(បាត់ដំបង)៖ នាព្រឹកថ្ងៃអាទិត្យ ទី២៤ ខែសីហា ឆ្នាំ២០២៥នេះ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងសហការីក្រសួង បានជួបសួរសុខទុក្ខ និងនាំយកអំណោយដ៏ថ្លៃថ្លារបស់ សម្តេចមហាបវរធិបតីនាយករដ្ឋមន្ដ្រី និងលោកជំទាវបណ្ឌិត ជូនដល់នាយទាហាន នាយទាហានរង និងពលទាហាន នៃកងពលតូចថ្មើរជើងលេខ៥២ ព្រមទាំងក្រុមគ្រួសារកងទ័ព ដែលបានចងជាសម្ព័ន្ធមេត្រីជាមួយក្រសួង ស្ថិតក្នុងស្រុករតនមណ្ឌល ខេត្តបាត់ដំបង។

បន្ទាប់ពីសុន្ទរកថាស្វាគមន៍ និងសំណូមពររបស់ លោកឧត្តមសេនីយ៍ត្រី គុជ នាង មេបញ្ជាការកងពលតូចថ្មើជើងលេខ៥២ អំពីតួនាទី ភារកិច្ច និងការប្ដេជ្ញាចិត្តរបស់កងទ័ពរួចមក លោក ឆាយ ឫទ្ធិសែន បានសម្ដែងនូវការកោតសរសើរ និងវាយតម្លៃខ្ពស់ ព្រមទាំងបានសម្ដែងនូវការដឹងគុណចំពោះនាយទាហាន នាយទាហានរង និងពលទាហាន នៃកងពលតូចថ្មើជើងលេខ៥២ ដែលតែងតែតស៊ូមិនរាថយ និងធ្វើពលីកម្មគ្រប់បែបយ៉ាងក្នុងបុព្វហេតុការពារអធិបតេយ្យភាព និងបូរណភាពទឹកដី ក៏ដូចជាការពារសុខសន្តិភាពជូនជាតិ មាតុភូមិ។ ជាមួយគ្នានោះ លោករដ្ឋមន្ដ្រី បានពាំនាំនូវប្រសាសន៍ផ្តាំផ្ញើសាកសួរសុខទុក្ខ សេចក្តីនឹករលឹក និងពរសព្ទសាធុការពីសំណាក់ប្រមុខថ្នាក់ដឹកនាំកំពូលនៃព្រះរាជាណាចក្រកម្ពុជា ជូនដល់វីរកងទ័ពគ្រប់លំដាប់ ព្រមទាំងក្រុមគ្រួសារកងទ័ទាំងអស់ផងដែរ។

ជាមួយគ្នានោះ លោករដ្ឋមន្ដ្រី ក៏បានជម្រាបជូនអំពីការចូលរួមចំណែក និងការយកចិត្តទុកដាក់របស់ក្រសួងអភិវឌ្ឍន៍ជនបទ ចំពោះសុខទុក្ខរបស់កងយោធពលខេមរភូមិន្ទ តាមរយៈការចង់សម្ព័ន្ធមេត្រីភាព ដោយជានិច្ចកាលតែងតែចុះជួបសំណេះសំណាល និងឧបត្ថម្ភជាសំភារៈចំបាច់ផ្សេងៗដែលអង្គភាពត្រូវការ។ លោករដ្ឋមន្ដ្រី ក៏បានប្រកាសថ្កោលទោសចំពោះការឈ្លានពានដោយខុសច្បាប់ និងដោយចេតនារបស់កងទ័ពថៃ មកលើដែនអធិបតេយ្យនៃកម្ពុជា។ លោករដ្ឋមន្ត្រី ក៏បានអំពាវនាវដល់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ និងបងប្អូនប្រជាពលរដ្ឋទាំងអស់គាំទ្រនិងជឿជាក់លើរាជរដ្ឋាភិបាលក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចមហាបវរធិបតីហ៊ុន ម៉ាណែត និងបន្តនូវស្មារតីរួបរួមជាធ្លុងមួយជាខឿនការពារជាតិដ៏រឹងមាំ និងជាខ្នងបង្អែករបស់សមរភូមិមុខ ស្របនិងពាក្យ «សមរភូមិក្រោយ គាំទ្រសមរភូមិមុខ» ព្រមទាំងជូនពរឱ្យវីរយុទ្ធជនជួបតែសេចក្តីសុខ និងទទួលជ័យជម្នះលើសត្រូវឈ្លានពាន។

នាឱកាសនេះដែរ លោករដ្ឋមន្ត្រី ក៏បាននាំយកនូវអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ជូនដល់កងពលតូចថ្មើរជើងលេខ៥២ រួមមាន៖ អង្ករ ៣តោន, មី ១០០កេស, ស្កសរ ២០០គ.ក្រ, ទឹកត្រី ៥០យួរ, ទឹកស៊ីអ៊ីវ ៥០យួរ, ប្រេងឆា ១៥០លីត្រ, ទឹកសុទ្ធ ៥០កេស, នំអន្សម ៥០០នំ ថវិកាចំនួន ២០លានរៀល និងថវិកា៦០២០ដុល្លាអាមេរិក ជូនកងពលតូចថ្មើរជើងលេខ៥២។ ដោយឡែកសម្រាប់ក្រុមគ្រួសារកងទ័ព ចំនួន ២៥៧គ្រួសារ លោករដ្ឋមន្ត្រីបានប្រគល់ជូនក្នុង១គ្រួសារទទួលបាន៖ អង្ករ ២៥គ.ក្រ, ទឹកត្រី ១យួរ, ទឹកស៊ីអ៊ីវ ១យួរ, ប្រេងឆា ២លីត្រ, ក្រម៉ា ១, សារ៉ុង ១, សាប៊ូ ១កញ្ចប់, សំឡីអនាម័យនារី ១កញ្ចប់, និងថវិការចំនួន ១០ម៉ឺនរៀល៕