(ភ្នំពេញ)៖ អ្នកកឧកញ៉ា លាង ម៉េង ស្ថាបនិកក្រុមហ៊ុន ខ្មែរ ប៊ែរវើរីជីសបានគូសបញ្ជាក់ថា មិនថាអាជីវកម្មតូច មធ្យម ឬធំនោះទេ គឺទាមទារឱ្យម្ចាស់អាជីកម្ម ត្រូវមើលថែឱ្យបានដិតដល់ នោះទើបធ្វើឱ្យអាជីវកម្មរឹងមាំ បើមិនដូច្នេះទេនឹងមិនអាចឈរជើងបានយូរឡើយ។

ជាក់ស្តែងខ្លួនលោកផ្ទាល់ ដែលជាថ្នាក់ដឹកនាំក្រុមហ៊ុន ខ្មែរ ប៊ែរវើរីជីស ដែលជាក្រុមហ៊ុនធំមួយនៅកម្ពុជា បើទោះបីជាមានលទ្ធភាពជួលអ្នកជំនាញមកមើលថែក៏ដោយ ក៏លោកនៅតែយកចិត្តទុកដាក់ និងមើលវាដិតដល់ នោះអាចទើបអាចឱ្យក្រុមហ៊ុននេះ អាចឈរជើងនៅលើទីផ្សារបានយូរ ដោយសារយើងមានគូប្រកួតប្រជែងនៅគ្រប់កន្លែង ក្នុងស្រុក និងក្រៅស្រុក។

ហេតុដូច្នេះហើយ លោកលើកទឹកចិត្តដល់ម្ចាស់ SME ទាំងអស់ ត្រូវមើលថែអាជីវកម្មរបស់ខ្លួនឱ្យបានដិតដល់ និងវិវត្តខ្លួនពីការផលិតបែបប្រពៃណី មកប្រើប្រាស់បច្ចេកវិទ្យា ឬម៉ាស៊ីនក្នុងការផលិត ដើម្បីកាត់បន្ថយថ្លៃដើម និងធ្វើឱ្យទំនិញកាន់តែមានគុណភាព ឈានទៅប្រកួតប្រជែងជាមួយទំនិញនាំចូល។

លោកលើកឡើងថា ប្រទេសជិតខាងគេអាចនាំចូល ប៉ុន្តែបើយើងធ្វើឱ្យតម្លៃដើមយើងល្អ គុណភាពយើងល្អ នៅពេលប្រជាជនឃើញតម្លៃដើមយើងល្អ និងគុណភាពល្អ ជឿជាក់ថា គាត់នឹងគាំទ្រ និងមានស្មារតីជាតិនិយមខ្លាំង។

លោកពន្យល់បន្ថែមថា «អ្នកដែលជាម្ចាស់ហ្នឹងត្រូវផ្តោតវាឱ្យខ្លាំង កុំដល់ពេលគាត់អត់នៅ មើលថែអាជីវកម្មហ្នឹងទេ អាជីវកម្មធុនមធ្យមហ្នឹងមិនអាចទៅរួចទេ។ បើដូចខ្ញុំជាថ្នាក់ដឹកនាំក្រុមហ៊ុន ខ្មែរ ប៊ែរវើរីជីស ក៏ខ្ញុំនៅមើលវាដិតដល់ បានធ្វើឱ្យអាជីវកម្មធំ អាចឈរជើងបាន ដោយសារយើងមានគូប្រកួតប្រជែងរបស់យើងនៅគ្រប់កន្លែង»។

ទន្ទឹមគ្នានេះ លោកបានលើកឡើងថា ទំនិញខ្លះ មិនមែនត្រូវតែផលិតក្នុងទំហំធំ បែបឧស្សាហកម្មនោះ ប្រសិនបើទំនិញនោះ ត្រូវជាមួយនឹងការផលិតបែបខ្នាតតូច គួរតែជំរុញឱ្យអាជីវកម្មបែបលក្ខណៈគ្រួសារ ឬSME ធ្វើការផលិត ដែលអាចនឹងចំណាយថ្លៃដើមទាបជាង៕

សូមស្តាប់ការលើកឡើងបន្ថែមរបស់ អ្នកឧកញ៉ា លាង ម៉េង៖