(ភ្នំពេញ)៖ លោក ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) និងលោក Takayama Ryori ប្រធានអង្គការ បោសសម្អាតមីន និងអភិវឌ្ឍសហគមន៍ (IMCCD) បានចុះហត្ថលេខា លើកិច្ចសហប្រតិបត្តិការជាដៃគូ លើគម្រោង «បោសសម្អាតមីនតោនតាមសហគមន៍»។

ការចុះហត្ថលេខានេះ បានរៀបចំធ្វើឡើងនៅថ្ងៃទី២៥ ខែសីហា ឆ្នាំ២០២៥នេះ នៅទីបញ្ជាការស៊ីម៉ាក់ភ្នំពេញ ក្នុងគោលបំណង ដើម្បីអនុវត្តការបោសសម្អាតគ្រាប់មីន ប្រឆាំងយាន្តយន្ត នៅតំបន់ដែលមានតម្រូវការ ក្នុងការអភិវឌ្ឍន៍ និងដើម្បីលើកកម្ពស់សកម្មភាពសេដ្ឋកិច្ចសង្គម ឱ្យកាន់តែប្រសើរ​។

កិច្ចសហការនេះ​ ត្រូវអនុវត្តគម្រោងបោសសម្អាតមីន ក្នុងខេត្តបាត់ដំបង និងខេត្តប៉ៃលិន។ គម្រោងនេះ ចាប់ផ្តើមអនុវត្តចាប់ពីថ្ងៃទី១៦ ខែសីហា ឆ្នាំ២០២៥ ដល់ថ្ងៃទី១៥ ខែសីហា ឆ្នាំ២០២៦។

បើតាមលោក ហេង រតនា, អង្គការបោសសម្អាតមីន និងអភិវឌ្ឍសហគមន៍ (IMCCD) បានចាប់ផ្ដើមកិច្ចប្រតិបត្តិការរបស់ខ្លួន ជាមួយអង្គភាព CMAC តាំងពីឆ្នាំ២០១១មកម្លេះ គិតមកដល់ត្រឹមឆ្នាំ២០២៥នេះ គម្រោងនេះ មានរយៈពេល១៥ឆ្នាំហើយ។

លោក ហេង រតនា បានលើកឡើងថា គម្រោង IMCCD នេះ ផ្ដោតសំខាន់លើការបោសសម្អាតគា្រប់មីនប្រឆាំងមនុស្ស និងសំណល់យុទ្ធភណ្ឌ័មិនទាន់ផ្ទុះគ្រប់ប្រភេទ ជាពិសេសការបោសសម្អាតគ្រាប់មីនប្រឆាំងរថក្រោះ។

តាមរយៈគម្រោង IMCCD នេះ បានចូលរួមចំណែកផ្តល់ជូនប្រជាពលរដ្ឋ កាន់តែមានសុខសុវត្ថិភាព ក្នុងការប្រើប្រាស់ដីធ្វើកសិកម្ម សង់លំនៅដ្ឋាន សាលារៀន និងមន្ទីរពេទ្យជាដើម ជាពិសេសការអភិវឌ្ឍន៍ហេដ្ឋារចនាសម្ព័ន្ធ ក្នុងសហគមន៍ក៏ដូចជាសង្គម។

សូមរំលឹកថា​ លោក Takayama Ryori ជាអតីតកងទ័ពជប៉ុន និងបានចូលរួមចំណែកក្នុងបេសសកម្ម UNTAC នៅកម្ពុជា ក្នុងឆ្នាំ១៩៩៣​ និងបានចូលរួមចំណែក ក្នុងវិស័យសកម្មភាពកម្ចាត់មីនជាង២៥ឆ្នាំមកហើយ​។​ នៅដើមឆ្នាំ២០០០​ បានផ្តួចផ្តើមការដោះមីននៅឃុំ ដែលមានគ្រាប់មីនច្រើន និងមនុស្សរស់នៅច្រើនដែរ​ គឺជ្រើសរើសយកឃុំតាសែន​ ស្រុកកំរៀង​ ខេត្តបាត់ដំបង​ ជាឃុំមានគ្រាប់មីនច្រើន និងស្ថិតជាប់ជាមួយព្រំដែនថៃ​។

ក្នុងនោះ បានបោសសម្អាតគ្រាប់មីនផង​ ចលនាសប្បុរជនកសាងសាលារៀនផង​ និងជាពិសេសលោក​ Takayama បានចូលរួមកៀរគរអ្នកវិនិយោគជប៉ុន​ បានកសាងរោងចក្រខ្នាតមធ្យម ចំនួន៥រោងចក្រនៅតំបន់ដាច់ស្រយាល​ រហូតបានផលិតសុរាខ្មែរ ផលិតពីដំឡូង និងស្វាយកែវល្មៀត ទៅប្រឡងជាប់ថ្នាក់ស្រាល្អ នៅប្រទេសបារាំងទៀតផង។

លោក ហេង រតនា មានក្តីសង្ឃឹមយ៉ាងមុតមាំថា ​ជាមួយគោលនយោបាយ ដែលរាជរដ្ឋាភិបាលទើបតែដាក់ចេញថ្មីៗនេះ​ ក្នុងការពង្រឹងកិច្ចសហការ បោសសម្អាតគ្រាប់មីន នៅតំបន់ព្រំដែន កម្ពុជា-ថៃ​ ដោយផ្តល់អាទិភាពជាចំបង ចំពោះទីតាំងណា ដែលមានមនុស្សរស់នៅ និងប្រើប្រាស់ដីធ្លី​ ដើម្បីធានាសុខសុវត្ថិភាព និងផលប្រយោជន៍សេដ្ឋកិច្ចសង្គម​។ ដូចនេះ ឃុំតាសែន​ ស្រុកកំរៀង ដែលមានចម្ការមីនខ្លះជាប់ព្រំដែន​ អាចត្រូវបានបោសសម្អាតទាំងស្រុង៕