(សៀមរាប)៖ លោកវរសេនីយ៍ឯក សំណាង ពុទ្ធិនាថ ប្រធានក្រុមនាយទាហានវ័យក្មេងកងទ័ពជើងអាកាស ប្រធានក្រុមការងាររាជរដ្ឋាភិបាលចុះមូលដ្ឋានឃុំកៀនសង្កែ ស្រុកសូទ្រនិគម ខេត្តសៀមរាប និងជាតំណាងនាយឧត្តមសេនីយ៍ សឹង សំណាង អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងអាកាស និងលោកស្រី ប្រាក់ សុជតា ព្រមទាំងរួមដំណើរជាមួយនាយទាហានវ័យក្មេងកងទ័ពជើងអាកាសជាច្រើនរូបទៀត នាព្រឹកថ្ងៃទី២៤ ខែសីហា ឆ្នាំ២០២៥នេះ បានចុះសួរសុខទុក្ខ និងនាំយកអំណោយដែលបានមកពីការកៀរគរបរិច្ចាគពីសំណាក់មេបញ្ជាការ នាយទាហានវ័យក្មេង និងសប្បុរសជននានា មកជូនប្រជាជភៀសសឹក និងពលករ ដែលកំពុងស្នាក់នៅបណ្តោះអាសន្នក្នុងស្រុកសូទ្រនិគម ខេត្តសៀមរាប ចំនួន១៧៧ គ្រួសារ។

លោកវរសេនីយ៍ឯក សំណាង ពុទ្ធិនាថ បានពាំនាំមកជាមួយនូវបណ្តាំផ្ញើសាកសួរសុខទុក្ខពីឧបនាយករដ្ឋមន្ត្រី ប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប និងមេបញ្ជាការកងទ័ពជើងអាកាស ជូនចំពោះបងប្អូនជនភៀសសឹក និងពលករ ជាពិសេសថ្នាក់ដឹកនាំរបស់យើងដែលតែងបានគិតគូរជានិច្ចអំពីសុខទុក្ខ និងជីវភាពរស់នៅរបស់បង ប្អូន អ៊ុំ ពូ មីង ក្មួយៗ ទាំងអស់ ដែលជាជន
ភៀសសឹក និងពលករ ដែលបាននឹងកំពុងស្នាក់នៅដោយសុវត្ថិភាព ក្នុងឃុំកៀនសង្កែ ស្រុកសូទ្រនិគម។

លោកវរសេនីយ៍ឯក បានថ្លែងថា ក្នុងកាលៈទេសៈដ៏លំបាកនេះ លោកពិតជាយល់ច្បាស់អំពីការលំបាកដែលបង ប្អូន ពូ មីង ក្មួយៗទាំងអស់ បាននិងកំពុងជួបប្រទះដោយត្រូវចាកចោលផ្ទះសម្បែង ភូមិដ្ឋាន ទ្រព្យសម្បត្តិ សត្វពាហនៈ និងមុខរបរ អាជីវកម្មផ្សេងៗ ដោយសារតែផលប៉ះពាល់នៃសង្គ្រាមឈ្លានពានរបស់ថៃមកលើប្រទេសកម្ពុជា ហើយការលំបាក និងទុក្ខសោករបស់បងប្អូននាពេលនេះ ក៏ជាទុក្ខសោក និងការលំបាករបស់ខ្មែរយើងទាំងអស់គ្នាមិនថានៅទីណាក៏ដោយ ជាពិសេសជាការលំបាករបស់ រាជរដ្ឋាភិបាលកម្ពុជាផងដែរ។

ស្ថិតក្នុងកាលៈទេសៈដ៏លំបាកនេះប្រជាជនយើងពិតជាមានភ័ព្វសំណាងណាស់ ដែលយើងមានថ្នាក់ដឹកនាំកំពូល មានភាពវ័យឆ្លាតក្នុងការដោះស្រាយបញ្ហាបានលឿន និងឆាប់រហ័សជាក់ស្ដែងរឿងហេតុដែលកើតមានកន្លងមកនេះ ប្រសិនបើយើងគ្មានថ្នាក់ដឹកនាំប្រកបដោយបញ្ញាញាណទេនោះ វាសនាប្រទេសជាតិប្រហែលជួបបញ្ហាច្រើន នេះដោយសារភាពវាងវៃរបស់ប្រមុខដឹកនាំប្រទេសដែលមានសម្ដេចអគ្គមហាសេនាបតីតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ជាប្រមុខ។

លោកវរសេនីយ៍ឯក បានគូសរំលេចអំពីគុណតម្លៃមិនអាចកាត់ថ្លៃបាននៃសន្តិភាព ហើយទុក្ខលំបាករបស់បងប្អូន ពូ មីង ទាំងអស់ដែលកំពុងជួបប្រទះនាពេលនេះគឺជាលទ្ធផលនៃសង្គ្រាម ដែលពូមីងធ្លាប់បានឆ្លងកាត់ធ្លាប់បានស្គាល់រាប់ទសវត្សរ៍យូរមកហើយទម្រាំកម្ពុជាស្វែងរកបានមកវិញនូវសន្តិភាពកាលពីចុងឆ្នាំ១៩៩៨ នៅពេលនេះយើងទាំងអស់គ្នាត្រូវការសន្តិភាពយើងមិនត្រូវការសង្គ្រាមទៀតទេ រួមទាំងសង្គ្រាមដែលបង្កឡើងដោយពួកឈ្លានពាន រាប់ទាំងការញុះញង់របស់ពួកប្រឆាំង និងពួកអាមិត្តតែងតែបង្ករអរិភាពចង់ទាញកម្ពុជាឱ្យធ្លាក់ទៅក្នុងភ្លើងសង្គ្រាមជាថ្មី។

ក្នុងន័យនេះលោកបានធ្វើការអំពាវនាវឱ្យបង ប្អូន ពូ មីង ទាំងអស់គ្នាចូលរួមបន្តថែរក្សាសន្តិភាព និងការពារសន្តិភាពឱ្យខាងតែបាន ដើម្បីជាគុណប្រយោជន៍ទៅដល់ជីវភាពរស់នៅរបស់យើងផ្ទាល់ ក៏ដូចជាក្នុងការអភិវឌ្ឍជាតិ និងកសាងជាតិរបស់យើងតទៅមុខទៀត។

ក្នុងស្មារតីរួមគ្នាជាធ្លុងមួយ និងដើម្បីសម្រាលការលំបាករបស់បងប្អូនភៀសសឹក និងពលករ ក្នុងគ្រាដ៏លំបាកនេះ ក្រុមនាយទាហានវ័យក្មេងកងទ័ពជើងអាកាស បានពាំនាំនូវអំណោយ ដែលបានមកពីការកៀរគរបរិច្ចាគពីសំណាក់សប្បុរសជន សម្រាប់ចែកជូនដល់បងប្អូនប្រជាជនភៀសសឹកចំនួន ១៧៧គ្រួសារ ក្នុងក្នុងនោះ ១គ្រួសារទទួលបាន៖ អង្ករ ១បាវ (២០គ.ក),មី ១កេស, ទឹកត្រី ១យួរ, ត្រីខ ១យួរ, ទឹកស៊ីអ៊ីវ ១យួរ, និងទឹកសុទ្ធ ១យួរ ជាពិសេសលោកស្រី ជឹម ម៉ានី ប្រាក់ វណ្ណឌី បានចូលរួមឧបត្ថម្ភថវិកាចំនួន ៥០.០០០រៀល ក្នុងមួយគ្រួសារ។

លោកវរសេនីយ៍ឯក សំណាង ពុទ្ធិនាថ បានធ្វើការផ្ដាំផ្ញើបងប្អូនជនភៀសសឹក និងពលករ សូមជឿជាក់លើការដឹកនាំរបស់រាជរដ្ឋាភិបាលកម្ពុជា បាននិងកំពុងស្វះស្វែង និងរៀបចំការងារជាច្រើននៅតាមរាជធានី ខេត្តទូទាំងប្រទេសសម្រាប់ជូនបងប្អូនពលករដែលទើបវិលត្រឡប់មកពីក្រៅប្រទេស ក៏ដូចជាប្រជាពលរដ្ឋនៅទូទាំងប្រទេសផងដែរ សូមបងប្អូនធ្វើការទំនាក់ទំនងជាមួយអាជ្ញាធរដែនដី ឬទំនាក់ទំនងផ្ទាល់ទៅដល់ទីកន្លែងដែលមានការជ្រើសរើសកម្លាំងពលកម្មទូទាំងប្រទេសដើម្បីបងប្អូនឆាប់បានការងារធ្វើបន្តនិរន្តភាពជីវភាពរស់នៅប្រចាំថ្ងៃ។

តាងនាមលោកមេបញ្ជាការ និងគ្រួសារកងទ័ពជើងអាកាស ក៏ដូចជាក្រុមការងាររាជរដ្ឋាភិបាល សូមថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ដែលបានចូលរួមចំណែកក្នុងការងារមនុស្សធម៌នេះ ហើយនេះមិនត្រឹមតែជាទឹកចិត្តកងទ័ពនោះទេ តែជាបង្ហាញនូវស្មារតីសាមគ្គីភាព ឯកភាពជាតិ និងក្ដីស្រឡាញ់ក្នុងនាមឈាមជ័រជាខ្មែរដូចគ្នា៕