(ភ្នំពេញ)៖ ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថាន ដឹកនាំដោយ​លោក អ៊ុង វុទ្ធី អនុប្រធាននាយកដ្ឋាន កាលពីថ្ងៃទី២២ ខែសីហា ឆ្នាំ២០២៥ បានចុះ​ត្រួត​ពិនិត្យការបំពុលបរិស្ថាន បង្កឡើងដោយសិប្បកម្មផលិតគ្រឿងសង្ហារឹម​សម្រាប់បុរី​របស់ក្រុមហ៊ុន ប៉េង ហួត នៅក្នុងខណ្ឌច្បារអំពៅ រាជធានីភ្នំពេញ។

ក្រុមការងារបានពិនិត្យឃើញថា សិប្បកម្មផលិត កាត់ម៉ាប និងជ្រៀកភ្លី នៅទីតាំងខាង​ក្រៅអគារ ក្បែរនឹងផ្ទះប្រជាពលរដ្ឋ ដែលប៉ះពាល់ដល់បរិស្ថាន និងការរស់នៅរបស់​ប្រជា​​ពលរដ្ឋ។ ជាមួយគ្នានេះ ក្រុមការងារបានពិនិត្យឃើញថា សិប្បកម្មមិនបាន​រៀប​ចំ​​​កិច្ចសន្យាការពារបរិស្ថាន និងលិខិតអនុញ្ញាតបញ្ចេញសំណល់ពាក់ព័ន្ធនៅ​ឡើយ​ទេ។

ក្រសួងបរិស្ថានបានដាក់ចេញវិធានការច្បាប់ចំពោះសិប្បកម្មផលិតគ្រឿងសង្ហារឹម ខាងលើរួមមាន៖
១៖ សិប្បកម្មត្រូវបញ្ឈប់ជាបន្ទាន់នូវសកម្មភាពកាត់ម៉ាប និងជ្រៀកភ្លី នៅទីតាំងខាងក្រៅអគារ។
២៖ សិប្បកម្មត្រូវទទួងរងពិន័យអន្ដរការណ៍ ចំពោះសកម្មភាពលើ្មស​ទៅនឹង​មាត្រា១៧៣ មាត្រា៦៦៨ នៃក្រមបរិស្ថាននិងធនធានធម្មជាតិ។
៣៖ សិប្បកម្មត្រូវរៀបចំកិច្ចសន្យាការពារបរិស្ថាន និងលិខិតអនុញ្ញាត​បញ្ចេញ​សំណល់ពាក់ព័ន្ធនឹងក្រសួងបរិស្ថាន។
៤៖ សិប្បកម្មត្រូវរៀបចំកន្លែងទុកដាក់សំណល់ឱ្យបានត្រឹមត្រូវ និងដឹកជញ្ជូនយកទៅ​ចោល​នៅទីលានទុកដាក់សំណល់ ដោយក្រុមហ៊ុនដឹកជញ្ជូនដែលមានលិខិត​បញ្ជាក់​ពីក្រសួងបរិស្ថាន៕