(ភ្នំពេញ)៖​​ ក្រសួងសុខាភិបាល បានបើកវគ្គបណ្តុះបណ្តាលគ្រូបង្គោល ស្តីពីការពិនិត្យមរណភាពមាតា និងទារកជុំវិញកំណើត និងការឆ្លើយតប សម្រាប់មន្ទីរពេទ្យថ្នាក់ខេត្តចំនួន៥ ដែលបានរៀបចំដោយក្រសួងសុខាភិបាល តាមរយៈមជ្ឈមណ្ឌលជាតិគាំពារមាតា និងទារក និងមន្ទីរពេទ្យថ្នាក់ជាតិ ដែលគាំទ្រថវិកា និងបច្ចេកទេសដោយ UNFPA និង រដ្ឋាភិបាលអូស្រ្តាលី។ វគ្គបណ្តុះបណ្តាលនេះ ប្រព្រឹត្តទៅចាប់ពីថ្ងៃទី២៥ ដល់២៩ ខែសីហា ឆ្នាំ២០២៥។

ពិធីបើកវគ្គបណ្តុះបណ្តាលគ្រូបង្គោលនេះ បានធ្វើឡើងក្រោមអធិបតីភាព លោកស្រីសាស្ដ្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល ក្នុងនោះក៏មានការអញ្ជើញចូលរួមពីលោកស្រី Sandra Bernklau តំណាងអង្គការ UNFPA ប្រចាំកម្ពុជា, លោកស្រីវេជ្ជបណ្ឌិត ជាង កន្និថា តំណាងអង្គការសុខភាពប្រចាំកម្ពុជា នាយករងមជ្ឈមណ្ឌលជាតិគាំពារមាតា និងទារក រួមជាមួយនិងសិក្ខាកាមសរុបចំនួន១០០។

លោកស្រីសាស្ដ្រាចារ្យ អ៊ឹម សិទ្ធិការ្យ បានថ្លែងថា «ការចំណាយពេលវេលាមកចូលរួមក្នុងវគ្គបណ្តុះបណ្តាលថ្ងៃនេះ ក្នុងគោលបំណង អភិវឌ្ឍន៍សមត្ថភាពរបស់គណៈកម្មការ MPDSR រាជធានីខេត្តទាំង៥ មានដូចជា ខេត្តកំពត តាកែវ កំពង់ស្ពឺ កំពង់ឆ្នាំង និងខេត្តបាត់ដំបង ស្តីពីការពិនិត្យមរណភាពមាតា និងទារកជុំវិញកំណើត និងការឆ្លើយតប ដើម្បីពន្លឿនការកាត់បន្ថយអត្រាមរណភាពមាតា និងទារកនិងលើកកម្ពស់ គុណភាពនៃសេវាសុខភាពមាតា និងទារក នៅកម្ពុជា»។

ជាមួយគ្នានេះលោកស្រីរដ្ឋលេខាធិការក្រសួងសុខាភិបាល​ ក៏បានកោតសរសើរពីវឌ្ឍនភាពនៃការពង្រឹងប្រព័ន្ធ MPDSR ចាប់តាំងពីការបណ្តុះបណ្តាលក្នុងខែ ទាំង៨ ការបង្កើតគណៈកម្មការ​ MPDSR មន្ទីរពេទ្យជាតិ ការពិនិត្យករណីមរណភាពចំនួន១១៣ករណី ក្នុងមីនាកន្លងមក រហូតដល់ពេលបច្ចុប្បន្ននេះ។ សមិទ្ធផលទាំងនេះរួមមាន ការបណ្តុះបណ្តាលមន្ទីរជាតិ ឆ្នាំ២០២៣-២០២៤ និងការពិនិត្យករណីមរណភាពមាតានិងទារក ជុំវិញកំណើតចំនួន ២៩ករណី (មាតា១៩ករណី និងទារកចំនួន១០ករណី) ក្នុងឆ្នាំ២០២៥ ហើយដែលក្រុមការងារថ្នាក់ជាតិ កំពុងតែបន្តចូលរួមយ៉ាងសកម្មរបស់គណៈកម្មការ MPDSR ថ្នាក់ជាតិ មន្ទីរពេទ្យជាតិ មន្ទីរសុខាភិបាល និងមូលដ្ឋានការវិភាគករណីដែលកើតឡើងថ្មីៗ។ ការងារនេះអាចជោគជ័យទៅបានអាស្រ័យលើការប្តេជ្ញាចិត្ត សុខាភិបាលទាំងអស់។

លោកស្រីសាស្ដ្រាចារ្យ អ៊ឹម សិទ្ធិការ្យ បានថ្លែងទៀតថា ជាជំហានបន្ទាប់គឺការបណ្តុះបណ្តាលស្តីពី MPDSR សម្រាប់ថ្នាក់រាជធានី-ខេត្តទាំងអស់នៅទូទាំងប្រទេស។ ជាក់ស្តែងនៅថ្ងៃនេះគណ:កម្មាការថ្នាក់ជាតិ បានរៀបចំវគ្គនេះ សម្រាប់ថ្នាក់ខេត្តចំនួន៥ ដែលមានអត្រាមរណភាពមាតាខ្ពស់។ ហើយនេះក៏ជាវគ្គទី១សម្រាប់ថ្នាក់ខេត្ត។ នាឱកាសនេះលោកស្រីបានថ្លែងអំណរគុណដល់រដ្ឋាភិបាលអូស្ត្រាលី, មូលនិធិសហប្រជាជាតិ សម្រាប់ប្រជាជន (UNFPA) ដែលបានជួយគាំទ្រទាំងបច្ចេកទេស និងថវិកា
មជ្ឈមណ្ឌលជាតិគាំពារមាតានិងទារក គ្រូបង្គោលថ្នាក់ជាតិ គ្រូបង្គោលមន្ទីរជាតិ និងដៃគូពាក់ព័ន្ធ ដែលបានរៀបចំឱ្យមានវគ្គបណ្តុះបណ្តាលនេះឡើង និងបន្តគាំទ្រ តាមរយៈការបង្កើតប្រព័ន្ធតាមដាន វឌ្ឍនភាពការងារ MPDSR តាមប្រព័ន្ធនិម្មិត ការចែករំលែកភស្តុងតាងរកឃើញថ្មីៗ និងផ្តោតលើការឆ្លើយតប ដែលជាសមាសភាគសំខាន់នៃប្រព័ន្ធ MPDSR។

ទន្ទឹមនឹងនេះដែរលោកស្រីសាស្ដ្រាចារ្យ ក៏បានផ្ដល់អនុសាសន៍មួយចំនួន ជូនដល់អង្គកម្មវិធីដែលមានដូចជា៖​​

ទី១៖ ត្រូវបង្កើត គណៈកម្មការ MPDSR ថ្នាក់ខេត្ត ដែលជាអ្នកបានចូលរួមក្នុងវគ្គបណ្តុះបណ្តាលក្នុងឱកាសនេះ, និងយោងតាមការណែនាំរបស់ពីធីសារជាតិស្តីពីការពិនិត្យមរណភាពមាតា និងទារកជុំវិញកំណើត និងការឆ្លើយ តបឆ្នាំ២០២៥ ដែលបានប្រកាសដាក់ឱ្យប្រើប្រាស់កាលពីខែកក្កដាកន្លងទៅថ្មីៗនេះ។

ទី២៖ គណៈកម្មការនេះមានភារកិច្ចបណ្តុះបណ្តាលបន្តដល់គណៈកម្មការ MPDSR មន្ទីរពេទ្យរាជធានីខេត្ត និងឈានបន្តដល់មន្ទីរពេទ្យបង្អែកស្រុក។ ការធ្វើបែបនេះ ក្នុងគោលបំណងដើម្បីកំណត់រកបញ្ហាខ្វះខាត នៃសេវាសុខាភិបាលរបស់យើង និងធ្វើផែនការឆ្លើយតបបានទាន់ពេលវេលា និងបង្កើនការយល់ដឹងពី ការងារ​ MPDSR ដើម្បីកាត់បន្ថយអត្រាមរណភាពមាតានិងទារកជុំវិញកំណើត

ទី៣៖ គណៈកម្មកាថ្នាក់ខេត្តនេះ មានភារកិច្ចក្នុងការពិនិត្យមរណភាពមាតា និងទារកជុំវិញកំណើត និងការឆ្លើយតបសម្រាប់មូលដ្ឋានសុខាភិបាល (ក្នុងតំបន់គ្របដណ្តប់របស់ខ្លួន) ដែលគ្មានគណៈកម្មការ MPDSR, ករណីស្លាប់នៅគ្លីនិក និង ករណីស្លាប់នៅក្រៅមូលដ្ឋានសុខាភិបាល (សហគម៍)។

ជាមួយគ្នានេះលោកស្រី អ៊ឹម សិទ្ធិការ្យ ក៏បានអំពាវនាវដល់មន្ទីរសុខាភិបាល និងមន្ទីរពេទ្យរាជធានីខេត្តរាយការណ៍ករណីមរណភាពមាតា និងទារកឲ្យបានទាន់ពេលវេលាមកគណៈកម្មការ MPDSR ថ្នាក់ជាតិ គឺរបាយកាណ៍ក្នុងរយៈពេល៣ម៉ោង បន្ទាប់ពីមានករណីមរណភាព គឺជារបាយការណ៍វេជ្ជសាស្ត្របឋម ស្តីពីមរណភាព ដែលមានការចុះហត្ថលេខាពីប្រធានផ្នែក និងប្រធានបច្ចេកទេស និងរបាយការណ៍ ៧២ម៉ោង ជារបាយការណ៍ពិនិត្យមរណភាពមាតា និងទារកជុំវិញកំណើតនិង ការឆ្លើយតប ដែលមានចុះហត្ថលេខាពី គណ:កម្មាការថ្នាក់ខេត្ត និងប្រធានមន្ទីរសុខាភិបាលខេត្ត។

ក្នុងនោះក្រសួងសុខាភិបាល នឹងបន្តគាំទ្រ និងពង្រឹងគុណភាពនៃផ្តល់សេវាសុខភាពមាតា និងទារក តាមរយៈការប្រើប្រាស់ភស្តុតាងថ្មីពីប្រព័ន្ធពិនិត្យមរណភាពមាតា-ទារក និងឆ្លើយតប និងពង្រីក ប្រសិទ្ធភាពនៃប្រព័ន្ធទៅគ្រប់មូលដ្ឋានសុខាភិបាលរាជធានី-ខេត្តទាំងអស់នៅទូទាំងប្រទេស ដើម្បីរួមគ្នាសម្រេចបាននូវគោលដៅនៃរបៀបវារៈសន្និសិទ្ឋិអន្តរជាតិស្តីពី ប្រជាជន និងការអភិវឌ្ឍន៍ (ICPD) និងគោលដៅគ្របដណ្តប់សុខភាពជាសកលត្រឹមឆ្នាំ២០៣០៕