(កណ្តាល)៖ កាលពីយប់ថ្ងៃទី២០ ខែសីហា ឆ្នាំ២០២៥ នៅភូមិត្រពាំងស្វា ឃុំទ្រា ស្រុកកណ្ដាលស្ទឹង ខេត្តកណ្ដាល មានករណីមនុស្សញៀនថ្នាំម្នាក់ បានចូលទៅវាយនឹងចបជីកបណ្តាលឲ្យស្លាប់ស្រ្តីម្នាក់ និងប្តីរបួសធ្ងន់ នៅពេលនេះ ជនដៃដល់ត្រូវបានកម្លាំងអាវុធហត្ថតាមចាប់ខ្លួនបានហើយ។

យោងតាមរបាយការណ៍របស់អាវុធហត្ថខេត្តកណ្តាល បានឲ្យដឹងថា ជនរងគ្រោះ២នាក់ រួមមាន៖

*ទី១៖ ឈ្មោះ ម៉ាន់ សុគន្ធា អាយុ៤០ឆ្នាំ មុខរបរលក់ដូរ បច្ចុប្បន្នរស់នៅភូមិត្រពាំងស្វា ឃុំទ្រា ស្រុកកណ្ដាលស្ទឹង របួសក្បាលចំនួន០៤កន្លែង និងដៃខាងស្តាំចំនួន០១កន្លែង ស្លាប់ពេលបញ្ជូនដល់មន្ទីរពេទ្យ (ប្រពន្ធ)។
*ទី២៖ ឈ្មោះ កុយ ពៅ អាយុ៥១ឆ្នាំ មុខរបរកម្មករ បច្ចុប្បន្នរស់នៅភូមិត្រពាំងស្វា ឃុំទ្រា ស្រុកកណ្ដាលស្ទឹង ខេត្តកណ្ដាល (របួសធ្ងន់ ក្បាល០១កន្លែង ជើងស្តាំ០១កន្លែង និងដៃស្តាំ០១កន្លែង កំពុងសំរាកព្យាបាលនៅមន្ទីរពេទ្យបង្អែកស្រុកកណ្តាលស្ទឹង)។

ក្រោយមានឃាតកម្មនេះកើតឡើង កម្លាំងអាវុធហត្ថខេត្តកណ្តាល បានសហការជាមួយកម្លាំងអាវុធហត្ថខេត្តតាកែវ បានធ្វើការស្រាវជ្រាវបង្ក្រាបបានជនដៃដល់ នៅវេលាម៉ោង ៨៖២០នាទីថ្ងៃទី២៥ ខែសីហា ឆ្នាំ២០២៥ នៅចំណុចភូមិត្រពាំងស្វា ឃុំទ្រា ស្រុកកណ្តាលស្ទឹង ខេត្តកណ្តាល ជាប់ព្រំប្រទល់ស្រុកបាទី ខេត្តតាកែវ។ ជនសង្ស័យឈ្មោះ ប៉ែន សុថារិទ្ធ អាយុ៣៣ឆ្នាំ មុខរបរមិនពិតប្រាកដ បច្ចុប្បន្នស្នាក់នៅភូមិត្រពាំងស្វា ឃុំទ្រា ស្រុកកណ្ដាលស្ទឹង ខេត្តកណ្តាល (មានសារធាតុញៀនក្នុងខ្លួន)។

វត្ថុតាងចាប់យក រួមមាន៖ ម៉ូតូ០១គ្រឿង និងចបជីកធ្វើពីដែក១។

យោងតាមការបំភ្លឺរបស់ឈ្មោះ អឿន កញ្ញា ភេទស្រី អាយុ១៥ឆ្នាំ (ត្រូវជាកូនជនរងគ្រោះ) មុខរបរសិស្ស បានឲ្យដឹងថា កាលពីល្ងាចថ្ងៃទី១៩ ខែសីហា ឆ្នាំ២០២៥ ជនរងគ្រោះ ម៉ាន់ សុគន្ឋា ត្រូវជាម្តាយបង្កើត បានប្រាប់គាត់ថា ជនសង្ស័យឈ្មោះ ប៉ែន សុថារិទ្ធិ មួយរយះនេះបានគប់ដុំថ្ម លើដំបូលផ្ទះគាត់រាល់ថ្ងៃ និងផ្តាំផ្ញើឲ្យខ្លួនមើលថែប្អូនផង។

លុះដល់វេលាម៉ោង ១៥៖២០នាទីថ្ងៃទី២០ ខែសីហា ឆ្នាំ២០២៥ ជនសង្ស័យបំរ៉ុងវ៉ៃប្អូនប្រុសជនរងគ្រោះតាមដងផ្លូវ ស្រាប់តែជនរងគ្រោះឃើញ និងបានស្រែកឲ្យជនសង្ស័យហើយក៏បានឈ្លោះប្រកែកគ្នាបន្តិចបន្ទួច។ រហូតដល់ម៉ោងកើតហេតុខាងលើ ជនសង្ស័យបានធ្វើសកម្មភាពវាយជនរងគ្រោះចំក្បាលចំនួន០៤កន្លែង និងដៃខាងស្តាំចំនួន០១កន្លែង ហើយស្លាប់ក្រោយពីបញ្ជូនដល់មន្ទីរពេទ្យ។ ចំណែកប្តីបានរងរបួសធ្ងន់។

ក្រោយទទួលព័ត៌មានភ្លាមៗ កម្លាំងជំនាញ អ.ហ ខេត្ត និងស្រុកកណ្តាលស្ទឹង ចុះដល់កន្លែងកើតហេតុ សាកសួរជុំវិញកន្លែងកើតហេតុ ស្រាវជ្រាវកំណត់អត្តសញ្ញាណជនសង្ស័យ លុះវេលាម៉ោង ៨៖២០នាទី ថ្ងៃទី២៥ ខែសីហា ឆ្នាំ២០២៥ កម្លាំងជំនាញ អ.ហ ខេត្ត ស្រុក បានចុះឃាត់ខ្លួនជនសង្ស័យឈ្មោះ ប៉ែន សុថារិទ្ធ នៅចំណុចភូមិត្រពាំងស្វា ជាប់ព្រំប្រទល់ស្រុកបាទី ខេត្តតាកែវ នាំខ្លួនយកមកសាកសួរនៅអង្គភាព។

ក្រោយពីសាកសួរ កម្លាំងជំនាញបានសហការជាមួយកម្លាំង អ.ហ ស្រុកបាទី ខេត្តតាកែវ នាំខ្លួនជនសង្ស័យទៅចង្អុលបង្ហាញ និងចាប់យកវត្ថុតាងចបជីក ដែលជនសង្ស័យយកទៅលាក់ទុកក្រោយធ្វើសកម្មភាព នៅចំណុចភូមិបាទី ឃុំក្រាំងធ្នង់ ស្រុកបាទី ខេត្តតាកែវ។

លោកឧត្តមសេនីយ៍ត្រី សំ តុលា មេបញ្ជាការអាវុធហត្ថខេត្តកណ្តាល បានថ្លែងថា ប្រតិបត្តិការនេះ គឺអនុវត្តភារកិច្ចស្នូលរបស់កងរាជអាវុធហត្ថ និងតាមប្រសាសន៏ដឹកនាំ ព្រមទាំងមានការយកចិត្តទុកដាក់ដ៏ខ្ពង់ខ្ពស់ ពីសំណាក់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស និងលោក គួច ចំរើន អភិបាលខេត្ត និងជាប្រធានគណៈបញ្ជាការឯកភាពខេត្តកណ្តាល ដែលមានការយកចិត្តទុកដាក់ខ្ពស់ ហើយតែងតែដាស់តឿនក្រើនរម្លឹកដល់មេបញ្ជាការ គ្រប់កងឯកភាពឲ្យ យកចិត្តទុកដាក់ពង្រឹងសន្តិសុខ សណ្តាប់ធ្នាប់សង្គម បង្ការ បង្ក្រាប រាល់បទល្មើសគ្រប់ប្រភេទនៅក្នុងមូលដ្ឋាន ដូចជាបទល្មើសគ្រឿងញៀន លួច ឆក់ ប្លន់ ឃាតកម្ម ក្មេងទំនើងជាដើម និងជួយសង្ក្រោះជនរងគ្រោះ។

ពិសេសអនុវត្តន៏តាមទិសស្លោករបស់លោក នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស «ចំពោះប្រទេសជាតិត្រូវតែការពារ ចំពោះប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប»៕