(ភ្នំពេញ)៖ លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងថា កម្ពុជាស្វាគមន៍ចំពោះការអំពាវនាវរបស់អង្គទូត ដែលចុះពិនិត្យនៅព្រំដែនកម្ពុជាថៃ ដែលអំពាវនាវឱ្យប្រទេសទាំងពីរអនុវត្តឱ្យបានពេញលេញលើបទឈប់បាញ់។

លោកថ្លែងបែបនេះ ក្នុងឱកាដអ្នកនាំពាក្យរាជរដ្ឋាភិបាលកម្ពុជា រៀបចំសង្ខេបព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» គិតត្រឹមម៉ោង០៤រសៀលថ្ងៃទី២៣ ខែសីហា ឆ្នាំ២០២៥។

ការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់ចំណុចផ្សេងៗទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះបានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់។

ក្រោយកិច្ចប្រជុំជុំវិញបទឈប់បាញ់រវាងកម្ពុជា-ថៃ នៅប្រទេសម៉ាឡេស៊ី នាថ្ងៃទី២៨ ខែកក្កដា ឆ្នាំ២០២៥ បានដាក់ចេញបទឈប់បាញ់បន្ទាន់ និងឥតលក្ខខណ្ឌ ដែលចូលជាធរមាននៅវេលាម៉ោង២៤៖០០ ថ្ងៃទី២៨ ខែកក្កដា ឆ្នាំ២០២៥។ តាំងពីបទឈប់បាញ់ចូលជាធរមាន កម្ពុជាមិនដែលល្មើសម្តងណាឡើយ។

ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានដឹកនាំដំណើរទស្សនកិច្ចរបស់ប្រធាន និងតំណាងនៃស្ថានបេសកកម្មការទូត ព្រមទាំងទីភ្នាក់ងារ ជំនាញរបស់អង្គការសហប្រជាជាតិ (អ.ស.ប) និងអង្គការមិនមែនរដ្ឋាភិបាលបរទេសដែលធ្វើការងារ ផ្នែកសកម្មភាពមីនប្រចាំកម្ពុជា ចំនួន ៦០រូប ទៅកាន់ខេត្តបន្ទាយមានជ័យ និងខេត្តឧត្តរមានជ័យ នៅថ្ងៃទី ២២-២៣ ខែសីហា ឆ្នាំ២០២៥។

លោកបានបញ្ជាក់យ៉ាងដូច្នេះ «កម្ពុជាស្វាគមន៍ចំពោះការអំពាវនាវរបស់អង្គទូត ដែលចង់ឲ្យប្រកាន់ខ្ជាប់នូវបទឈប់បាញ់រវាងកម្ពុជា និងថៃ ដូចដែលបានលើកឡើង នៅក្នុងដំណើរទស្សនកិច្ចទូត នៅខេត្តឧត្តរមានជ័យ នៅថ្ងៃទី២២ ខែសីហា ឆ្នាំ២០២៥ កន្លងមកថ្មីៗនេះ»។

អ្នកនាំពាក្យក្រសួងការបរទេស បានលើកការថ្លែងរបស់លោក Atsushi Ueno ឯកអគ្គរដ្ឋទូតជប៉ុនប្រចាំកម្ពុជា ថាលោកបាន សង្កេតឃើញផ្ទាល់ភ្នែក ពីផលប៉ះពាល់ នៃការឈ្លានពាន ផ្នែក យោធានាពេលថ្មីៗនេះ ដែលបង្ខំឱ្យគ្រួសារក្នុងស្រុក ភៀស ខ្លួនចេញពីផ្ទះសម្បែង។ លោកទូតបានសង្កត់ធ្ងន់លើក្តីសង្ឃឹមរបស់ជប៉ុន ចំពោះ ដំណោះស្រាយ ដោយសន្តិវិធី។

លោក Atsushi Ueno បានថ្លែងថា «យើងចង់ឃើញជីវិត ប្រកបដោយសន្តិភាព និង ភាពស្ងប់ស្ងាត់ នឹងត្រូវបាន បន្ត ឡើងវិញឱ្យបានឆាប់ តាមដែលអាចធ្វើទៅបាន។ ហើយយើង សង្ឃឹមថា បញ្ហានេះ នឹងត្រូវបានដោះស្រាយ តាមរយៈ កិច្ច សន្ទនា ដោយសន្តិវិធី រវាងប្រទេសទាំងពីរ មិនមែន តាមរយៈ ការប្រយុទ្ធគ្នាទេ»។

សូមជម្រាបថា គណៈប្រតិភូអង្គទូតបានសម្តែងនូវក្តីសង្ឃឹមថា សន្តិភាពពេញលេញនឹងត្រូវបានស្ដារឡើងវិញឆាប់ៗ ហើយបានសង្កត់ធ្ងន់អំពីសារៈសំខាន់នៃការគោរព និងការអនុវត្តកិច្ចព្រមព្រៀងបទឈប់បាញ់ ឲ្យបានពេញលេញ និងប្រកបដោយប្រសិទ្ធភាព ដើម្បីឈានទៅសម្រេចដំណោះស្រាយដោយសន្តិវិធីយូរអង្វែង និងអនុញ្ញាតឱ្យប្រជាជនភៀសសឹកអាចវិលត្រឡប់ទៅលំនៅដ្ឋានវិញ និងបន្តជីវភាព រស់នៅប្រកបដោយសុវត្ថិភាព និងសេចក្តីថ្លៃថ្នូរ៕