ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា៕