(ឧត្តរមានជ័យ)៖ នៅព្រឹកថ្ងៃទី២៤ ខែសីហា ឆ្នាំ២០២៥ លោក អ៊ុច បូររិទ្ធ ប្រធានស្ដីទីព្រឹទ្ធសភា តំណាងរបស់សម្តេចតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានដឹកនាំគណៈប្រតិភូព្រឹទ្ធសភា ដើម្បីជួបសំណេះសំណាលសាកសួរសុខទុក្ខ និងនាំយកអំណោយជាគ្រឿងឧបភោគបរិភោគ ថ្នាំពេទ្យ និងសម្ភារៈប្រើប្រាស់ផ្សេងៗ ជូនតំណាងវីរយុទ្ធជនការពារប្រាសាទតាមាន់ វីរយុទ្ធជនការពារប្រាសាទក្របី មន្ទីរសុខាភិបាលខេត្តឧត្តរមានជ័យ នៅក្នុងបរិវេណសាលាខេត្តឧត្តរមានជ័យព្រមទាំងជនភៀសសឹកចំនួន២៦៧គ្រួសារ ដែលកំពុងស្នាក់បណ្ដោះអាសន្ននៅមណ្ឌលសុវត្ថិភាពស្ថិតក្នុងវត្តភ្នំកំបោរ ភូមិគាប ឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ។

ថ្លែងសំណេះសំណាលដាច់ដោយឡែកពីគ្នា លោក អ៊ុច បូររិទ្ធ បាននាំការផ្តាំផ្ញើសាកសួរសុខទុក្ខ និងពរជ័យរបស់ សម្តេចតេជោ ប្រមុខរដ្ឋស្ដីទី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់វីរយុទ្ធជនដែលកំពុងឈរជើងយ៉ាងរឹងមាំនៅគ្រប់ទីកន្លែងនិយាយជារួម និងនិយាយដោយឡែកនៅក្នុងខេត្តឧត្តរមានជ័យ និងបងប្អូន អ៊ំ ពូ មីង ក្មួយៗ និងចៅៗជាជនភៀសឹកទាំងអស់ដែលកំពុងស្នាក់នៅក្នុងវត្តភ្នំកំបោរ ដែលទទួលបានការយកចិត្តទុកដាក់ថែទាំយ៉ាងម៉ត់ចត់ពីសំណាក់អាជ្ញាធរខេត្តឧត្តរមានជ័យ។

ប្រធានស្ដីទី បានវាយតម្លៃខ្ពស់ និងសម្តែងនូវគារវកិច្ចគោរពចំពោះវីរភាពដ៏អង់អាចក្លាហាន មោះមុតរបស់វីរយុទ្ធជនដែលបាននិងកំពុងលះបង់កម្លាំងកាយ-ចិត្ត បូជាអាយុជីវិត តស៊ូ អត់ធ្មត់ ក្រាញននៀល ក្នុងការការពារជាតិមាតុភូមិកម្ពុជា និងបានសម្តែងនូវមោទនភាពជាតិខ្ពស់ចំពោះស្មារតីស្នេហាជាតិរបស់បងប្អូនជនរួមជាតិទាំងអស់ទាំងក្នុង និងក្រៅប្រទេស ដែលបានសម្តែងឲ្យឃើញនូវកម្លាំងមហាសាមគ្គីឯកភាពជាតិជាធ្លុងមួយដើម្បីបុព្វហេតុជាតិមាតុភូមិ វាយបំបាក់អំពើឈ្លានពានរបស់កងទ័ពថៃ ក្រោមការដឹកនាំប្រកបដោយគតិបណ្ឌិត និងវៃឆ្លាតរបស់សម្តេចតេជោ ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត ប្រមុខរាជរដ្ឋាភិបាលនៃព្រះរាជាណាចក្រកម្ពុជា។

ទន្ទឹមគ្នានេះ ជាមួយនឹងការសម្តែងនូវមនោសញ្ចេតនាភាតរៈ រួមសុខរួមទុក្ខជាមួយប្រជាពលរដ្ឋភៀសសឹក និងការប្តេជ្ញារួមចំណែកជួយឧបត្ថម្ភគាំទ្រដល់បងប្អូននៅក្នុងកាលៈទេសៈដ៏លំបាកនេះ ប្រធានស្ដីទី បានគូសបញ្ជាក់ថា «ទុក្ខលំបាករបស់បងប្អូន គឺជាទុក្ខលំបាករបស់ថ្នាក់ដឹកនាំ និងប្រជាពលរដ្ឋយើងទាំងអស់នៅទូទាំងប្រទេស»។ «សុឆន្ទៈ និងការប្តេជ្ញារបស់កម្ពុជាក្នុងការរក្សាការពារសុខសន្តិភាព មិនមែនបានន័យថា កម្ពុជាសុខចិត្តសម្បទានខឿនឯករាជ្យ អធិបតេយ្យ និងបូរណភាពដែនដីនោះទេ តែជាការប្តេជ្ញាដាច់ខាតរបស់បងប្អូននៅក្នុងទូទាំងប្រទេសរួមសាមគ្គីឯកភាពជាតិជាធ្លុងមួយការពារទឹកដីមាតុភូមិមិនឱ្យបាត់បង់ សូម្បីតែមួយមីល្លីម៉ែត្រ»។

ជាចុងក្រោយ ប្រធានស្ដីទី បានបួងសួងដល់គុណបុណ្យព្រះរតនៈ ត្រ័យ គុណកែវទាំងបី សូមតាមអភិបាលប្រោះព្រំ ឃុំគ្រងថែរក្សា និងប្រសិទ្ធពរជ័យសិរិសួស្ដី ជូនវីរយុទ្ធជនក្នុងសមរភូមិដ៏អង់អាចក្លាហាននៅតាមព្រំដែនទទួលបានជ័យជម្នះលើសមរភូមិ កម្ចាត់បច្ចាមិត្តឈ្លានពានឲ្យវិនាសអន្តរាយឲ្យខាងតែបាន និងជូនដល់បងប្អូនប្រជាជនភៀសសឹក សូមប្រកបតែសុខសុវត្ថិភាព និងសុខភាពល្អ។

ឆ្លើយតបទៅនឹងទឹកចិត្តដ៏ប្រពៃថ្លៃថ្លាបំផុតរបស់សម្តេចតេជោ និងសម្តេចកិត្តិព្រឹទ្ធបណ្ឌិត និងគណៈប្រតិភូព្រឹទ្ធសភា តំណាងវីរយុទ្ធជននៅសមរភូមិ និងតំណាង អាជ្ញាធរខេត្តឧត្តរមានជ័យ ព្រមទាំងប្រជាជនភៀសសឹក បានសម្ដែងនូវការដឹងគុណយ៉ាងជ្រាលជ្រៅចំពោះសមានចិត្តដ៏បរិសុទ្ធថ្លៃ ថ្លាមិនអាចកាត់ថ្លៃបានរបស់ សម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលតែងតែផ្សាភ្ជាប់ជាមួយនឹងវីរយុទ្ធជននៅតាមសមរភូមិមុខ ក៏ដូចជាប្រជាជននៅទូទាំងប្រទេស និងប្តេជ្ញាដាច់ខាតវាយឲ្យបរាជ័យរាល់ការការប៉ុនប៉ងរំលោភឈ្លានពានរបស់ថៃមកលើដែនអធិបតេយ្យកម្ពុជា៕