(ស្វាយរៀង)៖ លោក ប៉េង ពោធិ៍សា អភិបាលខេត្តស្វាយរៀង បានណែនាំសមត្ថកិច្ចពាក់ព័ន្ធត្រូវត្រៀមលក្ខណៈក្នុងការការពារសន្តិសុខ សណ្តាប់ធ្នាប់ឱ្យបានល្អក្នុងឱកាសប្រឡងសញ្ញាបត្រមធ្យមសិក្សាទុតិយភូមិ ដែលនឹងចូលមកដល់នាថ្ងៃទី២៨​ ខែសីហា​ ឆ្នាំ២០២៥ ខាងមុខនេះ។

ការថ្លែងណែនាំបែបនេះរបស់អភិបាលខេត្តស្វាយរៀងបានធ្វើឡើងនៅក្នុងកិច្ចប្រជុំបូកសរុបលទ្ធផលការងារប្រចាំខែសីហា និងលើកទិសដៅការងារខែកញ្ញា ឆ្នាំ២០២៥ របស់រដ្ឋបាលខេត្តស្វាយរៀង នៅព្រឹកថ្ងៃទី២៥ ខែសីហា ឆ្នាំ២០២៥។

ក្នុងឱកាសនោះ លោកអភិបាលខេត្តបានថ្លែងនូវការអរគុណចំពោះកងកម្លាំង និងអាជ្ញាធរពាក់ព័ន្ធគ្រប់លំដាប់ថ្នាក់ដែលបានយកចិត្តសហការការការពារសន្តិសុខសណ្តាប់បានល្អជូនប្រជាពលរដ្ឋនៅក្នុងខេត្ត ក្នុងនោះអរគុណ លោកអភិបាលរងខេត្ត និងក្រុមការងារពាក់ព័ន្ធទាំងអស់​ ដែលបានចំណាយពេលវេលាទៅទទួលបងប្អូនប្រជាពលរដ្ឋដែលជាពលករវិលត្រលប់មកពីប្រទេសថៃវិញ ក៏ដូចជាដឹកជញ្ជូនមកស្រុកកំណើតនៅខេត្តស្វាយរៀងជាដេីម។

លោក ប៉េង ពោធិ៍សា បានផ្ដាំផ្ញើអាជ្ញាធរ និងកងកម្លាំងពាក់ព័ន្ធទាំងស់ត្រូវបន្តការរៀបចំក្រុមការងារ និងរថយន្តទៅទទួលបងប្អូនប្រជាពលរដ្ឋដែលវិលត្រឡប់មកពីប្រទេសថៃ​ និងសហការជាមួយមន្ទីរការងារ ដើម្បីចុះឈ្មោះស្វែង រកការងារ ធ្វើផ្តល់ឱកាសការងារជូនពួកគាត់។ បន្ថែមលើសពីនេះ រដ្ឋបាលក្រុងស្រុកត្រូវពិនិត្យទប់ស្កាត់​ និងការការពារដីចំណីព្រែកពីការទន្ទ្រានកាន់កាប់ដោយខុសច្បាប់ពីសំណាក់ប្រជាពលរដ្ឋខិលខូចមួយចំនួន។

មន្ទីរកសិកម្ម និងអាជ្ញាធរមូលដ្ឋានត្រូវពិនិត្យដោះស្រាយតាមដានការបង្កបង្កើនផលស្រូវរបស់ប្រជាពលរដ្ឋនៅរដូវវស្សានេះ។ បន្តការយកចិត្តទុកដាក់លើការងារពង្រឹងបញ្ហា ភូមិ ឃុំ មានសុវត្ថិភាព ក៏ដូចជារក្សានូវសន្តិសុខ សណ្តាប់ធ្នាប់នៅក្នុងខេត្តឱ្យបានល្អជូនប្រជាពលរដ្ឋ។ ពង្រឹងការទប់ស្កាត់ការជួញដូរចែកចាយ និងប្រើប្រាស់គ្រឿងញៀននៅតាមមូលដ្ឋានឱ្យបានម៉ឺងម៉ាត់។ អាជ្ញាធរគ្រប់លំដាប់ថ្នាក់ត្រូវខិតខំយកចិត្តទុកដាក់ដោះស្រាយ នូវសំណើរសំណូមពរ និងបញ្ហាផ្សេងៗ របស់ប្រជាពលរដ្ឋ៕