(ភ្នំពេញ)៖ គណៈកម្មការប្រឡងប្រជែងជ្រើសរើសក្របខ័ណ្ឌមន្ត្រីពន្ធនាគារ សម្រាប់ឆ្នាំ២០២៥ បានដំណើរការប្រឡងប្រជែង នៅព្រឹកថ្ងៃអាទិត្យ ទី២៤ ខែសីហា ឆ្នាំ២០២៥នេះ នាមណ្ឌលប្រឡងវិទ្យាល័យជា ស៊ីម សន្ធរម៉ុក មានទីតាំងស្ថិតនៅក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ជាមួយនឹងបេក្ខជនប្រឡង ចំនួន២៥០នាក់ មានបេក្ខនារី៧៨នាក់ ដោយត្រូវជ្រើសរើសយក ចំនួន៧២នាក់ ក្នុងនោះ វេជ្ជបណ្ឌិត២៩នាក់, វេជ្ជបណ្ឌិតឯកទេសរោគស្ត្រីចំនួន៥នាក់, គិលានុបដ្ឋាក ចំនួន៣៨នាក់។

ការប្រឡងនេះ ធ្វើឡើងក្រោមការអញ្ជើញកាត់វិញ្ញាសារប្រឡងចែកចេញជា២ក្រុម ដោយក្រុមទី១ លោកសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ និងលោក កើត ឆែ អភិបាលរងរាជធានីភ្នំពេញ ក្រុមទី២ នាយឧត្តមសេនីយ៍ សាស្ត្រាចារ្យ សេង ផល្លី អគ្គនាយកនៃអគ្គនាយកដ្ឋានធនធានមនុស្សក្រសួងមហាផ្ទៃ និងលោក ហុក ហួលីម នាយករដ្ឋបាលសាលារាជធានីភ្នំពេញ និងមន្ត្រីពាក់ពន្ធ័មួយចំនួនទៀត។

មន្ត្រីរដ្ឋបាលរាជធានីភ្នំពេញ បានឱ្យដឹងថា ការប្រឡងជ្រើសរើសក្របខ័ណ្ឌមន្ត្រីពន្ធនាគារក្រសួងមហាផ្ទៃ សម្រាប់ឆ្នាំ២០២៥ មានផ្នែកជំនាញសុខាភិបាល ចំនួន៧២នាក់ (ឋានន្តរស័ក្តិវរអគ្គានុរក្ស ថ្នាក់លេខ៣) សម្រាប់បម្រើការងារនៅមណ្ឌលអប់រំកែប្រែ និងពន្ធនាគាររាជធានី-ខេត្ត ក្នុងនោះសម្រាប់រាជធានីភ្នំពេញ ចំនួន៨នាក់។

ចំពោះការប្រលងនេះ បេក្ខជនត្រូវបានអនុវត្ត គឺមិនត្រូវលួចចម្លង ឬមានបំណងលួចចម្លង, មិនត្រូវពិភាក្សា ឬចម្លងគ្នា, មិនត្រូវយកអាវុធជាតិផ្ទុះចូលក្នុងមណ្ឌលប្រឡង, ហាមយកតាម និងប្រើប្រាស់ទូរស័ព្ទ វិទ្យុទាក់ទងគ្រប់ប្រភេទ និងឧបករណ៍អេឡិចត្រូនិចគ្រប់ប្រភេទដែលអាចផ្ទុកឯកសារបាន ចូលក្នុងបន្ទប់ប្រឡង។ ក្នុងករណីមេប្រយោគ ឬអនុរក្សឆែករកឃើញ បេក្ខជន នឹងត្រូវបណ្ដេញចេញពីបន្ទប់ប្រឡង។ មិនត្រូវឲ្យអ្នកដទៃប្រឡងជំនួស ឬសរសេរកិច្ចការជំនួសនៅលើសន្លឹកកិច្ចការរបស់ខ្លួន, មិនត្រូវគូសសញ្ញាសំគាល់នៅលើសន្លឹកកិច្ចការ, មិនត្រូវធ្វើសកម្មភាពណាដែលនាំឲ្យចលាចលក្នុងមណ្ឌលប្រឡង, ហាមដាច់ខាតចំពោះការសេពគ្រឿងស្រវឹង និងជក់បារីនៅក្នុងបរិវេណមណ្ឌលប្រឡង ។ រាល់ការប្រព្រឹត្តល្មើសនឹងបទប្បញ្ញត្តិខាងលើ បេក្ខជនត្រូវប្រឈមនឹងការបញ្ឈប់មិនឲ្យប្រឡង ហើយ សន្លឹកកិច្ចការរបស់បេក្ខជននោះនឹងត្រូវបានពិន្ទុសូន្យ និងទទួលកម្រិតវិន័យផ្សេងៗទៀតដែលត្រូវបានកំណត់ ដោយគណៈកម្មការកណ្ដាលរៀបចំការប្រឡង។

ការប្រឡងនឹងប្រព្រឹត្តទៅរយៈពេល២ម៉ោង លើវិញ្ញាសារ ចំណេះដឹងទូទៅ និងចំណេះដឹងវិស័យពន្ធនាគារ, ជំនាញឯកទេសសុខាភិបាល រយៈពេល២ម៉ោង។ បេក្ខជនហាមយកសំណៅឯកសារ និងឧបកណ៏អេឡេចត្រូនិកគ្រប់ប្រភេទ ចូលមណ្ឌលប្រឡង។

ក្រសួងមហាផ្ទៃ ជ្រើសរើសក្របខ័ណ្ឌមន្ត្រីពន្ធនាគារ សម្រាប់ឆ្នាំ២០២៥ ផ្នែកជំនាញសុខាភិបាល ចំនួន៧២នាក់ (ឋានន្តរស័ក្តិវរអគ្គានុរក្ស ថ្នាក់លេខ៣) សម្រាប់បម្រើការងារនៅមណ្ឌលអប់រំកែប្រែ និងពន្ធនាគាររាជធានី-ខេត្ត ដូចខាងក្រោម៖ក្របខ័ណ្ឌជ្រើសរើសផ្នែកជំនាញសុខាភិបាលវេជ្ជបណ្ឌិត ចំនួន២៩នាក់ វេជ្ជបណ្ឌិត ឯកទេសរោគស្ត្រី ចំនួន៥នាក់គិលានុបដ្ឋាក ចំនួន៣៨នាក់ ក្របខ័ណ្ឌសរុប ចំនួន៧២នាក់។

សម្រាប់ទៅបម្រើការនៅតាមមណ្ឌលអប់រំកែប្រែទី១, មណ្ឌលអប់រំកែប្រែទី២, មណ្ឌលអប់រំកែប្រែទី៣, មណ្ឌលអប់រំកែប្រែទី៤ និងសម្រាប់ពន្ធនាគារនៅតាម រាជធានី-ខេត្ត ។

គួរបញ្ជាក់ថា លក្ខខណ្ឌនៃការជ្រើសរើសបេក្ខជនទាំងពីរភេទដែលមានសិទ្ធិសុំចុះឈ្មោះប្រឡងប្រជែងជ្រើសរើសផ្នែកជំនាញសុខាភិបាល (វេជ្ជបណ្ឌិត វេជ្ជបណ្ឌិតឯកទេសរោគស្ត្រី និងគិលានុបដ្ឋាក) ត្រូវបំពេញ ដូចខាងក្រោម៖

*១- មានសញ្ជាតិខ្មែរ
*២- មានជីវប្រវត្តិច្បាស់លាស់ មានកិរិយាមារយាទល្អ និងពុំធ្លាប់មានទោស
*៣- បេក្ខជនទាំងពីរភេទត្រូវមានសញ្ញាបត្រតាមមុខជំនាញសុខាភិបាលនីមួយៗ ដូចខាងក្រោម៖វេជ្ជបណ្ឌិត៖ សញ្ញាបត្រវេជ្ជបណ្ឌិត ឬសញ្ញាបត្របរិញ្ញាបត្រវិទ្យាសាស្ត្រវេជ្ជសាស្ត្រវេជ្ជបណ្ឌិតឯកទេសរោគស្ត្រី៖ សញ្ញាបត្រវេជ្ជបណ្ឌិត ឬ សញ្ញាបត្របរិញ្ញាបត្រវិទ្យាសាស្ត្រវេជ្ជសាស្ត្រនិងវិញ្ញាបនបត្រផ្នែកជំនាញរោគស្ត្រី សញ្ញាបត្រគិលានុបដ្ឋាកបរិញ្ញាបត្រគិលានុបដ្ឋាក៖
*៤- ចំពោះបេក្ខជនផ្នែកជំនាញសុខាភិបាល ដែលមានសញ្ញាបត្រវេជ្ជបណ្ឌិត និងបរិញ្ញបត្រគិលានុបដ្ឋាក ត្រូវបានលើកលែងលក្ខខណ្ឌអាយុសម្រាប់ការចូលរួមប្រឡងជ្រើសរើសខាងលើ
*៥- មានកាយសម្បទាគ្រប់គ្រាន់ និងមានសុខភាពល្អ (ឆ្លងកាត់ការត្រួតពិនិត្យឈាម កាយសម្បទា និងតេស្តរកសារធាតុញៀន)៕