(ព្រះវិហារ)៖ លោក តាំង ម៉េងលាង អភិបាលរងខេត្តកណ្តាល និងភរិយា នៅព្រឹកថ្ងៃទី២៤ ខែសីហា ឆ្នាំ២០២៥ បានដឹកនាំក្រុមការងារ នាំអំណោយម៉ូតូ២គ្រឿង និងសម្ភារៈប្រើប្រាស់ គ្រឿងឧបភោគបរិភោក ម្ហូបអាហារ ទៅចែកជូនវីរកងទ័ពជួរមុខ ក្នុងអង្គភាពកងពលតូចអន្តរាគមន៍លេខ៧ លេខ៨ ដែលកំពុងឈរជើងការពារព្រំដែន នៅសមរភូមិទិសទី១ ប្រាសាទខេត្តព្រះវិហារ។

នៅក្នុងឱកាសនេះដែរ លោក តាំង ម៉េងលាង បានថ្លែងនូវការកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះវីរកងទ័ពជួរមុខដ៏អង់អាចក្លាហាន ដែលបានខិតខំយកចិត្តទុកដាក់បំពេញតួនាទីភារកិច្ច ប្រកបដោយការទទួលខុសត្រូវ ក្នុងកិច្ចការពារបូរណភាពទឹកដី អធិបតេយ្យភាពជាតិ និងធ្វើឲ្យសណ្តាប់ធ្នាប់នៅតាមព្រំដែន មានភាពល្អប្រសើរ ធានាបាននូវសន្តិសុខសុវត្ថិភាព ជូនប្រជាពលរដ្ឋ។

លោកអភិបាលរងខេត្តកណ្តាល បានថ្លែងប្រាប់កងទ័ពរបស់យើង សូមរក្សាសុខភាពឱ្យបានល្អ ដើម្បីការពារពីជំងឺផ្សេងៗ និងជូនពរវីរកងទ័ពយើងទាំងអស់នៅតាមព្រំដែន សូមមានសុខភាពល្អ កម្លាំងខ្លាំងក្លា ស្មារតីមោះមុត ដើម្បីប្រយុទ្ធដណ្តើមយកជ័យជំនៈលើខ្មាំងសត្រូវដែលប៉ុនប៉ងឈ្លានពានទឹកដីរបស់យើង។

ដើម្បីចូលរួមចំណែកជួយគាំទ្រលើកទឹកចិត្តដល់វីរកងទ័ពជួរមុខ ដែលកំពុងឈរជើងការពារបូរណភាពទឹកដី និងអធិបតេយ្យជាតិនៅតាមព្រំដែន លោក តាំង ម៉េងលាង និងភរិយា ព្រមទាំងក្រុមការងារ បានឧបត្ថម្ភម៉ូតូចំនួន២គ្រឿង ក្នុងនោះកងពលតូចអន្តរាគមន៍លេខ៧ ទទួលបានម៉ូតូ១គ្រឿង និងកងពលតូចអន្តរាគមន៍លេខ៨ ទទួលបានម៉ូតូ១គ្រឿង ព្រមទាំង គ្រឿងឧបភោគបរិភោក ម្ហូបអាហារ ទឹកបរិសុទ្ធ និងសម្ភារៈប្រើប្រាស់ជាច្រើនមុខទៀត ហើយលោកបានបន្តដំណើរអញ្ជើញចុះសួរសុខទុក្ខ និងចែកអំណោយដល់វីរកងទ័ពនៅទិសប្រាសាទតាមាន់ តាក្របី ក្នុងខេត្តឧត្តរមានជ័យបន្តទៀត៕