(ភ្នំពេញ)៖ សាលាបញ្ញាសាស្ត្រអន្តរជាតិ សាខាសែនសុខ និងហ្គ្រេនភ្នំពេញ នៅថ្ងៃទី២៣ ខែសីហា ឆ្នាំ២០២៥ បានរៀបចំពិធីប្រគល់សញ្ញាបត្រ និងវិញ្ញាបនបត្រជូនសិស្សានុសិស្សជំនាន់ទី៩ ដែលបានបញ្ចប់ការសិក្សា ថ្នាក់មត្តេយ្យសិក្សាកម្រិតខ្ពស់ បឋមសិក្សា មធ្យមសិក្សាបឋមភូមិ និងទុតិយភូមិក្នុងឆ្នាំសិក្សា ២០២៤-២០២៥។

ពិធីប្រគល់សញ្ញាបត្រនេះ បានធ្វើឡើងក្រោមអធិបតីភាព ដ៏ខ្ពង់ខ្ពស់ លោកតាបណ្ឌិត កុល ផេង បិតាស្ថាបនិកនៃសាកលវិទ្យាល័យបញ្ញាសាស្ត្រកម្ពុជា និងសាលាបញ្ញាសាស្ត្រអន្តរជាតិ និង លោក ប៊ុន សុផាត សមាជិកប្រតិបត្តិនៃក្រុមប្រឹក្សាភិបាលសាលាបញ្ញាសាស្ត្រអន្តរជាតិ សាខាសែនសុខ និងហ្គ្រេនភ្នំពេញ មាតាបិតា អាណាព្យាបាលសិស្ស និងភ្ញៀវកិត្តិយស ព្រមទាំងសិស្សានុសិស្សសរុបប្រមាណជាងមួយពាន់នាក់ នៅសាលសន្និបាតនៃក្រសួងរៀបចំដែនដី នគរូបនីយកម្ម និងសំណង់។

នាឱកាសនោះដែរ លោកតាបណ្ឌិត កុល ផេង បានផ្តល់ឱវាទដល់ ចៅៗជាសិស្សានសិស្ស ឱ្យរក្សាសីលប្រាំ។ ការរក្សាសីលប្រាំនឹងធ្វើឱ្យចៅៗក្លាយជាមនុស្សល្អ ពលរដ្ឋល្អ និងអ្នកដឹកនាំល្អ។ សីលប្រាំរួមមាន៖ ១. មិនសម្លាប់ជីវិត (ដោយសារសត្វស្រឡាញ់ជីវិតយើងក៏ស្រឡាញ់ជីវិតដូចគ្នា), ២. មិនលួចទ្រព្យគេ មិនត្រូវលួចទ្រព្យសម្បត្តិអ្នកដទៃ និងមិនកេងបន្លំ។ បើរកទទួលទានលក់អីវ៉ាន់ មួយគីឡូប្រាកដជាមួយគីឡូកុំឱ្យដាក់តែ ៨ខាំ។ ៣. មិននិយាយកុហក ត្រូវនិយាយពាក្យពិត ព្រោះពាក្យពិតនេះធ្វើឱ្យយើងកើតជាតិក្រោយមកសំឡេងពីរោះមាត់នរណាក៏គេស្រលាញ់ចូលចិត្ត។ ៤. មិនប្រព្រឹត្តខុសក្នុងកាម និងទី៥ គឺ មិនបរិភោគគ្រឿងស្រវឹង ការបរិភោគគ្រឿងស្រវឹង ធ្វើឱ្យខូចសុខភាព និងបាត់បង់សតិ។

លោកតាបណ្ឌិត កុល ផេង បានបន្ដថា ការរក្សាសីលគឺមានគុណធម៌ខ្ពស់បំផុត ពេលដែលមេគ្រួសាររក្សាគុណធម៌ កូនៗ ក្នុងគ្រួសាររក្សាគុណធម៌ គ្រួសារបានសុខ បើនៅក្នុងសង្គមរក្សាសីលទាំងអស់គ្នា សង្គមនឹងបានសុខ បើមួយប្រទេសរក្សាសីលទាំងអស់គ្នា ប្រទេសនោះនឹងបានសេចក្ដីសុខសម្រើន។

លោកតាបណ្ឌិត បានបន្ដទៀតថា មាតាបិតាចាស់នេះ គឺត្រូវតែថែទាំលោក និងជួយធ្វើកិច្ចការលោក មិនត្រូវធ្វើឱ្យម៉ែឪពិបាកចិត្ត ហើយត្រូវធ្វើជាកូនកតញ្ញូ ពលរដ្ឋកតញ្ញូ ធ្វើការបម្រើប្រទេសជាតិឱ្យបានល្អ អាចធ្វើជាគ្រូ ឬជាទាហានការពារជាតិ តាមចៅៗស្រលាញ់ បើសិនណាជាបានកូនចៅទាំងអស់ សុទ្ធតែមានគុណធម៌ ប្រទេសជាតិនឹងរីកចម្រើន។

ក្នុងនោះដែរ លោក ប៊ុន សុផាត សមាជិកប្រតិបត្តិនៃក្រុមប្រឹក្សាភិបាល បានបន្ថែមថា ដើម្បីទទួលបានជោគជ័យប្រសើរឡើងជាលំដាប់នៅថ្ងៃអនាគត ក្មួយៗ សិស្សានុសិស្សទាំងអស់ ត្រូវបន្តយកចិត្តទុកដាក់សិក្សារៀនសូត្រស្ដាប់តាមដំបូន្មានរបស់មាតាបិតា លោកគ្រូ អ្នកគ្រូ និងបុគ្គលិកសាលាឱ្យបានខ្ជាប់ខ្ជួន។ ក្មួយៗត្រូវចងចាំថា ឪពុកម្ដាយរបស់ក្មួយៗ តែងតែមានការសប្បាយរីករាយគ្រប់ពេលនៅពេលដែលបានឃើញថា កូនៗរៀនសូត្របានពិន្ទុល្អ និងមានឥរិយាបថល្អ ក្នុងការរស់នៅនិងជាប់ឈ្មោះនៅក្នុងតារាងសិស្សពូកែនៅក្នុងសាលារៀន។

លោក ប៊ុន សុផាត បានបន្ថែមថា ហើយអ្វីដែលក្មួយៗត្រូវចងចាំបន្ថែមទៀតនោះ គឺដើម្បីអាចក្លាយជាវរៈសិស្សរបស់សាលា គឺត្រូវធ្វើជាសិស្សល្អ ជាពលរដ្ឋល្អ និងអនាគតជាអ្នកដឹកនាំល្អ ក្មួយៗត្រូវបន្តអភិវឌ្ឍន៍ខ្លួនដោយផ្ដោតទៅលើកត្តាសំខាន់ៗចំនួន៣ រួមមាន៖ សុខភាព ចំណេះវិជ្ជា និងសីលធម៌។ ដូច្នេះ ក្មួយៗត្រូវបន្តថែរក្សាសុខភាពឱ្យបានល្អ ដោយលេងកីឡា ហាត់ប្រាណ កាត់បន្ថយពេលវេលាលេងទូរសព្ទ លើគ្រឿងអេឡិចត្រូនិចផ្សេងៗ និងបណ្ដាញសង្គមនានា ជាពិសេសត្រូវរក្សាអនាម័យផ្ទាល់ខ្លួនជាប់ជានិច្ច ដើម្បីបង្ការជំងឺផ្សេងៗផងដែរ។
ព្យាយាមអានសៀវភៅឱ្យបានច្រើនដើម្បីបង្កើនចំណេះវិជ្ជា និងស្ដាប់តាមដំបូន្មានរបស់មាតាបិតាចាស់ព្រឹទ្ធាចារ្យគ្រូបង្រៀន និងគណៈគ្រប់គ្រងសាលា ដើម្បីលើកកម្ពស់ក្រមសីលធម៌ផ្ទាល់ខ្លួន។

សូមជម្រាបថា រយៈពេល៩ឆ្នាំ នៃការបើកដំណើរការផ្ដល់សេវាកម្មអប់រំ ចំណេះទូទៅចាប់ពីថ្នាក់មត្តេយ្យ ដល់ថ្នាក់ទី១២ (K-12) សាលាបញ្ញាសាស្ត្រអន្តរជាតិសាខាសែនសុខ បានផ្ដល់ជូនសិស្សានុសិស្សនូវកម្មវិធី និងសេវាកម្មអប់រំប្រកប ដោយគុណភាព សុក្រឹត្យភាព និងបច្ចុប្បន្នភាព និងបានអប់រំ បណ្ដុះបណ្ដាលសិស្សឱ្យទទួលបានជោគជ័យ រហូតបានបញ្ចប់ការសិក្សាកម្រិតមធ្យមសិក្សាទុតិយភូមិ សរុបចំនួន៩ជំនាន់។
* ឱកាសទទួលបានអាហារូបករណ៍៖
សាលាបញ្ញាសាស្ត្រអន្តរជាតិ សាខាសែនសុខ និងហ្គ្រេនភ្នំពេញ ផ្ដល់អាហារូបករណ៍ពិសេសជូនសិស្សថ្មីគ្រប់រូប ដោយគ្រាន់តែធ្វើតេស្ត និងចុះឈ្មោះចូលរៀន នឹងទទួលបានអាហារូបករណ៍ភ្លាម។
កាលបរិច្ឆេទចូលរៀន៖
* ថ្ងៃទី០១ ខែកញ្ញា ឆ្នាំ២០២៥ (សាខាទី១ សែនសុខ ទល់មុខផ្សារម៉ាក្រូ ជិតផ្សារអ៊ីអន២។
* ថ្ងៃទី០២ ខែកញ្ញា ឆ្នាំ២០២៥ (សាខាហ្គ្រេនភ្នំពេញ ផ្លូវហាណូយ)។
* វគ្គសិក្សាថ្មីសម្រាប់កម្មវិធីភាសាអង់គ្លេស-ចិនទូទៅពេញម៉ោង និងក្រៅម៉ោងគ្រប់កម្រិត ទទួលធ្វើតេស្ត និងចុះឈ្មោះចូលរៀនចាប់ពីថ្ងៃនេះតទៅ៖
* ព័ត៌មានបន្ថែមសូមទំនាក់ទំនង សាលាបញ្ញាសាស្ត្រអន្តរជាតិសាខាសែនសុខ និងសាខាហ្គ្រេនភ្នំពេញ តាមទូរស័ព្ទលេខៈ
* សាខាសែនសុខ៖ ០៧៧ ៩៥៩ ២២២ / ០២៣ ៩៩៩៩ ៣៦ / ០២៣ ៩៩៩៩ ៨៧។
* សាខាហ្គ្រេនភ្នំពេញ៖ ០១៦ ៨៨៨ ៣១៩ / ០៧៧ ៨៨៨ ៣១៩ / ០៦៨ ៨៨៨ ៣១៩៕