(ភ្នំពេញ)៖ លោកឧត្តមសេនីយ៍ឯក គឹម វណ្ណា នាយកមជ្ឈមណ្ឌលស្រាវជ្រាវយុទ្ធសាស្ត្រយោធាអគ្គបញ្ជាការ នៅព្រឹកថ្ងៃទី២៥ ខែសីហា ឆ្នាំ២០២៥ បានដឹកនាំគណប្រតិភូយោធាចំណុះមជ្ឈមណ្ឌល ចុះសួរសុខទុក្ខយុទ្ធជនរងរបួស ក្នុងអំឡុងពេលប្រយុទ្ធនៅតំបន់ព្រំដែនកម្ពុជា-ថៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ដែលកំពុងសម្រាកព្យាបាល នៅមន្ទីរពេទ្យព្រះកេតុមាលា។

ក្នុងឱកាសនោះលោកឧត្តមសេនីយ៍ឯក គឹម វណ្ណា បានពាំនាំនូវការផ្តាំផ្ញើសួរសុខទុក្ខពីសំណាក់នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ជាពិសេសសម្តេចតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

លោកឧត្តមសេនីយ៍ឯក គឹម វណ្ណា ជំនួសមុជំនួសមុខឱ្យនាយទាហានពលទាហានក្នុងមជ្ឈមណ្ឌលស្រាវជ្រាវយុទ្ធសាស្រ្តយោធា អគ្គបញ្ជាការទាំងអស់ បានថ្លែងអំណរគុណ និងកោតសរសើរបំផុតចំពោះគុណបំណាច់វីរភាពដ៏អង់អាចក្លាហានរបស់កងទ័ពដែលបានលះបង់ខ្ពស់យកអាយុជីវិតប្តូរផ្តាច់ការពារបូរណភាពទឹកដីរបស់យើង។ លោកឧត្តមសេនីយ៍ឯក គឹម វណ្ណា បានថ្លែងរំលឹកបង្ហាញការគោរពនូវវីរភាព នៃវីរយុទ្ធជនការពារជាតិទាំងអស់ដែលកំពុងឈរជើងការពារ ដែនអធិបតេយ្យភាពជាតិទាំងយប់ទាំងថ្ងៃយ៉ាងអង់អាចក្លាហានជាទីបំផុត ក្នុងភូមិសាស្ត្រព្រំដែនខេត្តព្រះវិហារ និងខេត្តឧត្តរមានជ័យ។

លោកឧត្តមសេនីយ៍ឯក គឹម វណ្ណា បានបញ្ជាក់ថា កងទ័ពជំនាញនៅសមរភូមិក្រោយរួមជាមួយរាជរដ្ឋាភិបាលដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីដឹកនាំប្រទេសប្រកបដោយការឈ្លាសវៃ និងប៉ិនប្រសប់ក្នុងសម័យឌីជីថល បានអត់ធ្មត់ខ្ពស់ប្តេជ្ញាចិត្តក្នុងការស្វែងរកដំណោះស្រាយជម្លោះតាមច្បាប់អន្តរជាតិ និងប្រកបដោយសន្តិវិធី ព្រមទាំងរក្សាជំហរយ៉ាងមុតមាំទាំងកងទ័ព ទាំងប្រជាជនទូទាំងប្រទេសដោយគោរពអធិបតេយ្យរបស់ប្រទេសជិតខាង ប៉ុន្តែមិនអនុញ្ញាតជាដាច់ខាតនូវការគំរាមកំហែង ឬការប៉ុនប៉ងរំលោភឈ្លានពាន ណាមួយឡើយពីសំណាក់ប្រទេសជិតខាង។

លោកឧត្តមសេនីយ៍ឯក គឹម វណ្ណា បានបន្តថា៖​ «កងទ័ព និងកងកម្លាំងប្រដាប់អាវុធគ្រប់ប្រភេទ ប្តេជ្ញាចិត្តគាំទ្រនិងចូលរួមជាមួយ រាជរដ្ឋាភិបាលនូវគ្រប់មធ្យោបាយ គ្រប់រូបភាពដើម្បីធានាថា យើងទាំងអស់គ្នា រួមគ្នាជាធ្លុងមួយដើម្បីការពារសុខសន្តិភាព បូរណភាពទឹកដី និងអធិបតេយ្យភាពជាតិយើង ទោះជាក្នុងតម្លៃណាក៏ដោយ»។

នាយកមជ្ឈមណ្ឌលស្រាវជ្រាវយុទ្ឋសាស្ត្រយោធា អគ្គបញ្ជាការ បានផ្តល់នូវការលើកទឹកចិត្ត និងជូនពរដល់វីរយុទ្ធជនរងរបួសទាំងអស់ សូមឆាប់បានជាសះស្បើយពីរបួសស្នាម នឹងអាចវិលត្រឡប់ទៅអង្គភាពរបស់ខ្លួនវិញ ក្នុងពេលឆាប់ៗនេះ៕