(ភ្នំពេញ)៖ ផ្នែកក្រសួង-ស្ថាប័ន នៃយុវជនគណបក្សថ្នាក់កណ្តាល បានរៀបចំកិច្ចប្រជុំជាមួយយុវជនគណបក្សក្រសួង ស្ថាប័នចំនួន១៥ (ក្រុមក្រសួង ស្ថាប័នទី៣) ដើម្បីពិនិត្យវឌ្ឍនភាពការងារប្រចាំឆមាសទី១ ឆ្នាំ២០២៥ ក្រោមអធិបតីភាព លោក ឃុត ចាន់ដារ៉ា សមាជិកគណៈកម្មាធិការកណ្តាល សមាជិកគណៈអចិន្ត្រៃយ៍យុវជនគណបក្សថ្នាក់កណ្តាល និងជាប្រធានផ្នែកក្រសួង-ស្ថាប័ន នៃយុវជនគណបក្សថ្នាក់កណ្តាល។

កិច្ចប្រជុំនេះ បានធ្វើឡើងនៅព្រឹកថ្ងៃទី២៣ ខែសីហា ឆ្នាំ២០២៥ ដោយអញ្ជើញចូលរួមពីអនុប្រធានប្រចាំការ អនុប្រធាន ផ្នែកក្រសួង-ស្ថាប័ន, ប្រធាន អនុប្រធានប្រចាំការ និងតំណាង យុវជនគណបក្សនៃក្រសួង ស្ថាប័នទាំង១៥។

បន្ទាប់ពីការគោរពវិញ្ញាណក្ខន្ធវីរកងទ័ពខ្មែរ ដែលបានពលីជីវិត ក្នុងបុព្វហេតុការពារជាតិមាតុភូមិ ការពារបូរណភាពទឹកដី ពីការឈ្លានពានដោយកងទ័ពថៃ លោក ឃុត ចាន់ដារ៉ា បានបញ្ជាក់ជូនអង្គប្រជុំអំពីគោលបំណងនៃកិច្ចប្រជុំ គឺឆ្លើយតបនឹងស្មារតីកិច្ចប្រជុំពិភាក្សារវាងផ្នែកក្រសួង-ស្ថាប័ននិងយុវជនគណបក្សក្រសួង ស្ថាប័ននាពេលកន្លងទៅ និងអនុវត្តតាមគោលការណ៍ណែនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សប្រជាជនកម្ពុជាថ្នាក់កណ្តាល ដើម្បីបន្តពង្រឹងប្រសិទ្ធភាពការងារ ក្តាប់បាននូវសំណូមពរ បញ្ហាប្រឈម កំណត់ទិសដៅការងារ តម្រង់ទិសការងារយុវជនគណបក្ស និងចែករំលែកបទពិសោធន៍គ្នាទៅវិញទៅមក អំពីការងារនយាបាយ សតិអារម្មរណ៍ ការចាត់តាំង សំដៅថែរក្សា និងពូនជ្រំសមាជិក សមាជិកាទាំងអស់នូវស្មារតី សតិអារម្មណ៍ និងចំណេះដឹង ដោយក្តាប់ឲ្យជាប់នូវគោលនយោបាយ សេចក្តីសម្រេចចិត្តនានា ជឿជាក់ និងហ៊ានការពារមាគ៌ាដឹកនាំដ៏ត្រឹមត្រូវរបស់គណបក្សប្រជាជនកម្ពុជា។

អង្គប្រជុំបានស្តាប់ដោយយកចិត្តទុកដាក់ចំពោះរបាយការណ៍សង្ខេបរបស់លោក ហាវ រតនៈ អនុប្រធានប្រចាំការ ផ្នែកក្រសួង-ស្ថាប័ន នៃយុវជនគណបក្សថ្នាក់កណ្តាល និងជាប្រធានក្រុមក្រសួង-ស្ថាប័នទី៣ ស្តីពីវឌ្ឍនភាពការងាររបស់យុវជនគណបក្សក្រសួង-ស្ថាប័ន នៃក្រុមទី៣ ក្នុង ឆមាសទី១ ឆ្នាំ២០២៥ និងទិសដៅការងារបន្ត ព្រមទាំងការលើកឡើងពីចំណុចខ្វះខាតនិងសំណូមពរមួយចំនួនជូនអង្គប្រជុំពិនិត្យ ពិភាក្សា និងមានមតិចូលរួម ដើម្បីចូលរួមដោះស្រាយឱ្យកាន់តែល្អប្រសើរបន្ថែមទៀត។

បន្ទាប់មកមានមតិយោបល់ចូលរួមយ៉ាងផុសផុលពីសំណាក់ប្រធាន អនុប្រធានប្រចាំការ និងតំណាងប្រធានយុវជនគណបក្សក្រសួង ស្ថាប័ន លោក ឃុត ចាន់ដារ៉ា ប្រធានផ្នែកក្រសួង-ស្ថាប័ន បានថ្លែងការកោតសរសើរ​ចំពោះយុវជនគណបក្សក្រសួង ស្ថាប័ន ដែលតែងសហការ និងចូលរួមជាមួយផ្នែកជាបន្តបន្ទាប់ និងលើកទឹកចិត្តដល់យុវជនគណបក្សក្រសួង ស្ថាប័ន បន្តយកចិត្តទុកដាក់លើការងារអាទិភាព រួមមាន៖ បន្តរៀបចំរចនាសម័្ពន្ធអង្គការចាត់តាំងយុវជនគណបក្សឲ្យរឹងមាំ, ធ្វើបច្ចុប្បន្នភាពសមាជិក សមាជិកាបក្ស និងរៀបចំវគ្គបណ្តះបណ្តាល, ចូលរួមប្រើប្រាស់ប្រព័ន្ធគ្រប់គ្រងទិន្នន័យសមាជិកបក្ស, បន្តជំរុញការងារបណ្តាញផ្សព្វផ្សាយសង្គម, បន្តផ្សព្វផ្សាយសមិទ្ធផលរបស់ក្រសួង ស្ថាប័ន នៅលើបណ្តាញសង្គម, កែសម្រួលអ្វីដែលនៅខ្វះចន្លោះ និងបន្តយកចិត្តទុកដាក់លើការងារយុវជនគណបក្សបន្ថែមទៀត៕