(ភ្នំពេញ)៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួល ក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ.ជ) នៅព្រឹកថ្ងៃទី២៥ ខែសីហា ឆ្នាំ២០២៥ បានអនុញ្ញាត្តិឱ្យ លោក Kenichiro Kashiwase ប្រធានបេសកកម្មសម្រាប់ប្រទេសកម្ពុជា នៃមូលនិធិរូបិយវត្ថុអន្តរជាតិ (IMF) និងក្រុមការងារ ចូលជួបសម្តែងការគួរសម និងពិភាក្សាការងារ។

កិច្ចប្រជុំនេះក៏មានការចូលរួមផងដែរ ពីសំណាក់សមាជិកសភាពាណិជ្ជកម្ម ដែលតំណាងឱ្យវិស័យកាត់ដេរស្បែកជើង, វិស័យផលិតផលធ្វើដំណើរ, វិស័យភស្តុភារកម្ម, វិស័យកសិកម្ម, វិស័យពន្ធដារ និងក្រុមការងារជំនាញនៃមូលនិធិរូបិយវត្ថុអន្តរជាតិមួយចំនួនទៀតផងដែរ។

កិច្ចប្រជុំនេះមានគោលបំណង ដើម្បីពិនិត្យ និងពិភាក្សាលើ សកម្មភាពធុរកិច្ច និងសេដ្ឋកិច្ច ដែលបានលើក ០៤ចំណុច ដែលជាសំណើរបស់មូលនិធិរូបិយវត្ថុអន្តរជាតិរួមមាន៖

១. ផលប៉ះពាល់ដោយផ្ទាល់ និងដោយប្រយោលនៃអាត្រាពន្ធគយរបស់អាមេរិកមកលើកម្ពុជា,

២. បញ្ហាប្រឈម និងហានិភ័យជាក់លាក់នៅក្នុងវិស័យឧស្សាហកម្មកាត់ដេរ ស្បែកជើង និងផលិតផលធ្វើដំណើរ រួមជាមួយនឹងវិស័យដឹកជញ្ជូន កសិកម្ម និងកសិកែច្នៃ ផលិតកម្ម វិស័យថាមពល និងឧស្ម័ន,

៣. ផលប៉ះពាល់ពន្ធគយថ្មីរបស់សហរដ្ឋអាមេរិក និងវិធាននៃការប្រកួតប្រជែងក្នុងការនាំចេញ ក្នុងគោលបំណងធ្វើឱ្យមានស្ថេរភាពនៃការនាំចេញរបស់កម្ពុជា ការការពារឱ្យបាននូវការងារ និងការស្តារទំនុកចិត្តរបស់អ្នកវិនិយោគ

និង៤. បានពិភាក្សាលើ កញ្ចប់នៃអនុសាសន៍គោលនយោបាយរយៈពេលមធ្យម និងគ្រាអាសន្ន។

អ្នកឧកញ៉ា គិត ម៉េង បានបញ្ជាក់ថា សភាពាណិជ្ជកម្មកម្ពុជា កំពុងប្រមូលព័ត៌មាន និងអនុសាសន៍សំខាន់ៗ ពីវិស័យឯកជនពាក់ព័ន្ធស្ថានភាពធុរកិច្ច ពាណិជ្ជកម្ម និងវិនិយោគ ដែលកំពុងទទួលរងផលប៉ះពាល់ ដើម្បីផ្តល់ជូនដល់រាជរដ្ឋាភិបាលកម្ពុជា។ ជាពិសេស រក្សាបន្តគាំទ្រនៅគោលនយោបាយឈ្នះ-ឈ្នះ របស់ប្រមុខថ្នាក់ដឹកនាំរាជរដ្ឋាភិបាល ក្នុងអាណត្តិទី៧ នៃរដ្ឋសភា ដើម្បីធ្វើយ៉ាងណាឲ្យមានកំណើនសេដ្ឋកិច្ច និងវិនិយោគនៅកម្ពុជា។

ជាមួយគ្នានោះដែរ លោកប្រធានបេសកកម្មសម្រាប់ប្រទេសកម្ពុជា នៃមូលនិធិរូបិយវត្ថុអន្តរជាតិ (IMF) បានប្តេជ្ញាថានឹងបន្តជំនួយលើជំនួយខាងបច្ចេកទេស និងធ្វើការជាមួយដៃគូ ជួយដល់វិស័យឯកជន ដើម្បីរកដំណោះស្រាយរាល់បញ្ហានានា ឲ្យប្រសើរនៅពេលអនាគត។

កិច្ចប្រជុំនេះក៏បានបញ្ជាក់ដែរថា កម្ពុជាត្រូវតែពង្រឹងភាពប្រកួតប្រជែង តាមរយៈវិធាននយោបាយសមស្រប នៃទីផ្សារចម្រុះសម្រាប់នាំចេញ និងការការពារការងារកម្មករ ដើម្បីទប់ស្កាត់ផលប៉ះពាល់មិនល្អពីពន្ធអាមេរិក។

គួរបញ្ជាក់ថា មូលនិធិរូបិយវត្ថុអន្តរជាតិ (IMF) បាននឹងកំពុងធ្វើការប្រជុំពិភាក្សាលើមាត្រាទី៤ ឆ្នាំ២០២៥ នៅខែសីហា ដើម្បីពិភាក្សាអំពីការអភិវឌ្ឍម៉ាក្រូសេដ្ឋកិច្ច ទស្សនវិស័យ និងគោលនយោបាយជាមួយសមភាគីកម្ពុជា៕