(កំពង់ធំ)៖ លោក សួគ៌ ប៊ុនធង អភិបាលរងស្រុក ខេត្តកំពង់ធំ បានណែនាំឱ្យអាជ្ញាធរមូលដ្ឋានត្រូវយកចិត្តទុកដាក់ខ្ពស់ដល់សុខទុក្ខសុខុមាលភាពកុមារកំព្រា និងអ្នកងាយរងហានិភ័យ។

ការណែនាំបែបនេះរបស់លោក សួគ៌ ប៊ុនធង បានធ្វើឡើងនៅក្នុងឱកាសដែលលោកតំណាងលោក សាយ គឹមឡម អភិបាលស្រុកស្ទោង និងសហការី បានអញ្ជើញជួបសំណេះសំណាលសួរសុខទុក្ខលើកទឹកចិត្តកុមារីកំព្រា នៅភូមិកំពង់ប្រដុំ ឃុំម្សាក្រង ស្រុកស្ទោង ខេត្តកំពង់ធំ នៅព្រឹកថ្ងៃទី២៥ ខែសីហា ឆ្នាំ ២០២៥។

លោកបានបន្ថែមថា ក្នុងនាមរដ្ឋបាលស្រុក និងសហភាពសហព័ន្ធយុវជនកម្ពុជាស្រុកស្ទោង សូមលើកទឹកចិត្តដល់កុមារី ណាន វណ្ណៈ ត្រូវខិតខំសិក្សារៀនសូត្រឱ្យអស់លទ្ធភាព ហើយក្លាយខ្លួនជាសិស្សពូកែ ជាពិសេសខិតខំរៀនសូត្របន្តរហូតដល់មហាវិទ្យាល័យ ដើម្បីអនាគតភ្លឺត្រចះត្រចង់ ជាម្ចាស់លើជីវិតខ្លួនឯង និងទ្រទ្រង់សុខុមាលភាពគ្រួសារ និងបងប្អូនផងដែរ។

លោកបានថ្លែងអំណរគុណយ៉ាងជ្រាលជ្រៅបំផុតដល់លោក ឡេង ណុប និងអ្នកស្រី អ៊ុក ស៊ីណាត ព្រមទាំងលោកមេឃុំ និងសហភាពសហព័ន្ធយុវជនកម្ពុជាឃុំម្សាក្រង ដែលបានសហការ និងឧបត្ថម្ភគាំទ្រទាំងសម្ភារៈ ថវិកា ដើម្បីចូលរួមឧបត្ថម្ភដល់ក្មួយស្រីនៅក្នុងឱកាសនេះដែលជាលទ្ធភាព និងឥរិយាបថដ៏គួរឱ្យកោតសរសើរ ជាពិសេសអាចជួយសម្រាលទុក្ខលំបាករបស់ក្មួយស្រីបានមួយគ្រាផងដែរ។

លើសពីនេះលោកបានអំពាវនាវរដ្ឋបាលឃុំម្សាក្រង មណ្ឌលសុខភាពម្សាក្រង និងមន្ទីរពេទ្យបង្អែកស្ទោង សូមជួយសម្របសម្រួលហើយព្យាបាលជូនប្អូនស្រី និងប្អូនប្រុសដោយឥតគិតថ្លៃ ប្រសិនបើមានកាលៈទេសៈ និងស្ថានភាពត្រូវថែទាំនិងព្យាបាលជំងឺថែមទៀត។

ឆ្លៀតក្នុងឱកាសនោះលោក សួគ៌ ប៊ុនធង បានអញ្ជើញជួបសំណេះសំណាលសួរសុខទុក្ខឧបត្ថម្ភដល់គ្រួសារពលករដែលទើបធ្វើមាតុភូមិនិវត្តន៍ ពីប្រទេសថៃនៅភូមិស្វាយស ឃុំកំពង់ចិនត្បូង ស្រុកស្ទោង ខេត្តកំពង់ធំថែមទៀតផង។

សូមបញ្ជាក់ថា កុមារី ណាន វណ្ណៈ ជាក្មេងកំព្រាឪពុក ម្ដាយ នៅតែ២នាក់ ប្អូនប្រុស ហើយនៅក្នុងឱកាសនេះលោក សួគ៌ ប៊ុនធង បានឧបត្ថម្ភនូវគ្រឿងឧបភោគបរិភោគ សម្ភារប្រើប្រាស់មួយចំនួននិងថវិកាសរុប ៣០ម៉ឺនរៀលផងដែរ៕