(ភ្នំពេញ)៖ ស្រ្តីក្លាហានម្នាក់បានជិះម៉ូតូបំបុកជនសង្ស័យ២នាក់ ដែលឆក់ទូរសព្ទពីនាងបានសម្រេច រួចព្យាយាមជិះម៉ូតូគេចខ្លួន បណ្ដាលឲ្យជនសង្ស័យដួលម៉ូតូ ហើយស្របពេលនោះនគរបាលប៉ុស្តិ៍ចោមចៅទី១ ល្បាតទៅដល់ ជួយដេញចាប់បានជនសង្ស័យទាំង២នាក់ រួចនាំទៅសាកសួរចាត់ការតាមច្បាប់។

ហេតុការណ៍នោះ បានកើតឡើងនៅវេលាម៉ោង២រសៀល ថ្ងៃទី២២ ខែសីហា ឆ្នាំ២០២៥ នៅតាមផ្លូវបេតុង ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យទី១ ឈ្មោះម៉ៅ វាសនា ភេទប្រុស អាយុ១៨ឆ្នាំ មុខរបរជាងជួសជុលម៉ូតូ ស្នាក់នៅភូមិដំណាក់ធំ សង្កាត់ស្ទឹងមានជ័យទី២ ខណ្ឌមានជ័យ និងទី២ ឈ្មោះ ទូច សេរីបញ្ញា ភេទប្រុស អាយុ១៨ឆ្នាំ ស្នាក់នៅភូមិព្រៃទ័រ សង្កាត់ស្ទឹងមានជ័យទី២ ខណ្ឌមានជ័យ។

ចំណែកនារីក្លាហានឈ្មោះ ហាយ ថារី អាយុ៣២ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួលស្ថិតនៅក្នុងភូមិទ្រា សង្កាត់ស្ទឹង មានជ័យទី៣ ខណ្ឌមានជ័យ ។

នគរបាលបានឲ្យដឹងថា នៅមុនពេលកើតហេតុ ជនរងគ្រោះជិះម៉ូតូ០១គ្រឿងម៉ាកHONDA SCOOPY ពណ៌ ស ស៊េរីឆ្នាំ២០២២ ពាក់ស្លាកលេខភ្នំពេញ1KT-4300 ធ្វើដំណើរតាមផ្លូវបេតុងភូមិទួលពង្រ។ លុះពេលទៅដល់ត្រង់ចំណុចកើតហេតុជនសង្ស័យទាំង២នាក់ខាងលើ បានជិះម៉ូតូ០១គ្រឿងម៉ាកSUZUKI NEX ពណ៌ស ស៊េរីឆ្នាំ២០២៥ ពាក់ស្លាកលេខភ្នំពេញ1KY-0069 ទៅពីក្រោយ ។

លុះពេលទៅដល់ទន្ទឹមជនរងគ្រោះ ជនសង្ស័យក៏បានឆក់យកទូរសព្ទម៉ាកIPHONE 12Pro Max ពណ៌មាស របស់ជនរងគ្រោះរួចជិះម៉ូតូគេចខ្លួន ហើយជនរងគ្រោះក៏បានជិះម៉ូតូដេញតាម និងបានស្រែកថា «ជួយផងៗចោរក់ទូរសព្ទដៃហើយ»។

ពេលដេញតាមទាន់ ជនរងគ្រោះក៏បានជិះម៉ូតូបុក បណ្ដាលឲ្យជនសង្ស័យដួលម៉ូតូ ស្របពេលនោះ នគរបាលប៉ុស្តិ៍ចោមចៅទី១ ជិះម៉ូតូល្បាតទៅតដល់ជួយដេញតាមឃាត់ជន សង្ស័យបានទាំង០២នាក់តែម្ដង។

នគរបាលបានបន្តទៀតថា ពេលនោះនគរបាលដកហូតយកទូរសព្ទដៃបានប្រគល់ជនជនរងគ្រោះវិញ ហើយក៏ដកហូតយកម៉ូតូម៉ាកSUZUKI NEX ពណ៌ស ស៊េរីឆ្នាំ២០២៥ ស្លាកលេខភ្នំពេញ1KY-0069 ជារបស់ជនសង្ស័យជិះធ្វើសកម្មភាពឆក់ផងដែរ។ បន្ទាប់មកបាននាំខ្លួនជនសង្ស័យទាំង០២នាក់ទៅកាន់ប៉ុស្តិ៍ចោមចៅទី១ ដើម្បីសួរនាំ និងកសាងសំណុំរឿងបញ្ជូនទៅកាន់ផ្នែកនគរបាលព្រហ្មទណ្ឌនៃ អធិការដ្ឋាននគរបាលខណ្ឌពោធិ៍សែនជ័យ ចាត់ការបន្តតាមនីតិវិធី៕