(ភ្នំពេញ)៖ អ្នកជំនាញអារ្យធម៌ខ្មែរ លោក រ័ត្ន សណ្ដាប់ បានថ្លែងថា ក្រោយពីសង្រ្គាម៥ថ្ងៃបានរលត់មកនេះ បើនិយាយអំពីសង្គមខ្មែរ យើងឃើញថា កម្លាំងដ៏អស្ចារ្យរបស់ប្រជាជនខ្មែរ គឺបានក្រោកឈរទ្បើងព្រមៗគ្នា រួបរួមគ្នាទាំងក្នុងនិងក្រៅប្រទេស យ៉ាងរឹងមាំជាមួយនិងរាជរដ្ឋាភិបាលក្រោមការដឹកនាំសម្ដេចបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ដើម្បីការពារបូរណភាពទឹកដី សេចក្ដីថ្លៃថ្នូររបស់ជាតិ និងអំពាវនាវរកសន្ដិភាពដោយកិត្ដិយសដើម្បីបញ្ចប់សង្រ្គាម ពោរពេញដោយក្ដីស្រទ្បាញ់ ក្នុងទឹកចិត្ដជួយយកអាសាគ្នាប្រកបដោយមេត្ដាធម៌យ៉ាងជ្រោលជ្រៅបំផុត។

ព្រោះសន្ដិភាព ភាពសុខដុមរមនា គឺជាមូលដ្ឋានគ្រឹះដ៏រឹងមាំនៃវប្បធម៌ខ្មែរ។ ប្រជាជនកម្ពុជាផ្តល់អាទិភាពដល់ការរួមរស់ដោយសន្តិភាព ជៀសវាងការប្រឈមមុខដាក់គ្នាដោយសង្រ្គាម ដើម្បីវិបុលភាពសង្គមនិងពិភពលោក។ គោលការណ៍នេះ​ ខ្មែរគោរពយ៉ាងខ្លាំងដល់ចាស់​ទុំ​ក្នុងក្រុមគ្រួសារ ពង្រីកដល់សហគមន៍​ និងសង្គមយ៉ាងរឹងមាំ។ ហេតុនេះចំពោះការពលីរបស់វីរយុទ្ធជនដ៏អង់អាចក្លាហានដើម្បីខ្មែរនិង​ប្រទេសជាតិនាពេលនេះ គឺប្រាកដណាស់ ប្រជាជនកម្ពុជាគ្រប់ៗជំនាន់ ចងចាំនិងដឹងគុណដោយចងភ្ជាប់ក្នុងប្រពៃណីបុណ្យភ្ជុំបិណ្ឌ ជារៀងរហូត។

ទន្ទឹមនឹងនេះ បើយើងងាកទៅមើលក្នុងសង្គមសៀមវិញ យើងឃើញថា សៀមកំពុងពុះកព្រ្ជោលបព្ជោះសង្រ្គាមជាតិនិយមជ្រុល ដោយប្រើវោហាសាស្រ្ដដោយហិង្សា និងគ្រោកគ្រាតសព្វបែបយ៉ាង មកលើប្រជាជនកម្ពុជាយ៉ាងក្ដែងៗថា កម្ពុជាជាប្រទេសតូច ប្រជាជនក្រីក្រ ឬយ៉ាងនេះយ៉ាងនោះ។ ឋិតត្រង់គំនិតជាតិនិយមជ្រុលថៃនេះ លោក រ័ត្ន សណ្ដាប់ យល់ថា យើងគ្មានអ្វីត្រូវចាប់អារម្មណ៍ និងឈឺចាប់នូវរាល់វោហាសាស្រ្ដពុំមានលក្ខណៈវិទ្យាសាស្រ្ដនោះទ្បើយ ។ ប៉ុន្ដែអ្វីដែលយើងចាប់អារម្មណ៍និងឈឺចាប់នោះ គឺឋិតនៅត្រង់ទង្វើពាក្យសំដីអួតក្អេងក្អាងរបស់ពួកអ្នកជាតិនិយមជ្រុលថៃ ថា ថៃជាប្រទេសអ្នកមានផុតគេ ផុតឯងនៅក្នុងតំបន់ តែបែរជាមកឈ្លានពានតាមទំនើងចិត្ដមកលើទឹកដីប្រាសាទបុរាណខ្មែរទាំងកំរោល និងគ្មានភាពស៊ីវិល័យឯណេះវិញទេ។

ក្នុងបរិបទប្រវត្ដិសាស្រ្ដខ្មែរ ក្រោយពីការធ្លាក់ចុះនៃចក្រភពខ្មែរពីស.វ.១៥ នៃគ.ស.មក វិស័យសេដ្ឋកិច្ច និងនយោបាយខ្មែរ ទោះបីមានការធ្លាក់ចុះនិងអាប់អោនប្រមាណ៥០០ឆ្នាំយ៉ាងណាក្ដី ក៏ប៉ុន្ដែលើវិស័យវប្បធម៌ខ្មែរវិញ ពុំបានធ្លាក់ចុះ និងអាប់អោននោះទ្បើយ។ បើពោលឲ្យចំ វប្បធម៌ខ្មែរនៅបន្ដរឹងមាំ សាយភាយ ទៅលើជនជាតិសៀមយ៉ាងខ្លាំងទៀតផង រហូតមកដល់បច្ចុប្បន្ន។

ដូច្នេះបើនិយាយក្នុងទស្សនវប្បធម៌ ពួកជាតិនិយមជ្រុលថៃ ពួកគេអាចអួតអាងសម្ញែងពីសេដ្ឋកិច្ច និងសព្វាវុធ យន្ដហោះចម្បាំងដើម្បីយកប្រៀបលើកម្ពុជាបាន តែពួកគេពុំអាចយកប្រៀបមកលើវប្បធម៌ដ៏បរមបុរាណខ្មែរបានទ្បើយ។ ព្រោះគុណតម្លៃវប្បធម៌ គឺជាលំហគំនិតរបស់មនុស្សជាតិ មានតម្លៃសកល ហៅថា"កម្ពុជាគឺជាអាណាចក្រនៃវប្បធម៌"៕